Mester mantené Dean Gorre ku selekshon
Bon komienso di un era nobo
WILLEMSTAD - Apesar di a tabla dos bes ku El Salvador, tabata un bon oportunidat pa por mira sierto hungadó den akshon dos wega kompletu. E resultadonan no ta malu teniendo kuenta ku e ekipo Salvadoreño ta 12 puesto riba nos riba ranking di FIFA. Dean Gorré a hasi kasi milager si tene na kuenta ku e tabatin nèt 11 hungado profeshonal aktivo den tur dos wega kontra un ekipo ku si a bini ku tur hungadó full-prof. Nos no tabatin ni un kambio ku ta aktivo i di nivel profeshonal.
Sontje i Roly e úniko hungadónan profeshonal di nivel riba bank tin basta tempu sin ekipo. E otronan ta amateur òf ta hunga riba nivel hopi aboui ta hasta banki den nan ekipo. Ku nos a pèrdè oportunidat pa bira kabes digrupo den pre-mundial ta di lamentá, pero no ta un katastrofe. Ta dos di kada grupo ta sigui i na potensial nos tin mas hungadó ku kasi tur otro ekipo den e premundial di CONCACAF. Riba esei mester traha. Pronto mi lo presentá e lista di hungadó ku ta bin na remarke pa komprondé, ku nos por harma algu serio.Mester traha sí.
Tin kos bon ku nos a mira. Por ehèmpel Roemeratoe ku Felida kendenanta kubri hopi tereno, lo sigui krese den Eredivisie i huntu ku Juninho ku a demonstrá algu di su abilidatnan haltu, kombiná ku e veteranonan Leandro Bacuna i Anita, ta garantia pa un medio kampo bon okupá yüni benidero. Nos a hunga sin banki. No ta pornada ku El Salvador ku ta kore hopi ku hopi pase kòrtiku a hinka dos golden e di dos tempu, hasiendo hopi kambio. No mester lubida ku desorganisashon hastana nivel di selekshon a kosta nos hungadó. Esei mester drecha.
DEAN GORRÉ
Dean for di chiki ta biba Futbòl, nunka e no a hasi nada otro, tantu komo hungadó riba nivel máksimo i después komo dirigente tékniko na nivel di klup i di selekshon. E sa di e kos. Ademas e ku e hungadónan ta komprondé otro bon. Esei ta fásil pa komprondé. E ta un di nan. Nan ta bin di mes un‘ background i e ta un di nan ku a logra yega hopi leu den futbòl europeo. E ta papianan lenga i tin mes kultura ku nan. Pesei nan ta respete.
Entrenadónan ulandes desempleá
Ta papia di bin ku Dick Advocaat. Masha bunita, pero tinun realidat. Kisas e por bin ku hungadó nobo, esei lo ta algu positivo, pero kòrda ku nos a pensa esei di Hiddink tambe ku a bin kòrta su bon maishi i después di pèrdè algun partido a lastra, meskos ku Langeler, pa después bisa ku kos ta desorganisá aki komo ekskusa – lokual ta bèrdat- pa skapa nan kara na Ulanda, kaminda nantabata sa promé di kuminsá, ku aki no ta KNVB i ku tabata nan tarea tambe pa yuda den e organisashon.
Advocaat
Advocaat ta un ansiano ku na mundial lo ta na porta di 80 aña i ku basta peso. E pre-mundial di nos lo ta hopi largu. Mi ta mira difísil pa e biaha hopi i bai papia personalmente ku potensial hungadó, pa no papia mes di aktividat di entrenamentu riba tereno. Ela bisa bon kla tambe ku e no a bin ahinda pasobra mester skupi mas plaka. E tin mag di pone su eksigensia, pero Dean ta den servisio paga kaba di un Federashon ku ta mal bashi i ku debe rònt su kurpa, kuni kreditornan lokal e no por paga.
Si Advocaat bin mes, ku por sierto for d 2014 no por haña trabou fast na Ulanda i ku for di e tempu ei òf a wòrdu retirá promé ku tempu repetidamente of a move pa mas sèn, mester ta den kombinashon ku Gorré ku a tuma e selekshon aki den un tempu difísil ku tur riesgo pa su reputashon i a saka tres bon resultado ku tiki material. Mi tin sigur ku Dean,kende su kasa tambe ta biba aki i kendenan stima Kórsou, si lo drenta avión ibai papia personalmente ku hungadó manera Bazoer, Chong, Obsipo, Brenet, St.Jago i eventual e veteranonan Room i Martina si nan ke ahinda, pa nos por start na yüni zeta i den gran forma pre mundial. E fanatikada lo regresá i nos soño ta real ipesei nos mester tene bibu. Awor ku Merka. Mexico i Canada ya ta klasifika, nostin potensial sin mas pa yega den e seis mihónan di CONCACAF ku bista riba2026. Biba Pantera Negra, kabes ariba!!
