Nos Tambe Por ta gana Lions 3 pa 1 pa pasa pa final di Liga 60 playoff semifinal djadumingu entre Lions i Los Amigos
WILLEMSTAD- Nos Tambe Por ku bon picheo di Michelangelo ‘ Galbao’ Boekhoudt i bateo oportuno den nan último chèns na bate ta gana Lions ku skor di 3 pa 1 pa pasa pa final. Nos Tambe Por tabata pèrdí ku skor di 1 pa 0 te den kabes di e di 7 inning, pero ta skor 3 kareda den kabes di e di 7 inning.
Den e otro wega di play-off e wega di 3 kontra 4 ekipo Los Amigos ku bon bateo i picheo kombiná di Hubert Gomez i Donny Balentina a dal Jaws 8 pa 1. Djadumingu awor pa 2’or pm ekipo Lions lo enfrentá Los Amigos den un wega di play-off. Ganadó di e wega ei lo topa ku Nos Tambe Por den un final seri mihó di 3 ku lo start dia 23 di novèmber.
Teksto pa pòtrèt:
Nos Tambe Por den final di Liga 60 despues di viktoria di 3 pa 1 riba Lions.
Lions lo topa ku Los Amigos den semi-final djadumingu awor 2’or na Frank Curiel Ballpark.
Los Amigos ku viktoria impreshonante riba Jaws djadumingu den play-off 3 kontra 4.
Jaws supkampion di 2024 i kampion di 2022 i 2023 a keda eliminá.
Fanátikonan di Deporte Kòrsou bon dia i wikènt. Fin di siman pasa ku no masha aktividat riba tereno di Sòftbòl Slowpitch, pero si Liga 60 na Frank Curiel Ballpark. Djadumingu tabata e promé fecha di play-off di Liga 60 . Weganan tabata 11’or di mainta i 2’or di mèrdia entre ekiponan Jaws, Los Amigos, Nos Tambe Por i Lions respektivamente. Los Amigos a gana Jaws 8-1 I Nos Tambe Por a derotá Lions 3-1. Fanátiko i hungadónan di Baranka a keda di bai wega p’asina kuminsá kustumbrá ku e liga. Nos a skibi djabièrnè último na final di e kolumna ku Baranka a keda aseptá pa drenta Liga 60. Un ekipo di kasi 40 aña ku hopi historia den Sòftbòl Slowpitch. Ekipo fundá pa entre otro George ‘Joy’ Alberto (QEPD).
* * * * *
Baranka sigur lo trese fanátiko i yuda engrandesé e liga. Naturalmente algun ekipo lo preokupá ku nan lo pèrdè algun hungadó, pero segun nos tin regla pa loke ta trata ekiponan nobo ku drenta den e liga. Liga 60 ta trahando duru riba nan statutonan pa e liga ta mas organisá. E direktiva ta enkabesá pa Urvin Martina ku den 2026 lo debutá ku Baranka den e liga. Sendley Reina, Jerson Beaumont, Siegfried Lopez i vários otro mas lo pasa pa Baranka, pendiente di Edmar Cornelia i Gregory Reina ku lo debutá den 2027. E hungadónan menshoná por kuminsá partisipá na torneonan komo hungadó di 58 i 59 aña.
* * * * *
Sòftbòl Femenino semi-final Dòbel A a sigi djasabra anochi na Sam Bunting Ballpark ku wega entre Fenix i Pichingolo. Promé wega tabata dramátiko kaminda ekipo Pichingolo a gana ku skor di 2-1 den extra inning, inning number 8 .Den Klase A tambe Pichingolo a pika dilanti ganando ku mesun skor ku e wega di Dòbel A. Bon públiko pa mira e weganan ku ta di nivel hopi haltu. Direktiva di Curacaose Softball Bond ta hasiendo nan máksimo esfuerso pa hiba e Sòftbòl bèk manera hopi aña pasá. E direktiva ta enkabesá pa Fenton Thomasita. Ku e semifinal empatá na 1 a surgi protesta i despues apelashon. Semifinal ta wanta ta proksimo aviso.
* * * * *
Ekipo Dimi, ekipo fundá pa Johnny Isabella den kuadro di nan selebrashon di 40 aña, ta organisá un torneo dianan 5,6 i 7 di desèmber. Nos ta pendiente di mas detaye di e torneo aki. E ekipo lo biaha yüli 2026 pa Hulanda pa hunga algun wega i tambe nan lo bai Spaña pa hunga algun wega aya tambe. Ekipo Nos Tambe Por tambe ta pendiente pa un torneo, pero esaki ta un dia so na Frank Curiel Ballpark, kaminda ekiponan di 50+ lo topa ku 60+. Intenshon ta pa ekiponan ku a terminá number 1 te ku 4 di e liganan menshoná kompetí kontra otro. E torneo lo tuma lugá despues ku kampionato Liga 60 terminá.
* * * * *
Probablemente Liga 60 lo hunga un buelta i mei den 2026 p’asina terminá mas tempran. Tur ekipo di e liga lo hunga 12 wega pa despues start ku play-off. Aña 2026 lo tin 9 ekipo den e liga despues ku Baranka a keda asepá. Nos ta kere ta bon pa direktiva evaluá òf pone na votashon pa wak si por laga mas ekipo klasifiká. E kompetensia ta keda fuerte te na e último dos fechanan di kompetensia. E aña aki ya faltando un luna tabata konosí ku ekiponan Lions, Nos tambe Por, Los Amigos i Jaws a klasifiká. Ku 9 ekipo por laga 6 ekipo klasifiká i laga 6 hunga kontra 5 pa despues e ganadó ei lo bai topa 4. Despues por sigi ku e play-off manera ta kustumber. Dimés e ganadó entre number 5 i 6 lo mester hunga djasabra i djadumingu òf riba mesun fecha. Den torneo tantu lokal komo riba nivel ABC òf Dutch Caribbean ekiponan ta hunga dos wega riba un dia.
* * * * *
Beisbòl Dòbel A último añanan ta laga mas ku 4 ekipo klasifiká, den e kaso ei 5 ekipo ta klasifiká. Beisbòl Veterano ta laga 6 ekipo klasifiká den un kampionato di 8 ekipo. Kompetensia basta kayente te final di buelta regular. Liga 50 ku tin 10 ekipo ta laga 7 ekipo klasifiká. E formato a resultá un éksito rotundo. Ekiponan di Liga 50, pensé. Fenix a gana Pichingolo djasabra pa empatá e seri. E wega number 3 di e seri a keda posponé debí na apelashon. Nos ta keda te aki pa awe. Te mayan ku Poder di Dios.
