Nos selekshon mester di mas hungadó di nivel haltu
Skibí pa Pepi Sulvaran
WILLEMTAD.- Nos a nota ku ta ampliando e kuerpo tékniko di nos selekshon di futbòl, serando kontrato ku diferente persona. Nos ta sali sin mas for di e punto di bista ku esei ta ku bon intenshon. Pero tin un regla di oro den futbòl, esta ku wega di bala bo ta gana riba tereno. Den e aspekto ei, otro for di personal di ‘staf’, apesar di su nòmber, Hiddink no a logra trese futbolista pa por hisa nos nivel aun mas. Einan si kos ta ketu.
E efekto di un kuerpo tékniko no mester wòrdu eksagerá. Tur kos ta kuminsá i kaba na hungando. Mester di mas hungadó di nivel. Si nos sali for di Guatemala i Panamá òf Santo Domingo, ta trabuko tin ta warda nos. CONCACAF tin 4 puesto disponibel pa Qatar. Tres direkto i un via play off. Na e momentu aki den e sekuensia aki, México, Merka, Canada i Jamaica ta e faboritonan. Laga nos tira un bista riba nan pa komprond’é kiko nos ke men.
México tin hungadónan den liganan tòp di mundu. Tin 4 den La Liga di Spaña, Diego Lainez bolante (Real Betis), Héctor Herrera bolante (Atlético Madrid), Andrés Guardado bolante-kapitan (Real Betis) i Néstor Araujo defensa (Celta Vigo). Un delantero di Napoli, Hirving Lozanoi un delantero, di Liga Premier Raúl Jimenéz (Wolverhampton). Jesús Corona (Porto, Portugal) ta kompletá e trio ofensivo. Tin dos bolante den tòp de Eredivisie tambe, Edson Álvarez (Ajax) i Érik Gutiérrez (PSV), dos hungadó di e divishon máksimo di Bèlgika, e defensa Gerardo Arteaga (Genk) i e bolante Omar Govea (Zulte Waregem). Esaki sin konta esnan ku ta hunga na México den un bon kampionato.
Merka no ta keda’tras i ta bin ku Zack Steffen, di dos kiper di Manchester City ku a hunga Champions League. Den defensa tin Sergiño Dest (Barcelona) i dos defensa di Liga Premier di Fullham, Antonee Robinson i Tim Ream. Ademas di e talentonan Chris Richards (Hoffenheim, Bundesliga) i Bryan Reynolds (AS Roma), aparte di John Brooks (Wolfsburg), tambe di Bundesliga. Den bolante tin Tyler Adams (Leipzig, Bundesliga) i Weston McKennie (Juventus). Tin e talento Yunus Musah, un bolante di Valencia den La Liga, Reggie Cannon (Boavista, Portugal) i otro talento di 18 aña Owen Otasowie ( Wolverhampton, Premier League). Delantero no papia mes: Christian Pulisic (Chelsea) ta liderá e atake. Pero tin Josh Sergant (Werder Bremen), Timothy Weah (Lille, Fransia) i e talento di mas grandi Giovanni Reyna (Borussia Dortmund) kende ku su 18 aña ta kosta 38 mion euro.
Un tiki ménos ku Merka ta Canada, ku dos hungadó fuera di serie. Alphonso Davies (Bayern Munich), nasé na Ghana, e di sinku hungadó mas karu na mundu. Den Bayern e ta hunga tur kaminda riba e banda robes, pero mas be den defensa. Pa Canada e ta hunga riba mes línea robes pero den atake. E di dos atakante peligroso ta e delantero Jonatahan David (Lille). Nan tin dos hungadó den divishon máksimo na Portugal, e defensa Steven Vitória (Moreirense) i e bolante Stephen Eustáquio (Paços Ferreira). Tin dos hungadó den divishon máksimo di Turkia, e bolante Atiba Hutchinson i e delantero Cyle Larin, ámbos den Beşiktaş. Bala pena menshoná e kompañero di ekipo di Leandro Bacuna, e delantero Junior Hoilett (Cardiff City). Den bolante e hóben Theo Carbeanu (Wolverhampton) ta primintí hopi pa futuro. E veterano David Wotherspoon (St. Johnstone) tin eksperensia den e liga máksimo eskoses. Nan ta bin ku un portero di eksperensia, Milan Borjan di Strea Kòrá di Belgrado.
E pais ku mas ta reforsando ta “Reggae Boyz”. Nan tin hopi potensial kandidato na Inglatera. Ya nan a inkorporá e defensa veterano Adrian Marriapa (Bristol City) ku hopi eksperensia di Liga Premier i Michael Hector, defensa den Liga Premier ku Fullham i kompañero di ekipo i di selekshon di e delantero Decordova-Reid. Leon Baily (delantero di Bayer Leverkusen) ta un di nan streanan.
Pero Jamaica tin plan mas serio. Nan ta trahando intensivamente riba 9 hungadó grandi na Inglatera. E defensa di Everton, Mason Holgate, e delantero Nathan Redmond (Southampton), e bolante Isaac Hayden (Newcastle United), tur di Liga Premier.
Ademas e delantero Demarai Gray (Bayer Leverkusen), e bolante Kemar Roofe (Glasgow Rangers) den divishon máksimo eskoses i esnan ku ta hunga den Championship riba nivel di Bacunanan, manera e defensa Max Aarons (Norwich), e delantero Andre Gray (Watford), e defensa Liam More (Reading) i e delantero Ivan Toney (Brentford). Ta kalkulá ku si Jamaica logra haña e hungadónan aki òf un gran parti di nan, nan lo bira e pais di mas fuerte den CONCACAF. Nos ta spera ku tur hende por komprondé awor di kon ‘Pantera Negra’ mester move i reforsá purá!!
