Nos Tambe Por ta swip Lions i bira kampion Liga 60+
WILLEMSTAD- Nos Tambe Por a gana ekipo Lions i bira kampion Liga 60+ djadumingu dilanti un públiko grandísimo den Frank Curiel Ballpark. Michelangelo ‘Galbao’ Boekhoudt a tira wega kompletu pa Nos Tambe Por i bira MVP di e final. E wega number 2 di e seri final a terminá ku skor di 4-1, wega number 1 tabata dia 23 di novèmber i Nos Tambe Por a gana 9-5. Galbao Boekhoudt a relevá wega number 1 tirando dos inning i a tira wega number 2 kompletu (7 inning). Despues di wega tabatin entrega di premio individual i di ekiponan.
Fanátikonan di Deporte Kòrsou, bontardi i felis fin di siman. Nos a drenta desèmber i ta masha poko aktividat di Sòftbòl Slowpitch ta bai tin den e luna aki. Na masha hopi okashon nos a bisa ku despues di basta aña tur liga ta terminá promé ku desèmber. Nos Tambe Por a gana Lions i bira kampion di Liga 60 di 2025. E final a tuma lugá djadumingu 30 di novèmber 2025. En todo kaso e luna aki nos ta pendiente pa e resumennan tambe di Sòftbòl Slowpitch i Beisbòl pa loke ta trata 2025. Nos tin tur e kampionnan di tantu liga komo torneonan.
Gregory Martijn (Lions) 7-0 kampion picher, Lucho di Wind ta tuma premio.
* * * * *
Selekshon di Kòrsou ta na Juegos Bolivarianos i a termina 1 ganá i 4 pèrdí. Nos a gana medaya di brons ku e rèkòrt menshoná. Nos a wak e weganan via You Tube. Alexander Macaja ta na Peru komo miembro di direktiva di FDOK. Macaya a konta nos ku Peru ta un lugá bon desaroyá. Lima tabata druk druk djasabra (291125) anochi kaminda Flamengo a gana di Palmeira 1-0 den final di Kopa de America. Lima, tabasta lata lata i e stadion Monumental di Lima tabata kargá ku Brasilero. E stadion por tuma te 80.000 fanátiko. E selekshon ta bou di direkshon di Sorick Liberia ku ta debutá komo manager di selekshon.
* * * * *
Wikènt benidero tin e torneo den kuadro di selebrashon di 40 aña ekipo Dimi den Stadion Post 6. E sigiente wikènt ekipo Nos Tambe por tabata pendiente pa organisá un torneo entre ekiponan di 50 i 60 pa sera aña. Ekipo Dimi, un dje gran ekiponan den añanan 80 i algun aña den 90. Tempu bon di Sòftbòl Maskulino Fastpitch. By the way, moveshonnan ta sigi pa ekiponan di Liga 60 hunga e Dutch Caribbean na Hulanda. Parse ku tin hopi interes di ekiponan di Aruba pa hunga na Hulanda den luna di ougùstùs 2026. Tabatin rumor ku ekipo Koala Bears lo organisá e torneo na Kòrsou na Frank Curiel Ballpark. Koala Bears ta e ekipo dirigí pa Ron Stewart ku ta representá Hulanda den e Dutch Caribbean di 60+. Nan tabata presente na 2024 na Hulanda i na 2025 na Aruba.
* * * * *
Little League a sigi move i fin di siman tabata e último weganan di Little League pa loke ta trata kampionato 2026 ku a start den 2025 aki den luna di òktober na Sixto Laker Ballpark aya na Montab. Liga Pabou a hunga su último weganan i wikènt benidero lo tin algun wega, pero ta trata aki di weganan ku a keda suspendé pa un òf otro motibu. Weganan di play-off lo ta muchu mas tempran e aña aki. Senior lo hunga dianan 27, 28 i 29 di mart. Junior di 24 pa 29 di mart, Intermediate ku ta di 20 di febrüari te ku 1 di mart. Minor ta 26 pa 28 di mart. Little League ta hunga di 7 pa 12 di aprel 2026. Torneo FABB ta sigi normal den luna di yanüari na Van Engelen Ballpark. Kampionato di Karibe di Senior League lo ta na Kòrsou den luna di yüni.
* * * * *
Informashonnan di kambionan den Beisbòl Dòbel A ta hopi wantá e aña aki kompará ku añanan anterior. Wild Cats kampion di 2025 a kuminsá sera nan kurá i ta rumbo pa otro título den 2026. Ekiponan ku lo ta serka naturalmente ta Royal Scorpions, Santa Rosa i Santa Maria atrobe. Groot kwartier Stars i Marchena lo mester lucha pa di 5 òf di 6 lugá. Tene kuenta ku Kwartier tabata den e 4-nan na 2024 i Marchena for di 2018 a logra drenta den e promé 4-nan. Nos ta keda te aki pa awe i te mayan ku Poder di Dios.
