Nos Goso ta sigi invikto den The Diamond Stars League
WILLEMSTAD- Nos Goso a dal The Warriors duru ku skor di 19 pa 3 i keda invikto den The Diamond Stars League 2022. Wikènt pasá weganan a sigi na Sam Bunting Ballpark na Brievengat. Nos Goso tin rekòrt di 8-0, sigí pa Rising Trotters ku tin 7-2, Treasure New Era 6-2, The Fighters 5-2, Eureka 2-6, Mas Goso 2-4, Lady G 1-7, The New Warriors 0-8.
RESULTADONAN
Djabièrnè 1 di Aprel
The Rising Trotters 7, Lady G 0
The Rising Trotters a gana Lady G pa defolt.
The Fighters 7, Mas Goso 6
The Fighters tabatin 9 hit i nan kometé 6 eror. Angelendrina Sambo a gana. Rubia Adelina a bai di 3-3 i Celeste Francisca di 2-2. Sahaira Antersijn, Solange Alberto, Lisette Hooi ku Melanie Adriana, tur a bai di 2-1. Mas Goso a dal 9 hit i nan a hunga sin eror. Recela Avastia a pèrdè. Loeshemains Kook a bai di 3-2. Sherry Howell a bai di 1-1 i Dayenne Delando a bai di 2-1.
Djasabra 2 di Aprel
Treasure New Era 16, Eureka 5
Treasure a dal 14 hit i nan a kometé 6 eror. Anushka Delando tabata ganadó I Dianara Pieternella a bai di 3-3. Anushka Delando i Sulena Lacruz, ámbos bai di 2-2. Janitza Betrian ku Isonette Polonius, ámbos a bai di 2-1. Chaunice Maduro ku Juretty Weert-Paulo, tur 2 a bai di 3-2. Isonette Polonius a konektá 1 homerun. Pa Eureka 7 hit ku 2 eror. Julia Holder a resultá pèrdèdó. Zunaiska Hailand ku Norviris Faneyt a bai di 3-2. Sharlenda Walle ku Dianella Joseph, ámbos a bai di 2-1.
Nos Goso 19, Warriors 3
Nos Goso a bati 25 hit i nan a kometé 3 eror. Murielle De Jongh tabata picher ganadó. Asila Finies a bai di 4-4 I Shurela Merkies di 2-2. Fatima Muskus a bai di 2-1. Natasha Marselia, Sonna Valies i Melissa Rosalina, tur a bai di 4-3. Leonise Avastia, Girella Isabella, Yoyceline Arnhem ku Gwendolyn Juliana, tur a bai di 4-2. Warriors tabatin 10 hit ku 6 eror. Churmalyn Eduarda a resultá pèrdèdó. Maria Bernadina a bai di 2-2. Jeanderica Martina, Sophyena Merien i Churmalyn Eduarda, tur a bai di 2-1. Raisa Elisabeth a bai di 3-2.
Djadumingu 3 di Aprel
The Fighters 7, Lady G 0
The Fighters a gana Lady G pa defolt.
Treasure New Era 12, Rising Trotters 6
Treasure tabatin 14 hit ku 3 eror. Anushka Delando a bai ku e viktoria. Isonette Polonius ku Tanusi Delando, ؘámbos a bai di 3-3. Idelmira Reinilia ku Ismairy Ignacio, tur dos a bai di 2-2. Dianara Pieternella di 2-1. Tanusi Delando a konektá 1 homerun. Rising Trotters a dal 9 hit i nan a hasi 4 eror. Janella Comenencia a karga ku e derota. Sovienca Calmera ku Jaqueline Sophia, ámbos a bai di 3-2. Nethley Casper, Ashantely Giterson, Janella Comenencia, Jarima Osepa ku Joyce v/h Kruys, tur a bai di 2-1. Sovienca Calmera a konektá 1 homerun.
