Pariba ta gana Pabou dos biaha den final i bira kampion Minor i seri di Junior empatá
WILLEMSTAD- Pariba a gana e wega finalísimo ku skor di 14 pa 4 i bira kampion di playoff Minor League. E wega finalísimo a tuma lugá djadumingu 22 di mart despues ku Pariba a forsa un empate ganando e wega number 4 di seri final. Pariba ta gana e derechi pa representá Kòrsou na e Latino Americano Minor fin di yüli na Puerto Rico.
Pariba ta gana Pabou 13 pa 5 i empatá seri di Playoff Junior League
WILLEMSTAD- Pariba ku bon bateo i defensa a gana Pabou 13 pa 5 djarason anochi den Tio Daou Ballpark. Ku e viktoria aki Pariba ta empatá e seri na 1 i wega number 3 di e seri ta awe 6’or. Djabièrnè no tin wega di Junior i e seri ta sigi djasabra 10’or am.
NUMERITONAN
Pariba ta nota 13 kareda, dal 10 hit i hunga sin eror. Odlin Pietersz tabata e picher ganadó. Denzen Sint Jagp a bati di 3-3.
Pabou a skor na 5 okashon, bati 9 hit i hasi 3 eror. Picher pèrdèdó tabata Claydison Martina i Rayzjel Isabella -Chirino a bati di 3-3.
PABOU A GANA 7-3 DJAWEPS I BAI DILANTI DEN E SERI 2-1
Liga Pabou ta pika dilanti den playoff Junior League
WILLEMSTAD- Pabou a gana Pariba ku skor di 8 pa 7 i asina pika dilanti den e playoff Junior League. E wega a tuma luga ayeranochi den Tio Daou Ballpark dilanti un públiko grandi. Ta trata di un seri mihó di 5, ke mèn e ekipo ku gana 3 wega lo representá Kòrsou den e kampionato Latino Amerikano na Sint Maarten den luna di yüli. Pabou komo ekipo di kas a bai dilanti 4-0 ku dos kareda den inning number 1 i 2 kareda den inning numer dos. Pariba ta nota un kareda den di 3 inning pa hasi e wega 4-1. Den di 4 inning Pariba ta bai ariba 5-4 despues di a nota 4 kareda den bòm di e di 4 inning. Den di 6 inning Pabou ta nota 4 kareda den kabes di e di 6 inning. Pariba ta kontestá ku un kareda den di 6 pa bai e último inning pèrdí 8-6. Pabou no ta logra nota kareda den kabes di e di 7 inning i Pariba ta nota un kareda i ta menasá pa nota un kareda mas, pero ta keda kòrtiku lagando koredó na tersera i asina e wega a terminá ku skor di 8 pa 7. Wega number 2 di e seri ta sigi awenochi 6’or i djaweps 6’or. Si ta nesesario lo tin weganan djasabra i djadumingu 2’or. Djabièrnè no tin wega di Junior i e seri di playoff Senior League, un seri mihó di 3 ta start. Djasabra 2’or lo tin wega number 2 i djadumingu si ta nesesario wega number 3.
Pabou 8, Pariba 7
Pabou a dal 8 hit i hasi 1 eror. Picher ganadó tabata Kyler Constancia. Jayven Godfried a bati di 2-2 ku 2 RBI. Pariba a konektá 6 hit i kometé 1 eror. Picher pèrdèdó tabata Marvidion Trinidad i Gianiro Martina a bati di 2-2. Aldair Ansano di 2-1 ku 2 RBI.
MAS INFORMASHON DI SÒFTBÒL I BEISBÒL
Fanátikonan di Deporte Korsou, bon dia i felis siman. Nos a terminá un fin di siman ku basta Sòftból i tambe Beisbòl Little League. Na Van Engelen Ballpark tabatin masha hopi wega final i animashon musikal bibu riba djadumingu dilanti un públiko grandísimo. Nos a traha e kolumna aki promé ku tur wega a terminá i mas na final di e kolumna nos lo tin algun resultado di e final di e diferente kategorianan. Playoff Minor a tuma lugá na Stadion Post 6 i tabata selekshon .. ku a bira kampion. Torneo Hope ta start djasabra awor na Van Engelen Ballpark i e sigiente djasabra lo tin e apertura ofishal.
