Nos Power a dal Pitufos 6 pa 4 den Liga 60 Yesterday a gana pa defolt i Swift ta gana den semifinal Liga 40
WILEMSTAD- Nos Power a derotá Pitufos ku skor di 6 pa 4 den kontinuashon di Liga 60 na Frank Curiel Ballpark. Nos Power, pèrdí ku skor di 4-0 den último inning ta empatá e wega i despues ku dos out Earl Virginia ta konektá un homerun ku base yen pa lèft pa laga ekipo Pitufos den tereno. Nos Power tabatin mester di e viktoria pa sigurá puesto number 4 i un lugá den playoff. E wikènt aki lo tin e último weganan di e buelta regular pendiente di e weganan ku a keda kanselá pa motibu di awaseru.
Nos Tambe Por 19, Curacao Super Stars 1
Nos Tambe Por a dal 13 hit i hunga sin eror. Richenel Rafaela a gana. Percey Schoop, Rudsel Baromeo, Oswin Basilia, Dennis Leopold ku Edsel Leopold, tur a bai di 1-1. Nelson Jacoba ku Richard Coffie di 2-1. Norwin Moesquit, Winston Kirindongo ku Hendrik Gabriel, tur a bai di 2-2. Winston Kirindongo a konektá 1 homerun. Pa Curacao Super Stars 3 hit ku 2 eror. Lionel Li a pèrdè. Elvis Halmeyer a bai di 1-1 i Nelson Marks di 2-2. Den e otro weganan Nos Tambe Por a blackout Curacao Super Stars ku skor di 19-1 i Lions a dal Los Amigos 5-1.
Nos Power 6, Pitufos 4
Nos Power tabatin 4 hit ku 1 eror. Isaac Francees tabata ganadó i Hercules Janga a bai di 1-1. Oswalt Dalnoot ku Victor Hakmaat a bai di 2-1 i Earl Virginia a bai di 3-1 ku tabata un homerun. Pitufos a dal 8 hit i hasi 1 eror. Juan Cicilia a resultá pèrdèdó. Luis Coffie, Cedric Curiel, Rignald Hooi ku Gwendel Sint Jago, tur a bati di 2-1 i Rubio Kook a bai di 3-2.
Lions 5, Los Amigos 1
Lions a bati 10 hit i kometé 1 eror. Elvis Jacobus a bai ku e viktoria i Ernesto Priest a bai di 1-1. Marlon Louisa, Gensley Balborda ku Ludwig de Wind, tur 3 a bai di 2-1. Sherwin Floranus di 3-2 i Robert Trinidad a bai di 3-3. Sherwin Floranus a konektá 1 homerun. Los Amigos tabatin 3 hit ku 1 eror. Norman Provence a karga ku e derota i Gilbert Yziek a bai di 1-1. Candido Adamus ku Ingemar Jonis a bai di 2-1.
Gilbert Yziek a konektá 1 homerun.
Yesterday ku dos wega krusial e wikènt aki den Beisbòl Veterano
Djasabra Yesterday a gana Vosama pa defolt
WILLEMSTAD – Ekipo Yesterday mester gana dos wega e wikènt aki pa klasifiká komo number 6 den Beisbòl Veterano. Djadumingu último ekipo Yesterday a laga ekipo The Brothers den tereno i lo mester hunga dos wega e wikènt aki pa klasifiká number 6. Djasabra 4 di novèmber pa 10.30 ekipo Yesterday mester a hunga kontra Vosama i djadumingu 5 di novèmber Yesterday lo topa ku ekipo Marlins pa 1’or. Djasabra Yesterday a gana Vosama pa defolt. Yesterday mester gana dos wega pa klasifiká komo number 6 i topa Jandoret Raiders e sigiente wikènt. Standing di Beisbòl Veterano faltando dos wega di Yesterday. Quality Stars 22-0, Santa Rosa Memories 18-4, Isla Crackers 17-5, Jandoret Raiders 13-9. The Brothers 10-12, Yesterday 9-11, Azucar 8-14, Vosama 6-15, Marlins 6-15, Veteranos Otrabanda 4-18, Marchena Stars 0-22.
Djasabra 28 di òktober
Sta Maria 7, Marchena 0
Santa Maria ta gana Marchena Stars pa defolt.
