SERIO? MESTER INTERVENI PROME KU TA LAT!
Den tòpspòrt resultado so ta konta. No tin masha espasio pa simpatía ni komplasementu. Atrobe Remko Bicentini a presenta un lista ku hopi kara konosi i ku yen hungadó amateur, sin klup òf di nivel abou òf ku a pasa nan mihó tempu.
Hasta tin un kiper Jean Marc Antersijn di mini Futbòl, ku su ekipo Atlantic City ta konsistí di solamente 7 persona. Hungadó ku hopi tempu sin ekipo manera Shermaine Martina i Michael Maria. Boshi hungadó amateur di nivel tres i kuater i mas abou, manera nos hungadónan amateur, pero tambe Cheese Camelia, Bradley Martis, Jaron Vicario. