Among Us Selikor i ADC tambe ta kampion
Nos Tambe Por i Baranka kampion Torneo Survivors
WILLEMSTAD- Torneo Survivors a terminá djadumingu 26 di febrüari na Buena Vista Ballpark. Ekiponan Nos Tambe Por, Baranka, Among Us, Selikor i ADC a bira kampion den nan respektivo kategoría. Un públiko grandísimo tabata presente djadumingu pa mira e weganan final.
E wega final di e promé 4 kategoríanan a terminá ku diferensia di un kareda. Nos Tambe Por a gana Jaws 3-2 den final 60+, Baranka a derotá Jaws 50+ ku skor di 5-4, Among Us a gana Chonchi’s 18-17 i Selikor a gana SBAB ku skor di 8-7. E wega final entre ADC i SOAB a terminá ku skor di 16 pa 8 na fabor di ADC. Durante siman nos lo tin mas detaye i numeritonan di e weganan final i premionan individual.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bondia. Fin di siman kargá ku Slowpitch na Buena Vista i Van Engelen Ballpark. Na Buena Vista tabatin semi-final i final di Torneo Survivors/The Greatest, miéntras ku na Van Engelen Ballpak a start ku Amstel Bright Premier Cup. For di djabièrnè a start ku weganan di COED den Amstel Bright Premier Cup kaminda ekipo SOAB a gana Orco Bank ku skor di 11 pa 4. SBAB a pasa fásil riba Corendon ganando 14 pa 4. Farrel Steen i Rhiency Imperator a konektá homerun pa ekipo SBAB. Djasabra a sigi ku weganan di liga 50 i e otro kategoríanan.
Por stream e weganan di e kampionato ECASC
https://www.usvisoftballfederation.org
* * * * *
Ban Serio fuertemente reforsá ku entre otro Eldred Estanista i Kelvin Winklaar a gana Flamboyan/Tigers pèrtá ku skor di 5-3. Den e otro wega di Liga 50 di djasabra Jandoret Raiders riba hit di oro di Michael Melfor i picheo di Raylan’ Tutu’ Capella a laga Pitufos den tereno ku skor di 7 pa 6. Jandoret tabata ganá ku skor di 4-1 te den último inning, pero Pitufos ta bòltu skor riba homerun di Sharlon Louisa. Pèrdí ku skor di 6- 4 den nan último chèns, Jandoret ta bòltu skor pa bin gana 7-6. Maikel Melfor a konektá hit pa right nèt for di alkanse di e segunda base di Pitufos, Arthur Davelaar.
* * * * *
Kambionan a sigi den Liga 50. Ekipo Marlins lo tin dos grandi di Pitufos den 2023. E hungadónan Golbert ‘Bibi’ Gonet i Eddie Obispo. Golbert ta segunda base/infielder, miéntras Eddie Obispo por hunga den outfield i infield. Bon refuerso pa ekipo Marlins ku ta buskando picheo despues ku Michelangelo ‘Galbao’ Boekhoudt a move di Marlins pa ekipo Ban Serio. Vários kambio den ekiponan di 50+. Cedrix Valies ta bèk den ekipo Jaws. Ekipo Jaws ta pendiente di Jair Josepha ku ta den plan serio di ekipo Ban Serio.
* * * * *
Nos a tende ku tabatin agreshon kontra umpire despues di weganan Komersial na Buena Vista. Tur esnan ku ta sigi Slowpitch djaserka a lamentá e asuntu aki formal. Nos no tin masha detaye di loke a pasa. Nos no sa ku ta agreshon verbal òf físiko. By the way, van Engelen Ballpark a wanta basta awaseru djasabra i weganan a sigi. Trahando e kolumna aki den oranan tempran di djadumingu ainda nos tabata pendiente di resultadonan di e weganan di djadumingu, tantu di Buena Vista Ballpark komo di Van Engelen Ballpark.
* * * * *
Mas resultado di Amstel Bright Premier Cup. Banco di Caribe a dal Korps Politie Curacao ku skor di grandi 18 pa 5. Hershelon Juliana a dal 3 homerun pa Banco Di Caribe den e wega aki i empuhá 8 kareda. Den otro wega CITCO a dal Digicel Group 21 pa 10. CITCO un tempu super kampion di torneonan komersial i soshal tei bèk den gran forma. Nos a mira nòmbernan Alberto Rafael, Dave Janga, Andre Adriana, Raymond Leonora, Patrick Wagner, Aldrin Anastacia, ets. Nan tei den gran forma. Raymond Leonora tabata e picher ganadó pa CITCO. Un tempu tabatin nòmbernan manera Shendy Cras, Andy Nicolaas, Gwendell Sint Jago, Patrick Elisa, Stanford Landburg, Myron Clara, ets. Tempunan di gloria kaminda CITCO tabata sali kampion den maskulino i femenino di Sòftbòl Komersial.
* * * * *
Bèk pa Slowpitch. Ekipo Nos Tambe Por a gana Jaws den un wega emoshonante ku un Buena Vista Ballpark kargá ku fanátiko. Jaws tabata ganá 2-1 te den último inning i Nos Tambe Por komo ekipo di kas a logra nota 2 kareda pa bòltu e skor i hasi e wega 3-2. Jaws ta menasá embasando dos hòmber despues di dos out, pero e último batiadó ta konektá rolling pa segunda pa terminá e partido. Nos Tambe Por a bira kampion di kategoría 60+. Den kategoría 50+ Baranka dilanti 5-0 a tuma 4 kareda kontra Jaws ku a keda kòrtiku pa di dos final sigí. Baranka a gana ku skor di 5 pa 4 pa bira kampion di kategoría 50+ di Torneo Survivors. Despues a sigi otro wega hopi emoshonante i einan ekipo Among Us a gana di Chonchi’s 18 pa 17 i bira kampion di e parti Soshal Maskulino Speshal. Ketu bai ku Buena Vista Ballpark kargá ku fanátiko. Nos lo tin detaye di e otro dos weganan final den dianan benidero.
