Nos Tambe Power i Los Amigos ta klasifika i lo topa den semifinal Dutch Caribbean Master 60+
WILLEMSTAD- Ekiponan Nos Tambe Por i Los Amigos a klasifika den gran forma pa e semifinal di e Dutch Caribbean Master 60+ ku a start djaweps na hermana Isla Aruba. Djadumingu pa 9.30 am ta Nos Tambe Por kontra Los Amigos i despues Decos lo enfrentá Surprise pa 11or am.
Ke men dos ekipo di Kòrsou lo topa otro i despues dos ekipo di Aruba. Ku otro palabra e gran final lo ta entre Kòrsou i Aruba. Nos tin resultadonan di e weganan ku a tuma lugá djadumingu siman pasa na Kòrsou den 60+. Los Amigos Lions a gana 9-0. Jaws a gana Curacao Super Stars 4-0 i Pitufos a gana Nos Power 4-0. 12 ekipo a partisipá na e torneo.
Ta trata di Nos Tambe Por (Kòrsou), Glovers (Aruba) i Bonaire Stars (Boneiru), Los Amigos (Kòrsou), Boomerang (Aruba), Sint Maarten Tigers (Sint Maarten). Lions (Kòrsou), Decos (Aruba), Koala Bears (Hulanda). Mon Repos Sluggers (Kòrsou), JT Tigers (Aruba) i Surprise (Aruba). Ekiponan ta parti den 4 pul di 3 tim. Solamente number 1 di kada pul a bai semi-final. Semi-final i final ta djadumingu 5 di òktober. Weganan ta di dia 2 pa 5 di òktober na Flatstone Ballpark.
RFESULTADONAN 60+ KÒRSÒU
Lions 9, Los Amigos 0
Lions a dal 11 hit i hasi 1 eror. Fernando Rosario tabata e picher ganadó. Herbert Lucas a bati di 3-2. Fernando Rosario di 1-1. Los Amigos a dal 6 hit i hasi 3 eror. Norman Provence a resultá e picher pèrdèdó. Candido Adamus i Renato Anasagasti a bati di 2-2.
Jaws 4, Curacao Super Stars 0
Jaws a dal 8 hit i hasi 1 eror. Machiel de Roon a bati di 4-2 i Kenneth Obispo a bati di 2-2. Riley Toppenberg tabata e picher ganadó. Curacao Super Stars a dal 4 hit i kometé 2 eror. Rignald Hariquez tabata e picher pèrdèdo. Hermenegildo Matheu a bati di 1-1. Elvis Halmeyer tambe di 1-1.
Pitufos 4, Nos Power 0
Pitufos a dal 5 hit i hasi 1 eror. Raymond ‘Veteranisimo’ Faries tabata e picher ganadó. Sharlon Louisa i Felip Osepa a bati di 2-2. Nos Power a bati 5 hit i a kometé 5 eror. Elton Richardson tabata e picher pèrdèdó. Frensel ‘Jo’ Martina a bati di 2-2.
Fanátikonan di Deporte Kòrsou, bon dia i felis siman. Na promé lugá nos ke manda palabranan di kondolenisa na famia i amigunan di Norwin ‘Sor’ Moesquit ku a bai sosegá djaweps 2 di òktober. Sor tabata malu, pero nos tur a pensa ku Sor lo a bira bon. Sor a drenta hospital den luna di mei 2025 i tabata rekuperando. Un superstar shòrtstòp for di Little League te den Dòbel A i a hunga den kasi tur selekshon di su edat. Un dje pokonan ku a keda un estrea foi chiki te den Liga 60 ku hugádanan inkreibel. Un dje pokonan ku tabata destaká ainda den Liga 40 di Beisbòl Veterano na edat di riba 60 aña. Un hungadó dediká ku ta train serio i ta hunga futbòl tambe den gran forma foi chiki. Un leyenda den e deporte Beisbòl ku no a retirá i te den mei 2025 tabata pone pelíkula ku su defensa, bateo, spit, brasa, konosementu di wega. Sor ta un dje bon umpirenan ku nos tin den e grupo The Greatest ku último tempunan ta dirigí weganan di Sòftbòl Soshal i Sòftbòl Slowpitch.
* * * * *
Nos tabatin un artíkulo ku vários pòtrèt di Norwin ‘Sor’ Moesquit den e edishon di ayera. Ban mesora pa play-off di Beisbòl Veterano a start djasabra na Vi Jansen Ballpark. Ekipo Otrabanda ku a terminá number 5 a topa ku Broncos ku a terminá na di 6 lugá. Broncos a dal Otrabanda duru 12-2 i lo topa ku Santa Rosa Memories ku ta number 4. E wega aki lo ta djadumingu 2’or. Liga 50 ta sigi djadumingu ku dos wega. Pa 9.30 am Jandoret Raiders lo topa ku Santa Rosa Memories i despues pa 11.15’or Volcano lo topa ku Otrabanda. Tin tur indikashon ku ta Wak e Kos a terminá na promé lugá i lo topa ku sea Volcano òf Otrabanda ku lo terminá number 4.
* * * * *
Nos resultado di e último wikènt di buelta regular di BEVEKO ku ta Beisbòl Veterano Kòrsou di Liga 40, Azucar a gana Marlins 5-4. Van het Kruys a gana i Nathaniel Girigorie a bati di 3-2. Shanon Kleinmoedig tabata e picher pèrdèdó pa Marlins. Yesterday a gana Quality Stars relatívamente fásil 8-1. Un viktoria ku skor grandi ku a sorprendé tur hende. Zhurendell Ilaria ku su kambionan di velosidat a dominá Quality Stars kompletu. Dayron Puriel tabata picher pèrdèdó pa ekipo Quality Stars. Ku e viktoria aki a bini tripel empaté entre Quality Stars, Santa Maria i Yesterday. Johnny Balentina a bati di 2-1 pa ekipo Yesterday. Saludo pa Yubi Evertsz fundadó di Yesterday. Djasabra nos a kòmbersá bastante riba desaroyonan nobo den e ekipo ku vários hungadó nobo i hóben. Yesterday tabata kampion di Beisbòl Veterano na 2001 ku hungadónan manera Rudsel Poulina, Wimbert Hato, Paña Angela, Gress Stroop, Erwin Curial, Francel Petronilia i otronan.
* * * * *
Mas resultado di Beisbòl Veterano ta Santa Maria Pirates vs Broncos, kaminda Santa Maria Pirates a gana ku skor feros di 10-0. Yurendell De Caster a gana i Verney Jansen tabata e picher pèrdèdó. Yurendell de Caster i Luigi Alvarez a bati di 3-2. Interesante pa wak un kombinashon di picheo di Yurendell de Caster, Evenon Martis, Gerald Gegorius i Amador Nita. E aña aki ta kandela i ekipo Quality Stars tin 3 aña sigí kampion. Santa Rosa Memories a dal Otrabanda Veterano 12-0 djadumingu último. Un derota ku skor grandi pa Otrabanda ku ya a sigurá nan pase pa wild card. Andy Leer ku ta den gran forma e aña aki den su debút di Liga 40 di Beisbòl Veterano a bati di 2-2. Andy Leer a terminá ku un averahe di .556. Ramses Jamanika tabata e picher ganadó. Ela tira 41.1 inning e aña aki leu for di tur otro pichernan den Beisbòl Veterano. Awe nos tin resultado di Liga 60 di wikènt pasá tambe. Nos ta keda te aki pa awe i te mayan ku Poder di Dios.
