Mas informashon di Sòftbòl Slowpitch i Beisbòl di 2020

Lesadónan di Deporte Kòrsou , bondia. Promé nos sigi ku e informashonnan aki, mi ta deseá tur nos lesadónan, Pueblo di Kòrsou i Dutch Antilles, Hulanda i tur kaminda ku tin Yu di Kòrsou un Felis Aña 2021. Nos ta sigur ku aña 2021 lo bai muchu mas mihó ku 2020. Deporte a haña slá sigur, meskos ku den mayoría sektor riba tur nivel den e komunidat aki.

* * * * *

Awe nos ta para ketu na e Liga Di Nos Tur ku tampoko no a terminá kampionato 2020 i ta bai wak kon ta sigi den 2021. No ta sigur ku ta bai terminá 2020 òf ta legumai e kampionato ei i start ku esun di 2021. Medio yanüari aki nos lo tende kiko ta e próksimo paso den Deporte aki na Kòrsou i naturalmente den Slowpitch i Beisbòl ku ta loke nos ta kubri. Manera nos a bisa na hopi okashon, den desèmber aki ta solamente Liga 60 a logra terminá e kampionato i Beisbòl Veterano tabata falta solamente un inning. Ekipo Un Kara tabata maestral den kampionato Liga Di Nos Tur.  E ekipo aki dirigí pa Gerald Mathilda i Pepi Martis  a terminá number 1 den e liga invikto ku rekòrt di 8-0 i a klasifiká pa final ganando dos wega stret den Chilling den e play-off page system entre number 1 i number 2.

* * * * *

Ekipo Un Kara tin un defensa sólido pa no papia mes di nan bateo i picheo. Un Kara tin outfieldernan manera Curilma Carolina, Jeamin Pieternella, Fayna de Mei, den shortfield tin e sensashonal Isonette Polonius, veteranísimo Valeria Christina na tersera, Rubia Adelina den short, Nathaly Lourens na segunda, Lisette Hooi na primera. Realmente un ‘Dream Team’ ku lo bira kampion fásil atrobe rumbo pa un dinastía den Liga Di Nos Tur.  No ta fásil pa gana e ekipo aki por lo pronto. Probablemente nan lo  a kaba e kampionato aki invikto. By the way, Nos Tambe Por a terminá e kampionato 60+ invikto, loke no ta fásil den e tempu di awor. Mester bisa si ku no ta un kampionato kompletu, pero un buelta so sigí pa play-off.

* * * * *

Den artíkulo nos tin más detaye di Liga Di Nos Tur. Liga Streanan di Ayera ku ta e otro liga femenino veterano no a sigi, debí ku e presidente for di tempran a figa un posishon i para e kampionato. By the way, ekipo Nos Goso/Mas Goso a sorprendé Gai Lihe Barbolina ku un regalo nèt promé ku Pasku.  Gai Lihe ta yuda Santa Rosa Memories i Royal Scorpions tambe manera e por. E hòmber mester di elogio bèrdat pa e manera ku e ta yuda timnan. Resientemente nèt promé ku Pasku ta Gai Lihe i algún spònser a duna hungadónan di Royal Scorpions ku a destaká den 2020 regalo.

Nos ké pone énfasis den e kolumna aki ku no ta direktiva di Royal Scorpions ni FEBEKO, pero ta Gail Lihe i gran fanátikonan di Royal Scorpions, manera entre otro Anthony Zimmerman, Gai Lihe i otronan a sòru pa e regalo. E promé fase di e artikulo ta: “Djamars 22 di sèptèmber, algun gran fanátiko di Royal Scorpions a entregá premio na varios hungadó ku a destaká den e kampionto 2020.”  Bèrdat e kabes ta “Royal Scorpions a entregá premio na hungadónan ku a destaka.” Si a pone “spònsernan” lo a tende ku e otro spònsernan prinsipal no t’adén. Ta Gai Lihe su stail di premiá su hungadónan meskos ku den Santa Rosa Memories ela regalá e hungadó Kurby Brunken un pasashi pa Cuba. Pronto lo tin entrega di direktiva di ekipo Royal Scorpions pa hungadónan riba tur nivel.

* * * * *

Manera nos a splika, masha poko ekipo a sera aña debí na Covid-19.  Tur aña varios ekipo ta sera aña i manda pòtrèt pa nos, entre otro Flamboyan, Curacao Super Stars, Ban Serio, Marlins, Jandoret Raiders i otronan. Tin ekipo a mas o ménos sera aña si, pero na nan manera. Ei tambe no por tin tur hungadó i fanátiko. Por spera rabiamentu einan tambe, debí ku a tene fanátiko leu i leu di posibilidat di Covid-19 tambe.

‍