Partisipashon Kòrsou na e di III ODESUR Weganan di Playa 2023 i tur detaye di weganan ku a tuma lugá

Partisipashon Korsou na e di III ODESUR Weganan di Playa 2023 i tur detaye di weganan ku a tuma lugá

SANTA MARTHA Den e último evento ku Kòrsou a partisipá na Weganan di Playa di ODESUR 2023, Samantha van Vuure a partisipá den e evento di 5 km landa den laman abri. Samantha a sali e promé 2 buèltanan bon i unbika na di 3 lugá. Den un di bògtnan a la hañ’e ku 2 landadó Ecuador su dilanti i un di nan su pia a bin dal te den su wowo i e mester a baha su velosidat dor di e doló ku e la haña den su wowo drechi. Apesar di e doló Samantha a sigui landa i a bin sali na di 12 lugá den e evento aki.

Ku esaki Kòrsou a terminá e weganan ku sero medaya huntu ku 3 pais mas ku no a gana medaya. E weganan a wòrdu gana dor di 1e Colombia, 2e  Brasil i 3e Venezuela kual ta delegashonnan ku a bai e weganan ku mas tantu atleta. Por lo general e weganan a wòrdu hopi bon organisá dor di ODESUR i e komité organisadó di Santa Martha. Atletanan di Kòrsou por mira atras riba un bon eksperensia i sa ku nos mester prepará mas mihó pa kompetensia ku e atletanan di Sur Amérika i Karibe.

Nos mester invertí den preparashon di nos atletanan pa e siguiente weganan. FDOK ta sigui traha pa yega na mas fondo ehekutá e plan di mas aña  ku tin kaba pa mehora kalidat di nos atletanan ku mira riba e weganan Sentro Amerikano i  di Caribe 2026 na Santo Domingo. FDOK ta spera un partisipashon masal  na su kaminata anual di dia 6 ougùstùs 2023 ku ta start i kaba dilanti ofisina na Roodeweg 92a dilanti Colon . E  aña aki e kaminata ta pasa riba nos brùg grandi Julianabrug ku ta duna un bunita bista riba Punda, Otrobanda i refineria Isla. Karchi nan ta optenibel kaba na ofisina di FDOK ,Mensing Caminada ,24 uur uit de muur i tambe serka miembronan di federashon di FDOK.

Un danki ta bai na tur ku ta koperá ku nos atletanan.

Despues di e apertura di e weganan di Playa di ODESUR 2023 na Santa Martha e atletanan di Kòrsou a kompetí den Tènis di playa dòbel i individual.
Den dòbel maskulino Dimitri Celestina i Chris de Geus a gana nan promé wega 6-2 i  6-2 kontra e ekipo di Bolivia. Den damas tambe nos a gana e promé wega for di Bolivia 3-6 – 6-4  i 10-7 dor di Sarah i Denie. Despues den individual Demetri a pèrdè 6-4 i 6-3 kontra Chile i Chris a pèrdè 7-5 i 6-4 kontra Colombia. Den e di 2 hornada dòbel nos a topa e kampion i 3e lugá di tènis di playa di Sur Amérika i a pèrdè den maskulino 2-6 i 0-6 konta Brazil i femenino 0-6 i 0-6 konta Venezuela. Nos tenistanan di playa ta eliminá for di e torneo.

‍

Den e siguiente deporte ku Kòrsou a partisipá den e weganan di playa  ODESUR 2023, e tim di Kòrsou forma pa Gilbert Paulina i Shuruendy Valeriano a bin pèrdè tur nan 3 weganan i a keda eliminá for di e torneo. Den e promé kompetensia  Kòrsou a pèrdè 0-2 kontra Chile ku sètnan di 10 – 21 i 11 – 21. Den e di 2 wega Kòrsou a pèrdè 21 - 11  i 21 – 13 kontra Ecuador. Den e di 3 kompetensia Kòrsou a pèrdè 2 – 0 kontra e di 2 ekipo di Ecuador ku sètnan di 18 – 21 i 10 – 21. Despues di Vòlibòl di Playa Kòrsou a sobra e deporte di landamentu den laman, na kual Samantha van Vuure lo kompetí.

Di 14 pa 21 di yüli Kòrsou a partisipá na e Weganan di playa di ODESUR ku ta tuma
    Lugá na Santa Marta, Colombia.
Riba invitashon di ODESUR lo biaha e delegashon di Kòrsou, presidente di FDOK              sr. Rignaal  ”Jean” Francisca i sekretario general sr. Ruthsel Martina pa presensia e parti seremonia di e evento i tambe presidente i sekretario general lo partisipá na reunion di ODESUR. Hefe di delegashon ta sr. Nelson Maria.
    E atletanan ta keda den Hotèl Medellin Rodadero na Santa Martha.

Kòrsou lo partisipá ku 3 disiplina;
1. Tènis di playa
2. Vòlibòl di playa
3. Natashon (open water).

E 4 atletanan ku ta representá Kòrsou den Tènis ta:
1. Christopher de Geus  (maskulino)
2. Dimitri Celestina  (maskulino)
3. Dénie Wolf  (femenino)
4. Sarah Volders  (femenino)

Pa vòlibòl lo partisipá :
1. Gilbert Paulina
2. Shuruendy Valeriano  

Pa  natashon lo partisipá:
1. Samantha van Vuure

Komo masahista deportivo a bai sr. Clinton Leocadia i komo asistente di Natashon
lo bai sr. Raoul Hooftman.

- Tènis a biaha dia 13 di yüli i regresá dia 19 di yüli.
- Vòlibòl a biaha dia 15 di yüli i regresá dia 22 di yüli
- Natashon a biaha dia 17 di yüli i regresá dia 22 di yüli.

‍