* * * * *
Djadumingu awor tin e torneo relámpago di 60+ organisá pa ekipo Nos Tambe Por. E torneo lo tuma lugá den Frank Curiel Ballpark ku partisipashon di 8 di e 9 ekiponan di Liga 60. Skema ya ta konosí. Ekiponan ku lo topa otro ta 11.00 Los Amigos – Curacao Super Stars, 12.30 Pitufos – Lions, 14.00 Jaws – Sluggers, 15.30 Nos Tambe Por – Baranka. Despues di e torneo aki lo tin Torneo Jaws i despues Torneo Lions. Despues di Torneo Lions lo start ku e kampionato regular ku ta hunga un buelta i mei ku ta 12 wega.
* * * * *
Otro aña (2027) Liga Soraida Juliana, Curacao Little League lo rekordá ku 25 aña pasá a start ku nan promé kampionato. Little League Sòftbòl a keda fundá na 2001 pa despues start ku e promé kampionato e sigiente aña na 2002. Mesun aña Curacao Little League Sòftbòl a partisipá na nan promé kampionato Latino Americano ku a tuma lugá na Maunabo i e selekshon a bira supkampion pèrdiendo den final kontra di Puerto Rico. Na 2023 Kòrsou a organisá kampionato di Little League i nos a terminá na di 2 lugá tras di Aruba ku a bira kampion na Sabana Ballpark.
* * * * *
Na 2005 nos a bira kampion kategoria Little na e kampionato Latino Americano ku a tuma lugá na Mayaguez i na 2006 nos a ripití komo kampion di Little League na Kòrsou den Sabana Ballpark. E aña aki nos tin un kampionato Latino Americano di Sòftbòl kategoria Senior i ta promé biaha ku nos tin un kampionato riba nivel Senior despues ku nos tabatin dos kampionato Latino Americano den kategoria Little League respektivamente 2003 i 2006 den Sabana Ballpark. Den dianan benidero nos lo tin mas detaye di e torneo ku lo tuma lugá di 16 pa 23 di yüni aki na Kòrsou.
* * * * *
Miéntras tantu preparashonnan ta sigi pa final di e kampionato Regional di Little League ku lo tuma lugá di 7 pa 12 di aprel den Stadion Post 6. Siman pasá medio di komunikashon a risibí nan pèrmit pa asina por transmití e weganan a base di reglanan ku headquarters di Little League di Williamsport a pone. Extra Production huntu ku Telecuracao lo transmití e seri aki mihó di 7. I naturalmente ta den preparashon pa transmití e Little League World Series na Williamsport den luna di ougùstùs. Keda pendiente pa mas informashon di e aktividat ku Extra Productions tin den kuadro di e transmishonnan, entre otro podcast ets.
* * * * *
Bèk pa Sóftbòl Little League, manager i coachnan ta konosí pa loke ta trata divishonnan Little i Senior. Manager di Little League ta Shairon Sambo asistí pa coachnan Anoshka Delando i Michelangelo ‘Lo’ Celestina. Manager di Senior League ta Neldrick Lourens asistí pa coachnan Jumiray Kleinmoedig i Myriela Carlo. Manera nos a pone den e kolumna aki, Senior League lo tuma lugá na Kòrsou di 17 pa 24 di yüni i Little League di 4 pa 11 di yüli na Puerto Rico.
* * * * *
Major League Baseball a start e siman aki, djarason 26 di mart ku wega inougural, un wega so kaminda San Francisco Giants lo risibí New York Yankees na Oracle Park na San Francisco. Yankees a gana ku skro di 7-0. E sigiente dia e otro 22 timnan lo ta den akshon pa asina kampionato di MLB 2026 ta start kompletu. Pa dékadanan MLB ta hopi sigí aki na Kòrsou i sigur despues ku vários di nos hóbennan a drenta i establesé den Grandes Ligas, entre otro Andruw Jones ta bai drenta Salon di Fama. Ke mèn lunanan benidero ta Beisbòl, Beisbòl, Beisbòl. Nos ta keda te aki pa awe i te mayan ku Poder di Dios.