INFORMASHON DI SÒFTBÒL I BEISBÒL
Fanátikonan di Deporte Kòrsou , bonnochi i felis fin di siman. Torneo Hope a start den gran forma djabièrnè siman pasá. Djasabra tabatin apertura ofishal kaminda Minister di Enseñansa, Siensa Kultura i Deporte sr. van Heydoorn a hiba palabra. Presidente di Fundashon Van Engelen Ballpark sr. Sergio Leon tambe a dirigí palabra. Torneo Hope 2022 ta organisá pa Fundashon Van Engelen Ballpark p’asina nan risibí fondo pa sigi drecha fasilidat na parke A i B na Van Engelen.
* * * * *
Varios wega kayente ku tabata empatá te den último inning i e públiko presente a gosa un bòl. Aqualectra a laga SBAB den tereno riba homerun di Risandro Pastor. SBAB Femenino a gana di MCB despues ku e wega a bai dos extra inning (tie break). Den 40+ pa di promé biaha den Torneo Hope, MCB a gana Polis ku skor di 8 pa 2. Djabièrnè 1 di aprel 2022, den e promé wega Aqualectra a dal Selikor duru ku skor di 21 pa 4. MCB a gana Orco Bank 11 pa 1 den COED. E kombinashon SVB/SGR/ACU dal Brandweer/ADC 13-11.
* * * * *
Pa loke ta Torneo di Beisbòl Veterano organisá pa The Brothers, ekipo Isla a gana The Brothers pèrtá ku skor di 5 pa 4. Wikènt benidero tin e último weganan i pa djadumingu 1’or lo tin e gran final. Djasabra tin semi-final pa 10.30 am i 3.30 pm. Djadumingu 10 di aprel den oranan di mainta lo tin wega bálido pa di 3 i di 4 lugá entre a pèrdèdónan di djasabra. The Brothers ta invitá tur fanátiko di bon Beisbòl pa bin mira e weganan di e wikènt kulminante di e torneo.
* * * * *
Yurendell de Caster ta pendiente di Wild Cats pa e haña su traspaso pa Santa Maria. Parse ku kosnan no ta bayendo asina fásil. Yurendell ta bisa ku ta pa un aña ela firma durante tur e añanan i dirigentenan di Wild Cats ta pensa otro. En todo kaso nos ta pendiente kiko FEBEKO lo bai hasi den un kaso asina òf Santa Maria i Wild Cats lo yega na un akuerdo pa ku e traspaso. Manera ta konosí kampionato di Dòbel A lo bai start te den luna di yüni, miéntras Hubenil lo start komienso di mei.
* * * * *
District Administrator di Beisbòl Little League sr. Urny Floran a anunsiá e skèdjel di play-off den e kategoríanan Minor te ku Senior League. Gran notisia ta ku Beisbòl Little League lo biaha ku dos selekshon pa Punta Cana di 5 pa 10 di yüli. Ku otro palabra, e dos selekshonnan ku terminá na 1 i 2 lo biaha pa República Dominicana. Ta promé biaha ku un ekipo bishitante por tin dos selekshon den un torneo. Chèns pa Kòrsou yega Williamsport atrobe a bira mas gandi. Pronto lo tin un Konferensia di Prensa ofishal di Curacao Little League huntu ku nan spònser RBC Royal Bank.
* * * * *
Bèk pa Torneo Hope 2022. Tremendo show e bailarinanan i e brassband a duna na apertura di Torneo Hope djasabra den oranan di atardi. Presentenan a gosa un bòl, miéntras ekiponan ku tabata tei for di mainta a keda pa e apertura ku a konta ku partisipantenan di mayoría ekiponan ku ta partisipando na Torneo Hope. Skèdjel pa wikènt 8, 9 i 10 di aprel a sali i tin ekiponan ku lo mira akshon den e di dos siman di e torneo.
* * * * *
Ayera ekipo Pitufos tabatin un get to gether na Banda Bou i tabatin un partido entre Pitufos 50 + i 60+. Esnan di 50+ a gana ku skor pèrtá di 3 pa 1. 60+ tabatin hungadónan manera Luis Coffie, Naai Hooi, Cedric Curiel, Francis Petronllia, Bani Coffie i Gigi Hooi. Tremendo partido di training i ekipo Pitufos ta bai den 2022 pa klasifiká naturalmente den tur dos liga, esta 50 i 60. Nos tin varios informashon di 50+ ku ta bai start den luna di mei na momentu ku Torneo Hope terminá.
