Nos Tambe Por ta dal Lions durísimo 14-0 i klasifiká na di dos lugá último fecha di buelta regular awe i final Beisbòl 50
WILLEMSTAD - Nos Tambe Por ku tremendo picheo di Willem ‘Wim’ Felicia i bateo barbaro a dal Lions ku skor di 14-0 djadumingu último na Frank Curiel Ballpark. Pichernan Wim Felicia i Michelangelo ‘Galbou’ Boekhoudt a kombiná pa un no hit no run kontra di Lions. Promé ku e wega Lions tabata invikto i ku rekòrt di 12 ganá i 0 pèrdí.
Nelly Jakoba i Pursey Schoop tabata tremendo na bate bayendo di 3-3. Nos Tambe Por a konektá 16 hit kontra di Fernando Rosario ku a keda relevá pa Heinrich Wever ku no a tuma hit ni kareda, pero ya e daño tabata hasi. Ku e viktoria aki Nos tambe Por ta klinch e di dos lugá i Lions ta keda na promé lugá i lo finalisá na e puesto ei debí ku nan a sigurá e puesto for di 2 siman pasá. Den otro wega Los Amigos a gana Jaws den un wega pèrtá ku skor di 2-0. Nos Power a gana Mon Repos Sluggers 7-3. Standing faltando un djadumingu pa terminá e buelta regular ta Lions 12-1, Nos Tambe Por 10-3, Los Amigos 10-4, Jaws 8-5, Pitufos 5-8, Nos Power 5-9, Mon Repos Sluggers 3-10 i Curacao Super Stars 0-13. Weganan di djadumingu awor ta 11.00 Lions vs Jaws, 13.00 Pitufos vs Curacao Super Stars i 3’or Nos Tambe Por vs Mon Repo Sluggers. Playoff ta start normal 9 di novèmber ku weganan entre number 1 vs 2 i 3 vs 4.
Nos Tambe Por 14, Lions 0
Nos Tambe Por a dal 16 hit i a hasi 4 eror. Willem Felicia tabata e picher ganadó. Pursey Schoop i Nelly Jakoba a bati di 3-3.
Lions no a dal hit i nan a kometé 3 eror. Fernando Rosario tabata e picher pèrdèdó.
Los Amigos 2, Jaws 0
Los Amigos a konektá 7 hit i a hasi 2 eror. Donald Balentina tabata e picher ganado. Marlon Winklaar, Norman Sloop i Rignald Floranus a bati di 2-1.
Jaws a bati 7 hit i no a kometé eror. Riley Toppenberg tabata e picher pèrdèdo. Maichiel de Roon a bati di 3-2 Elvin Regina di 1-1.
Nos Power 7, Sluggers 3
Nos Power a dal 11 hit i hasi 5 eror. E veteranisimo Higor Kirchner tabata picher ganadó. Danchelo Moesker a bati di 2-2, Elton Richardson tambe a bati di 2-2.
Mon Repos Sluggers a bati 5 hit i hasi 1 eror. Ushley Kirindongo tabata e picher pèrdèdó i Wendell Isidora a bati di 3-2.
Santa Rosa Royals kontra Wak e Kos den gran final di Beisbòl 50+
WILLEMSTAD- Santa Rosa Royals lo topa ku Wak e Kos djadumingu 1’or na Vi Jansen Ballpark. Ganadó di e wega aki lo bira e kampion nobo di Liga 50 den Beisbòl Veterano. Santa Rosa Royals a gana di Jandoret Raiders 6-4 i Wak e kos a dal Volcano 16-6 den e semifinal dos siman pasá. Ta spera un final pèrtá entre e dos ekiponan aki ku a topa otro na dos okashon durante buelta regular. Den e promé wega den buelta number 1 Wak e Kos a gana 11-7 despues ku nan tabata pèrdí 7-0 den e promé inning. Den di dos buelta Santa Rosa Royals a derotá Wak e Kos 5-3. Asina e direktiva nobo ta kaba e temporada 2025 eksitosamente. E direktiva enkabesá pa Ruisandro Cijntje ya a anunsiá ku nan lo no tei pa temporada 2026. Fin di novèmber lo tin elekshon pa direktiva nobo i e direktiva aktual ta pidi miembronan interesá pa postulá pa bai okupá pa un puesto den e direktiva nobo debí ku esnan aktual lo baha kompletu.