Jandoret 9, Azucar 1
Jandoret a dal 4 hit i kometé 1 eror. Rigobert Cijntje a gana. Jeffrey Martina ku Mairon Martinus a bai di 1-1. Mairon Wijman a bai di 2-1 i Deron Clara a bai di 3-1. Azucar no tabatin hit i nan a hasi 5 eror. Norwin Reinita a pèrdè.
Quality Stars 12, Marlins 1
Quality tabatin 17 hit i nan a hunga sin eror. Ramiro Balentina tabata ganadó. Leroy Antonia, Raymond Leonora i Georgino Goeloe, tur a bai di 2-2. Deron Puriel, Raydel Isabella, Merieldo Trinidad, Vernon de Lanooi ku Felix Edword, tur a bai di 3-2. Felix Edword a konektá 1 homerun. Marlins a dal 2 hit i hasi 3 eror. Ramon Cabrera Dominguez a resultá pèrdèdó. Denley Marten i Carlos Madera Pimentel a bai di 1-1.
Djadumingu 29 di òktober
Yesterday 4, The Brothers 3
Yesterday a dal 7 hit i kometé 1 eror. Andley Simmons a gana i e mes a bai di 1-1. Oscar Lebar, Charles van Thijs, ámbos a bai di 2-1. Zhurendel Ilaria a bai di 2-2 i Alexander Martina a bai di 3-2. The Brothers tabatin 6 hit i nan a hunga sin eror. Signald J. Burnet a pèrdè i Kelvin Winklaar a bai di 1-1. Bryon Kook, Hubert v/h Kruys i Jairo Burnet, tur a bai di 2-1 i Wendell v/h Kruys a bai di 2-2.
Isla 8, Veteranos Otrobanda 2
Isla a dal 5 hit i hunga sin eror. Rainier Martis tabata ganadó i Julius Veeris a bai di 2-1, Charlton Merite a bai di 3-1. Veteranos Otrabanda tabatin 4 hit ku 4 eror. Edison Clemencia a resultá pèrdèdó i Earnie Sterling a bai di 2-1. Leonel Cecilia a bai di 2-2.
Santa Rosa 8, Vosama 0
Santa Rosa tabatin 10 hit i nan a hunga sin eror. Verney Jansen a gana. Rignald Pietersz, Egbert Polonius ku Verney Jansen, tur a bai di 2-1. Djonny Jubert a bai di 2-2, Jair Quant ku Ian Leito a bai di 3-2. Vosama a dal 5 hit i hasi 4 eror. Nimrod Thielman a pèrdè. Cedrix Valies ku Reumert Monte a bai di 1-1. Luis Offredy, Minald Seferina i Jason Benito, tur a bai di 2-1.
%20copy.jpg)
LIGA 50
Jandoret Raiders 6, Sigi Hunga 1
Jandoret Raiders a bati 9 hit i hunga sin eror. Clifton Ijziek tabata e picher ganadó i Jeffrey Martina a bati di 2-2. Earl Virginia tambe a bati di 2-2. Edmar Cornelia tabatin un homerun. Sigi Hunga a konektá 4 hit i hasi 2 eror. Francisco Alcantara tabata e picher pèrdèdó. Aldrin Visers i Moises Zimmerman a bati di 1-1.
Swift ta pika dilanti den playoff semi-final Liga 40
WILLEMSTAD – Swift a gana Cicoza ku skor 8 pa 5 den playoff Liga 40 djaweps anochi na Van Engelen Ballpark. Fernando Rosario a picha wega kompletu, dal homerun i empuhá 4 kareda den e viktoria di Swift. Wega number 2 di e seri miho di 3 lo ta djamars awor na Van Engelen Ballpark. Baranka ta den final pendiente ganado di e serie aki.
Swift 13, Cicoza 8
Swift tabatin 12 hit ku 2 eror. Fernando Rosario a gana. Carlos Ramirez ku Fernando Rosario a bai di 2-1. Percy Gosepa a bai di 3-2, Rixon Peña di 3-3 i Emilio Velarde Lugo a bai di 4-3. Fernando Rosario a konektá 1 homerun. Cicoza a dal 12 hit i hasi 1 eror. Mysonn Cathalina a pèrdè. Yurandel De Castro a bai di 2-2, Jefferdion Polonius di 3-2. Alexander Guanipa, Rashit Jacobs ku Jonathan Pascual, tur a bai di 4-2.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia i felis siman. Djasabra tabatin e gran final di Liga Amstel entre ekiponan Thrillers i Gamers. Segun nos ta promé biaha ku Gamers ta bai final di Liga Amstel, miéntras Thrillers ta e super kampion di Liga Amstel despues ku ekipo Bombers no ta partisipando mas. Gamers a sorprende Thrillers i gana dos wega sigi pa bira kampion Liga Amstel pa promé biaha. Den kurso di siman nos tin mas detaye. Ekipo Bombers tabatin un gran dinastía den e liga i nan tabata kampion pa 7 aña sigí un tempu. Di un manera òf otro Bombers a wanta un ratu i e hungadónan a bai militá den otro ekipo.
