Nos Tambe Por ta gana Lions 9-5 i pika dilanti den play-off final 60+ i wega number 2 djadumingu 2'or
WILLEMSTAD – Nos Tambe Por ku picheo kombiná di Willem Felicia i Michelangelo ‘Galbao’ Boekhoudt a gana Lions ku skor di 9-5 i pika dilanti den play-off final di Liga 60. Pursey Geertruida, primera base di Nos Tambe Por a bati di 3-2 ku un homerun i 4 kareda empuhá den e ofensiva bárbaro di ekipo Nos Tambe Por. Un públiko grandi tabata presente pa mira e promé wega di e final di Liga 60.
Lions tabata atras 9-1 te den di 5 inning, pero a nota 3 kareda den di 5 inning i 1 kareda den 6 inning pa yega serka, pero a keda kòrtiku. Ekipo Lions a usa nan mihó pichernan ku ta Gregory Martijn ku a habri e wega sigí pa Fernando Roario ku a relevé den di 3 inning i tira 4 inning kompleto sin tuma kareda. Wega number 2 di seri final lo ta djadumingu awor pa 2’or na Frank Cuirel Ballpark.
NUMERITONAN
Nos Tambe Por a nota 9 kareda, dal 9 hit i hasi 3 eror. Willem Felicia tabata e picher ganadó. Pursey Geertruida i Payo Gabriel a bati di 3-2. Payo Gabriel a empuhá 3 kareda i Pursey Geertruida a ampuhá 4 kareda. Winston Kirindongo i Jurgen Lichtenberg a bati di 2-1. Pursey Geertruida a dal un homerun.
Lions a konektá 8 hit i kometé 6 eror. Gregory Martijn tabata picher pèrdèdó i Ludwig Mathilda a bati di 3-2. Lyndon Lourens di 2-1- Fransje Lambertina, Marlon Louisa i Heinrich Wever tambe di 2-1.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia i felis wikènt. Nos ta den e último siman di novèmber pa drenta luna di dèsember, luna di hopi moveshon na Kòrsou i rònt Mundu naturalmente. Ketu bai videonan ta drenta di momentunan tremendísimo i inolvidabel kaminda Kòrsou a klasifiká pa Mundial i e resepshon formidabel ku tabatin. Kada un video ta yena nos ku hopi emoshon i dado momentu bo ta baha man na wak e videonan pa no tin mester di yora atrobe. Kòrsou ta grandi mes mes i for di aworaki despues ku nos a selebrá kasi un siman mester kuminsá prepará pa bai Mundial. Dia 5 di dèsember tin e lòt na Washington pa sa kua ekipo ta bai kai den e respektivo pulnan. E sedenan òf mihó bisa e stadionnan kaminda e ekiponan lo bai hunga si no ta bira konosí ainda. Segun nos apertura i final si lo ta konosí, esei naturalmente segun nos.
* * * * *
Rekordatorio pa ekiponan tene kontakto ku Johnny Isabella pa torneo Dimi ku lo tuma lugá dianan 5,6 i 7 di dèsember den Stadion Post 6. Nos Tambe Por tabata pendiente pa e torneo sera aña entre ekiponan di 50 i 60+ ku lo tuma lugá djasabra 13 di dèsember. Nos ta keda pendiente di mas informashon di e torneonan ariba menshoná. Ta yegando fin di luna i ta pendiente pa e desaroyonan den Beisbòl Veterano kaminda lo mester eligí un direktiva nobo. Promé ku Ruisandro Cijntje i Wimbert Hato a drenta tabatin mas grupo òf dirigente pendiente pa drenta den Beisbòl Veterano.
* * * * *
By the way, nos a risibí un komunikado di BEVEKO kaminda nan ta skibi ku e reunion a keda manda pa un siman despues. E fecha di e reunion lo bira djaweps 4 di desèmber pa 7’or pm na SSK. Intenshon ta pa e reunion dura un ora i mei i terminá 8.30’or pm . Puntonan di agenda ta relato finansiero di 2025, elekshon pa direktiva nobo i turno liber. BEVEKO ta hasi un petishon èkstra pa tur ekipo manda un representante pa e reunion hopi importante aki pa kontinuashon di Beisbòl Veterano den 2026. E reunion aki mester a tuma lugá djaweps 27 di novèmber i a keda manda un siman despues. Mester kuminsá mobilisá debí ku último añanan Beisbòl Veterano ku tabata 13 ekipo a bira solamente 8 ekipo. Straño ku por pasa, e interes pa hasi e deportenan Sòftbòl i Beisbòl a move bai pa 50+ i 60+. Manera ta konosí Sòftbòl Liga 60 ku tabata 8 ekipo lo bira 9 ekipo den 2026. Ekipo Baranka a keda aseptá durante reunion entre ekiponan pa drenta e liga.
* * * * *
Liga 50 di Beisbòl mester a krese formal, pero di un manera òf otro e liga a keda na 5 ekipo. Nos a bai bèk den tempu pa loke ta e promé kampionato di Beisbòl 50+ ku a tuma lugá na 2017. Jandoret Raiders ku bon picheo di Clifton Ijziek ta bira kampion Beisbòl Veterano Liga 50 djadumingu na Vi Jansen Ballpark na novèmber 2017. Un bon públiko tabata presente pa mira e gran final di 50+ ku pa promé biaha a hunga un kampionato di Beisbòl. Jandoret ta sali nota 2 kareda komo ekipo di kas den bòm di promé inning kontra e habridó di Yesterday Erwin Curial. Yesterday ta kontestá ku un kareda den di 3 inning. Jandoret ta bai ariba 4-1 i den último oportunidat, Yesterday ta embasá dos koredó i logra nota un kareda. Renato Anasagasti a tira e último inning i saka tres out pa kaba ku e menasa di Yesterday. Marvin ‘Pin’ Wijman tabata bon den defensa komo shortstop di Jandoret 50+ henter e wega i sigur den e último inning. Fitsgerald ‘Lali’ Pieter a tira e último inning pa Yesterday. Despues di wega sra. Zinhagel a entregá e kopa rotativo Modesto Zinhagel na e ekipo Jandoret Raiders. Nos ta kòrda ku Liga 50 tabatin un Kopa Rotativo Modesto Zinhagel, tremendo picher ku a fayesé riba tereno di Beisbòl na Vi Jansen Ballpark. Nos Tambe Por a gana Lions 9-5 i pika dilant den playoff den Liga 60. Nos ta keda te aki pa awe i te mayan ku Poder di Dios.
