Beisbòl - Marchena Braves a firma Ramses Jamanika i Santa Maria a haña 3 hungadó

Marchena Braves a firma Ramses Jamanika i Santa Maria a haña 3 hungadó

WILLEMSTAD- Firmamentu di hungadó riba nivel di Beisbòl Dòbel A a sigi siman pasá. Marchena Braves a anunsiá ku nan a firma e veterano picher Ramses Jamanika i Santa Maria Pirates a firma 3 piska grandi di Beisbòl Dòbel A. Santa Maria Pirates a firma Curtje Doran, Levi Carolus i Yurendell De Caster. Deporte Kòrsou a anunsiá algun siman pasá ku Santa Maria Pirates lo firma e tres hungadónan menshoná. E firma di Ramses Jamanika a tuma lugá djarason 13 di aprel.

Ramses Jamanika ta firma ku Marchena Braves siman pasá.

RAMSES JAMANIKA
Ramses Jamanika a picha 29.2 inning temporada 2021 ku e supkampionnan di Beisbòl Dòbel A, Royal Scorpions. Ela gana 2 wega i pèrdè 1 ku un efektividat di 3.94. Di e 29.2 inningnan 4.2 inning tabata den play-off semi-final i final. Den 2020 Ramses Jamanika a picha 12.2 inning ku 1 wega ganá i 1 pèrdí ku un ERA di 4.97. 2019 Ramses a picha un kantidat rekòrt di 63 inning ku 7 ganá i 4 pèrdí ku un ERA di 3.00. Ramses normalmente ta tira kontra tur ekipo grandi i chiki i elo yuda Marchena hopi, rumbo pa klasifikashon den e promé 4-nan di Beisbòl Dòbel A.

Yurendell de Caster ta firma ku Santa Maria huntu ku Endley Schoop i Vernon Isabella.

SANTA MARIA
Santa Maria a firma e hungadónan Curtje Doran, Yurendell de Caster i Levi Carolus. Nan tabata pendiente pa firma Kevin Moesquit tambe, pero parse ku Royal Scorpions a bisa ku ta basta di piki hungadónan bai kuné. Royal Scorpions lo hasi lo máksimo pa mantené Kevin Moesquit i Roderick Bernadina. Curtje Doran tabata temporada pasá den Royal Scorpions i Yurendell de Caster a hunga den Wild Cats e último añanan. Ta 2 hungadó ku a lanta ku Santa Maria for di Little League i ta bèk ku nan ekipo. For di fin di luna di mart rumornan tabata fuerte ku Doran i de Caster lo bai Santa Maria. Curtje Doran tabata ku Santa Maria den Beisbòl Dòbel A semper, pero a bai Royal Scorpions despues ku su tata a pasa di Santa Maria pa Royal Scorpions. Santa Maria na momentu ku nan a ripará ku Wild Cats lo no bai fuerte tras di Yurendell de Caster, a kuminsá move rápido. Dimes Yurendell de Caster i e manager Vernon ‘Tripel A’ Isabella ta bon amigu i ta traha huntu ku hóbennan prospekto tur dia.

Yurendell por bati i filea na nivel haltu ainda, apesar ku elo kumpli 43 aña den luna di sèptèmber benidero. Yurendell de Caster ta keda un dje batiadónan mas peligroso den Beisbòl Dòbel A i ta entre e lidernan den kareda empuhá di nos Beisbòl último temporadanan. Ultimo 3 añanan Yurendell ta dediká hopi na train prospektonan i tempu ta bira skars pa e por train manera tabata e kaso anteriormente. Yurendell ta full den training kaba pa hasi un bon papel ku Santa Maria Pirates. Levi Carolus a firma ku Santa Maria manera ariba menshoná. Na 2021 Levi a hunga ku Royal Scorpions despues ku den pasado e tabata ku e ekipo di Wild Cats pa hopi aña. Hopi aña pasá Levi a hunga den ekipo Royal Scorpions i a bira kampion na dos okashon (2011 I 2012) ku e ekipo menshoná. Levi por hunga tur posishon den infield i outfield. Un dje hungadónan ku un tempu tabata konektá e homerunnan ku fasilidat i tabata hopi aña lider òf entre e lidernan.