Nos tambe Por ta pika dilanti den play-off final 60+
WILLEMSTAD - Nos Tambe Por ku picheo di Wm Felicia i homerun di Shaki Coffie a gana Jaws 3 pa 1 i pika dilanti den play-off final. Den último inning ku e wega empatá na 1, Shaki Coffie a dal homerun pa left ku un koredó na base pa laga Jaws den tereno. Den e wega entre Famia Schoop, Jonathan Schoop i amigunan, famia Schoop a gana Nos Power 5-4 ku bon bateo di Jair Josepha. Djadumingu awor 2’or tin wega number dos di e gran final.
NUMERITONAN
Nos Tambe Por 3 , Jaws 1
Nos Tambe Por a konektá 6 hit i nan a hunga sin eror. Willem Felicia tabata picher ganadó,. R. Coffie a bai di 3-2. Norwin Moesquit, Emile Haswell, Edson Sophia ku Willem Felicia, tur a bai di 2-1. Pa Jaws 8 hit ku 2 eror. Frensel Martinus a resultá pèrdèdó. Rudsel Paulina a bai di 3-2. Johannes Curie ku Rubio Kook, ámbos a bai di 2-1. Giovanni Toppenberg ku Elvin Regina a bai di 1-1, ámbos. Rudsel Schmidt ku Rudsel Esclodina, tur 2 a bati di 3-1.