MAS INFORMASHON DI BEISBOL I SÒFTBÒL I BEISBÒL
Fanátikonan di Deporte Kòrsou bon dia i felis wikènt. Liganan 50, Beisbòl Veterano i Liga di Nos Tur a terminá wikènt pasá i ta pendiente di desaroyonan den Liga 60 ku ta e úniko Liga ku ta moviendo i pa kolmo no a start ku playoff ainda. Dia 9 di novèmber playoff di Liga 60 mester start na Frank Curiel Ballpark. Ekipo Los Amigos òf vários hungadó di ekipo Los Amigos lo move pa Colombia. Los Amigos ta den klasifikashon òf mihó bisá a klasifiká pa loke ta trata Liga 60. Ekiponan ku a klasifiká ta Lions, Nos Tambe Por, Los Amigos i Jaws. E manera ku playoff lo bai ya ta konosí kaba, Lions ku lo terminá number 1 lo topa ku Nos Tambe Por ku a terminá number 2. Ekipo Los Amigos number 3 lo enfrentá Jaws ku lo terminá number 4. Ekiponan Pitufos, Nos Power, Mon Repos Sluggers i Curacao Super Stars no klasifiká. Pa temporada 2026 Baranka lo bolbe inskribí pa purba drenta Liga 60 pa di 3 biaha.
.
• * * * * *
Awe nos lo para ketu tambe na Liga 60 ku ta e úniko Liga ku ta moviendo apesar ku tin algun torneo aki i aya. Por ehèmpel ekipo Dimi tin un torneo ku lo tuma lugá dianan 5,6 i 7 di desèmber. Ekipo Nos Tambe Por tin un torneo entre ekiponan di Liga 50 i Liga 60 den luna di desèmber. Pa novèmber no tin masha torneo i ta Liga 60 so lo move.E mini-torneo di Nos Tambe Por lo ta entre ekiponan di Liga 50 i Liga 60. Ekiponan di Liga 50, number 1 te ku 4 lo topa ku ekiponan 1 te ku 4 di Liga 60. E torneo lo tuma lugá na Frank Curiel Ballpark i e fechanan no ta konosí ainda. Pa komienso di otro aña lo tin e tradishonal torneo Amstel Bright organisá pa ekipo Cicoza, pa despues sigi ku Torneo Hope. Kopa ABC&S di 50+ lo tuma lugá na Van Engelen Ballpark den 2026. Ekipo Jandoret Raiders ya a risibí invitashon pa partisipá na e torneo ku e meta naturalmente pa sigi partisipá na e prestigioso torneo aki. Ekipo Ban serio tin basta aña sigi kampion di Dutch Caribean.
Djadumingu awor lo tin e final di Liga 50 kaminda lo entregá trofeo na e kampionnan di Liga 50 di aña 2024 i 2025. Ekipo Santa Rosa Royals lo topa ku Wak e Kos djadumigu awor 1’or na Vi Jansen Ballpark. Ekipo Jandoret Raiders no a logra yega final despues ku nan tabata den final pa 7 temporada sigi. E wega entre Wak e Kos i Santa Rosa Royals lo bira un wega difísil pa pronostika. Santa Rosa Royals su parti fuerte ta su picheo mientras ekipo Wak e Kos tin bon bateo. Santa Rosa Royals su picheo ta enkabesá pa Orsendo Clemencia ku tabata tremendísimo kontra di Jandoret Raiders. Santa Rosa Royals tin otro bon pichernan manera Momon Martina, Raimy Cicilia, Fisel Pereria, Geronimo Daflaar i Adelberg Martha. Wak e Kos tin Eldred Estanista, Luigi Yanez, Skippy Sambo i Byron Kook. Probablemente Byron Kook i Eldred Estanista ta dos picher ku sigur Wak e Kos lo bai usa riba e fecha final ku ta djadumingu awor.
• * * * * * *
Ekipo Suffisant Eagles resientemente e kumpli 25 aña di eksistensia i tabasta un torneo super eksitoso ku a tuma lugá na Sam Bunting Ballpark na Brievengat. A honra vários personal ku a nifiká masha hopi pa e organisashon .Ekipo Dominator a bira kampion di e torneo. Ekipo Suffisant Eagles tabata masha agradesido na Fanatasy Arts ku a kopera ku e torneo. Den nos edishon di djasabra nos lo tin mas di e torneo kombiná ku algun potret. Resientemente nos a skibi ku na 2026 e Dutch Caribbean di 60+ lo tumá lugá na Hulanda. Tin moveshon tambe pa e ekipo di Hulanda Koala Bears organisá e torneo na Kòrsou mes. By way the way djabièrnè tabatin apertura di kampionato di Little League 2025/2206. Pa promé biaha lo tene apertura di tur liga huntu entre otro Pariba, Pabou Willemstad, Liga Soraida Juliana i Challengers Little League. E kampionato ta dediká na Sixto Laker i Nidia Daal. Nos ta keda te aki pa awe, te djaluna ku Poder di Dios.
