Nos Power a gana Curacao Super Stars 9 pa 2 den Liga 60
WILLEMSTAD- Nos Power a gana Curacao Super Stars ku skor di 9 pa 2 i ta den klasifikashon na di 4 lugá den Liga 60. Weganan a tuma lugá na Frank Curiel Ballpark i ekipo Nos Tambe Por a sigi ku nan racha viktorioso ganando di Los Amigos ku skor di 6-0. Sluggers a laga Lions den tereno despues ku Lions a empatá e wega den kabes di e di 7 inning. Sluggers tabata dilanti 3-1, pero Marlon Louisa a dal homerun di dos kareda pa empatá wega. Finalmente Sluggers a bin gana e wega.
Djadumingu 15 di òktober
Sluggers 4, Lions 3
Sluggers tabatin 7 hit ku 1 eror. Eldred Bakker a gana. James Jackson, Hilbert Cicilia ku Frank Rafael, tur a bai di 2-1. Richinel Boeldak a bai di 3-2. Pa Lions 8 hit ku 3 eror. Roger Felicia a pèrdè i Rudsel Rijne a bai di 1-1. Roger Felicia, Elvis Jacobus ku Arie Den Hartog, tur a bai di 2-1. Marlon Louiza a dal un homerun.
Nos Power 9, Curacao Super Stars 2
Nos Power a dal 8 hit i hunga sin eror. Isaac Francees tabata picher ganadó. Earl Virginia, Wendell v/h Kruys, Lionel Rosa ku Pedro Austriano, tur a bai di 2-1. Sherwin Martinus a bai di 2-2. Curacao Super Stars tabatin 5 hit ku 4 eror. Hubert Bazoer a resultá pèrdèdó. Nelson Marks, Elvis Halmeyer, Jorge Chirino, George Scharbaai ku Jin Kuang Li, tur a bai di 2-1.
Nos Tambe Por 6, Los Amigos 0
Nos Tambe Por tabatin 9 hit ku 1 eror. Siegfried Lopez a bai ku e viktoria. Jeffrey Martina, Richard Coffie i Dennis Casimire, tur a bai di 1-1. Percey Schoop a bai di 2-2. Norwin Moeskiet ku Renato Anasagasti, ámbos a bai di 3-2. Los Amigos a dal 3 hit i hasi 2 eror. Norman Provence a karga ku e derota. Sendly Reina, Gilbert Yziek ku Donald Balentina, tur a bai di 2-1.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia. Skema ofishal di play-off final di Liga 50 a drenta. E weganan lo bai kombiná ku weganan di Liga Amstel i Liga Van Engelen. Djasabra 10’or lo tin wega entre Marlins i Jaws bálido pa puesto number 3. Despues pa 12’or lo tin wega number 1 di e seri final entre Baranka i Ban serio. 2’or i 4’or tin weganan di Liga Amstel riba tereno A. Djadumingu pa 10’or tin wega entre Swift i Navegantes pa loke ta e gran final di Liga Amstel. 1’or pm djadumingu tin wega atrobe entre Ban Serio i Baranka. Despues tin wega number 2 di e gran final di Liga Van Engelen entre Swift i Navegantes.
%20copy.jpg)
* * * * *
E dianan aki nos ta bai un ratu pa MLB tambe den kolumna, debí ku ta play-off i ta 4 ekipo so a sobra. Kandela tin e dianan aki i sorpresa grandi kaminda ekipo Texas Rangers a gana e dos promé weganan di Houston Astros pèrtá ku skornan 2-0 djadumingu i 5-4 djaluna. Djarason Houston a gana 8 pa 5 i djaweps 10 pa 3. E seri ta empata na dos i e wega i djabièrnè tin wega number 5 di e seri . Texas tin Bruce Bochy komo manager, un manager ku tin hopi eksperensia den Post Season i ku a bira 3 biaha kampion ku ekipo San Francisco Giants, aña 2010, 2012 i 2014 ku Hensley Meulens komo coach. Houston tin Dusty Baker ku a bira kampion komo hungadó (Dodgers 1981) i ku Houston komo manager na 2022.