* * * * *
Beisbòl Veterano a sigi djasabra i djadumingu ku weganan kaminda ekipo Yesterday mester gana tur dos wega pa klasifiká. Djasabra 4 di novèmber pa 10.30 Yesterday a gana Vosama pa defolt i djadumingu pa 1’or kontra di Marlins. Den Liga 50 ekipo Jandoret Raiders lo hunga kontra Otrabanda pa 10.30 di mainta. Djadumingu 5 di novèmber tin weganan di Liga 50 na Frank Curiel Ballpark. Ta trata di e último weganan di kampionato regular.
* * * * *
Texas Rangers a bira kampion Mundial djarason 1 di novèmber den Chase Field aya na Arizona. Texas Rangers a gana Arizona tres wega stret den nan kas pa asina yega un rèkòrt di 11 wega ganá sigí den kas di nan kontrinkante den Post Season. Texas Rangers a gana di Arizona Diamond Backs ku skor di 5-0 den e wega number 5 djarason último. E seri a terminá 4-1 na faborito di Texas naturalmente. Corey Seager super shortstop i tremendo batiadó a bira MVP di e World Series. Ta di dos biaha e ta bira MVP di World Series. Na 2020 Corey Seager tabata MVP di e World Series na momentu ku Dodgers a gana di Tampa Bay Rays.
* * * * *
Pabien na nos Pachito Adriana ku tabata ku e ekipo Rangers den dugout for di luna di ougùstùs pa yuda kordiná e parti di bateo di e ekipo. Pachito Adriana ta kordinadó bateo di ekiponan na República Dominicana Klase A abou i Klase A haltu di organisashon Texas Rangers. Despues ku e kampionatonan di República Dominicana i Klase A a terminá, maneho di Texas Rangers a pidi presensia di Sharnol ‘Pachito’ Adriana na Texas pa sigi ku e ekipo te final. Tremendísimo trabou di Pachito i nos tabatin kontakto kuné konstantemente durante play-off direktamente for di Texas òf e otro suidatnan.
* * * * *
A keda demonstrá ku den play-off mester ahustá e wega i hasi mas kos ku ta solamente bati homerun. Anke homerunnan tabata klave den mayoría di e viktorianan, pero no por stèns riba batimentu di homerun so. Den e play-offnan e aña aki nos a mira tur kos, hopi robo di base, toke robo, delayed steal ets. Texas a invertí masha hopi plaka den nan ekipo pa nan bai World Series despues ku na 2011 nan a keda kòrtiku.
* * * * *
Ata algun hungadó ku a firma ku Texas den e último añanan. John Gray a firma 4 aña pa 56 mion desèmber 2021, ku ta un averahe di 14 mion pa aña. Marcus Semien (avg.25 mion) a firma pa 7 aña 175 mion na desèmber 2021, Corey Seager 10 aña pa 325 mion (avg. 32.5) na desèmber 2021, Jacob de Grom (avg. 37 mion) 5 aña pa 185 mion, Andrew Heaney 25 mion pa 2 aña (12.5 mion pa aña) na desèmber 2022, Nathan Eveoland 2 aña 34 mion (avg. 17 mion) na desèmber 2022. Bruce Bochy, manager di Texas a firma na òktober 2022 pa kuminsá manehá na 2023 i a bira kampion den su promé aña. Ela firma un kontrakt di 3 aña i tabata den retiro i Texas a manda buské i ela firma un bon kontrakt ku Bochy. Detayenan di e suma di kontrakt no ta konosí. Burce Bochy a logra su di 4 renchi di Seri Mundial 2010,2012 i 2014 ku San Francisco. E ta sigur un di e managernan mihó pagá den MLB. Nos ta keda te aki pa awe.
