Nos Tambe Por kontra Lions den gran final di Liga 60 djadumingu 2’or na Frank Curiel Ballpark
WILLEMSTAD- Djadumingu 23 di novèmber e gran final di Liga 60 ta start na Frank Curiel Ballpark. Ekiponan Nos Tambe Por i Lions lo topa otro den e promé wega di e seri mihó di 3 di final di Liga 60. Nos Tambe Por ta kampion di 2024 i Lions a terminá number 1 di e kampionato regular. Den e promé wega di e seri di play-off page system 1 kontra 2 ekipo Nos Tambe Por a gana pèrtá 3-1 di Lions .
Ekipo Lions a gana Nos Tambe Por den e promé buelta ku skor di 5 pa 4. Den di dos buelta Nos Tambe Por a dal Lions ku skor di 14-0. E ekiponan ta hopi pareu den bateo, picheo i defensa. Lions a dal Los Amigos durísimo djadumingu siman pasá despues ku nan a pèrdè e promé wega di play-off kontra Nos Tambe Por. Sport.cw lo transmiti djadumingu awor.
SEMIFINAL
Lions a dal Los Amigos 13-0 i klasifiká pa final di Liga 60
WILLEMSTAD – Lions ku un ofensiva di 16 hit i tremendo picheo kombiná di Gregory Martijn i Ramon Moreta, a dal Los Amigos 13-0 i klasifiká pa final di Sòftbòl Liga 60. E wega a tuma lugá djadumingu 16 di novèmber den Frank Curiel Ballpark dilanti un públiko grandi. Los Amigos ku a gana Jaws siman pasá a bati solamente 3 hit i kometé 6 eror ku a kontribuí den e derota den e semi-final. Marlon Louiza i Fernando Rosario a konektá 3 hit pa Lions den e viktoria. Djadumingu awor pa 2’or pm Nos Tambe Por ku tin un siman kaba den final lo topa ku Lions. E final lo ta un seri mihó di 3. Ke mèn, dia 30 di november lo tin wega number 2 i si ta nesesario wega number 3 ku lo tuma lugá dia 7 di desèmber. Keda pendiente pa mas informashon den kurso di siman.
NUMERITONAN
Lions a nota 13 kareda, bati 15 hit i hasi 1 eror. Picher ganadó tabata Gregory Martijn. Ela risibí relevo di Ramon Moreta ku a tira e dos último inningnan. Marlon Louisa a bati di 4-3 i Fernando Rosario a bati di 3-3 ku 4 RBI. Ernesto Priest a bati di 4-2. Fernando Rosario a konektá un homerun. Los Amigos no ta nota kareda, bati 3 hit i a hasi 6 eror. Gilbert Henrietta tabata e picher pèrdèdó. Ela risibi relevo di Donald Balentina. Norman Sloop , Renato Anasagasti i Richard Coffie a bati di 2-1.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia i felis wikènt. Djadumingu awor (231125) ta start ku final di Liga 60 na Frank Curiel Ballpark. Lo hunga e promé wega di e seri mihó di 3 entre ekiponan Nos Tambe Por i Lions. No masha deporte pa loke ta trata Sòftbòl e dianan aki. Desishon a kai pa loke ta e apelashon riba e protesta ku ekipo Fenix a file kontra di Pichingolo. Ekipo Pichingolo mester a usa un coach ineligibel, Fenix a pèrdè e protesta den promé instante pero a apelá. Nan a pèrdè den apelashon i nan a bai arbritrahe i Sòftbòl Femenino Fastpitch Dòbel A su playooff ta bai wanta un ratu.
* * * * *
Torneo Dimi tin un torneo diananq 5,6 i 7 di desèmber den Stadion Post 6. Ekiponan komersial, soshal i di bario ya a kuminsa mèldu serka Johnny Isabella i crew. Pa otro aña Torneo Boy Constancia lo tei atrobe. Plan ta pa e torneo tuma lugá na diferente parke na Kòrsou i bai terminá de Stadion Post 6. Den luna di desèmber nos lo bini ku mas detaye di Torneo Boy Constancia organisá pa Pitufos ku Archie Davelaar komo motor di e torneo. Nos ta bolbe skibi ku djadumingu awor ta kandela tin na Frank Curiel Ballpark na momentu ku ekipo nan Nos Tambe Por i Lions topa otro den final di Liga 60. Nos tin un artíkulo pa promové e gran final aki i ta spera basta fanátiko. Basta Yu di Kòrsou bibá na Hulanda na Frank Curiel Ballpark djadumingu pasá. Entre otro Pietje Martina, Mayan Lucas, Tetel Steba i vários hungadó mas. E aña aki tabatin homenahe na Mayan Lucas ku tin riba 40 aña pichando Slowpitch.
* * * * *
Pabien, pabien, pabien na Kòrsou i selekshon di Kòrsou ku e hazaña di djamars último kaminda nos a klasifiká pa Mundial FIFA 2026 ku lo tuma lugá na Canada, USA i Meksiko. Un kos inkreíbel kon deporte por uni nashon, tur hende hende kantando, bailando i elogiando nos selekshon. Mesora nos a kibra un rèkòrt tambe birando e pais ku ménos habitante ku ta klasifiká pa un Mundial di Futbòl ku nos 150 piku mil habitante. Nos a yega Mundial den e di 4 intento. Kòrsou a bira pais outónomo den Reino na òktober 2010 i na mart 2011 nos a keda aseptá pa bira miembro di FIFA. Nos a bai eliminatorionan pa Mundial 2014, 2018 i 2022 i den nos di kuater intento nos ta logra. Tene kuenta ku nos ta skibi di selekshon di Kòrsou i no selekshon di Antia. Un selebrashon total djarason pasando den kayannan di Kòrsou di aeropuerto pa Waaigat. Masha hopi hende mes mester haña elogio, hungadónan i staf tékniko, direktiva aktual i direktivanan anterior. Pabien naturalmente na fanátikonan i pueblo di Kòrsou. Pabien tambe na Jean Fransisca ku a bini ku e soño aki den añanan 2000 i a mira e kos aki posibel for di aña 1974 ku ela bai wak un wega di Mundial na edat di 27 aña.
* * * * *
E aña por bira un temporada ku tur liga ta kaba promé ku desèmber. Nos no ta kòrda for di kua aña no tabatin un liga ku a kaba desèmber. Aña pasá Liga 40 a terminá den desèmber. E liga a terminá kayente ku un tremendo bataya entre Baranka i Cicoza. Lástima ku den 2025 no tabatin kampionato. Bèk den tempu nos tin algun informashon di desèmber 2002 pa abo, lesadó, sa ku tur tempu tabatin Sòftbòl Slowpitch den desèmber. Na desèmber 2022 tabatin final entre Bou di Palu i Armendares den stadion Post 6, final bálido pa Liga Un i Tur. Riba mesun fechanan tabatin weganan entre Buena Vista Power i Domi na Sam Bunting Ballpark e tempu ei. Buena Vista Power ku hopi hungadó di Bou di Palu. Na 2002 hungadónan manera Kenny Hellement i Rubelyn Nicasia a bini bèk for di estudio na Hulanda i a djòin nan ekipo di trabou ku ta Douane. Rodney Riley a kuminsá traha na SVB I hasi e ekipo aki fuerte den Intergubernamental. Aña 2002 un dje super batiadónan di Sòftbòl Slowptich Eric Senior a fayesé. Un dje grandinan i tata di Ericson Senior ku ainda ta aktivo den Slowpitch. Nos ta keda te aki. Te mayan ku Poder di Dios.