* * * * *
Den e otro seri Philadelphia a sali gana e promé wega ku skor di 5-3. Nan tabata ganá fásil 5-0, pero den parti final di e wega Arizona a reakshoná bon i tabata yegando serka den parti final di e wega, pero a keda kòrtiku. Arizona a gana ku skor di 2-1 djaweps na Arizona. Philadelphia no ta notando masha hopi kareda pafó di kas. 3 I 4 na Atlanta i awor 1 na Arizona. Hopi a pronostiká un World Series entre Houston i Philadelphia, ban wak kiko ta bai pasa. Houston ta 2-2 den e seri i ta den un bon posishon. Tene kuenta ku Texas tabatin varios siman na kabes di e divishon West di Liga Americana durante temporada regular. E dos ekiponan aki a terminá ku mesun rèkòrt di 90 ganá i 72 pèrdí. En todo kaso promé ku e weganan di djabièrnè 20 di òktober e serinan tabata Houston 2, Texas 2. Philadelphia 2, Arizona 1.
* * * * *
Awe nos tin resultado di Liga 60 ku a tuma lugá na Frank Curiel Ballpark djadumingu último. Ekipo Nos Tambe Por a sigi gana i a dal Los Amigos ku skor di 6-0. Nos Tambe Por tin un racha formal di wega ganá sigí, despues ku e ekipo a pèrdè den komienso di kampionato kontra di Jaws. By the way, Jaws ta bai kumpli 50 aña i tin un resepshon i selebrashon formal. Ekipo Jaws ta fundá pa Kid Boca Chica ku tei for di komienso te ku dia di awe. Tur aña Jaws ta organisá Torneo Kid Boca Chica 60+.
* * * * *
Situashon ta pèrtá den Liga 60 pa loke ta trata e ekipo ku lo bai klasifiká komo number 4. Ekiponan Nos Tambe Por i Pitufos ta práktikamente klasifiká. Jaws i Nos Power tin 4 wega pèrdí. Lions i Los Amigos ta na di 5 i 6 lugá respektivamente. Despues ta sigi Sluggers i Curacao Super Stars. Pa loke ta trata lidernan individual, Sendly Reina (Los Amigos) ta lider ku un average di .538, sigi pa Renato Anasagasti ( Nos tambe Por) ku tin .524. Den kareda empuhá Winston Kirindongo (Nos Tambe Por) tin 15 RBI, Rignald Hooi (Pitufos) 14. Den picheo Siegfried Lopez (Nos Tambe Por) tin un ERA di 1.03 sigí pa Richenel Rafaela (Nos Tambe Por) 1.87. Juan Cicilia di (Pitufos) 1.87 sigí pa Lesley Martina (Pitufos) 2.31 i Hubert Gomez (Los Amigos) tin 2.37. Pa loke ta ponche tirá Isaac Francees (Nos Power) tin 12. Juan Cicilia (Pitufos) 9, Anthony Pieter di Jaws ku 9 ponche.
* * * * *
Liga 40 a sigi mayan djaweps ku dos wega. Gamers a gana Swift 6 pa 4 i Cicoza a dal Twister 18-10 djaweps siman pasá. Siman pasá nos a pone ku Swift tin Emilio Velarde pa picha den 40+, pero parse ku pichernan manera Emilio Velarde i Jermaine Esprit ku ta tira slingshot no mag tira den Liga 40. Algun ekipo a menasá di hala atras si pichernan ku ta tira duru anochi lo sigi picha. Djaweps 19 di òktober Gamers a dal Jaws 12 pa 6 i Baranka a derota Cicoza 14 pa 5. Nos tin resultadonan Beisbòl Veterano siman pasá i lo publiká e resultadonan mayan. Djadumingu Santa Maria a dal Otrabanda 15-4, Quality a derotá Yesterday 6-2 i den e último wega Azucar a gana Vosama 4-1. Nos ta keda te aki pa awe ku Poder di Dios.
