Pantera Negra mester oumentá su kalidat i halsa nivel
WLLEMSTAD - Manera último tempunan nos tin komentario di analista di Futbòl, Eldon ‘Pepi’ Sulvaran tokante moveshonnan di selekshon di Futbòl di Kòrsou. Den e komunikado aki Pepi Sulvaran ta analisá nos selekshon su chènsnan a yega Mundial.
E grupo aktual no tin sufisiente nivel
Kòrsou ta den porta di probablemente su uniko oportunidat hamas pa por yega un mundial. Ku e selekshon aktual nos no ta yega. Mester un aserkamentu realistiko. E selekshon ta inkonsistente. E peliger yama ‘Reggae Boyz’, e faborito pa gana nos grupo ku ta konsisti tambe di Trinidad i Bermuda. Pa e lastu buelta di premundial, otro for di liga Nashon i ‘Kopa di Oro’ nan lo bin ku forsa maksimo i ku kuchu na djente, pasobra tur hungadó kier yega mundial. Nos problema ta serio. Nos ta mal manka. Room tin kasi 15 luna práktikamente sin hunga kompetitivo, aparte di tin 36 aña. Brenet no tin ekipo. Van Eijma a degrada bai nivel dos, Gaari ku Kastaneer tampoko tin ekipo. Cuco Martina su tempu a pasa i e ta bai hasi 36. Margaritha, Commenencia, Roemeratoe i Zimmerman a prueba ku top di CONCACAF ta un sapatu grandi pa nan ahinda. Rosaria tin praktikamente un aña sin hunga futbol. Felida tambe a baha di nivel bai segundo plano na Ulanda. Janga ya ta veterano. Floranus, e dos Bacunanan, Brenet ku Locadia, ta e únikonan ku nivel pa enfrentá Jamaica. Mester di un inyekshon di kalidat, pura. Esaki ta e realidat duru.
Nòmbernan den tapara
Tin hopi rumor ken ke bini. E nòmbernan ta serio i mester di nan. Chong, Hansen, Obispo, Bazoer, St. Jago i Sambo, tur ta bal miones. Den nan tin 3 defensa sentral. Bazoer por hunga sentral i bolante i St. Jago por kubri rèksbèk tambe. Sontje ku Tahith por hunga riba ala i den delantero i Tahith por hunga tur kaminda den bolante. Sambo ta un bon defensa lateral i ta di spera ku e aña aki si e ta haña oportunidat pa hunga sea den Liga Premier òf ku Sparta ku a mustra interés. Sin por lo menos 3 pa 4 di nan nos no ta bai yega.
Tòpspòrt ta resultado
Hinter e intenshon di tòpspòrt ta pa yega mas leu posibel. Ku un òf mas di e hungadónan aki, no a bin promé, ta di komprondé, mirando nan balor. No ta relevante si otro si a bini un of mas be. Niun hende por eksigi pa hunga den selekshon ilimita. Mester wak si kon ta introdusí nan, paso lo bin argumentu, dikon awor si etcétera. Nos ke bai mundial si of no? Esei te úniko pregunta. Ku e grupo aktual nos no ta bai yega. Kuenta di mantené unidat ta subsidiairio, paso den tòpspòrt promé ku tur kos, bo mester di deportista tòp. Nos mester tuma kos den nos man. Advocaat i amigunan di edat haltu a korta tur maishi kaba sin trese niun hungadó. Ta bon si gobièrnu kai aden, pero mester pone eksigensia si ta bai husa plaka di pueblo. Advocaat & co mester aseptá e hungadónan menshoná. E solushon ta simpel. FFK mester pone komo maneho general ku e mihónan mester ta den selekshon i tur hende mester aseptá esei. Tur federashon normal tin un manager tékniko, pa guía i wak si e kuerpo tekniko ta tene su mes na e manego stipula. Nos no tin niun kriterio pa selekshona i tin hopi di siña.
Jamaica ta wesu duru pa krak
Jamaica lo bin ku hopi hungado ku eksperensia di Liga Premier, esun mas fuerte na mundu i di Championship ku ta igual na Eredivisie. Eksperensia Premier: Bell, defensa lateral robes; Pinnock, defensa sentral; Palmer bolante; Baily, delantero; Gray, delantero; De Cordova Reed, delantero; Antonio, delantero; Hayden, bolante defensivo/defensa sentral; Lembikisa, rèksbèk; Holgate, defensa sentral/rèksbèk Championship: Latibeaudiere, defensa sentral/ rèksbèk; Leigh, linksbèk; Campbell, delantero; Bernard, defensa sentral; Lowe, delantero. Esun ku ta kontra pa e hungadonan nobo aki bin, ta kontra ‘Pantera Negra’ i kontra Kòrsou. Punto!!
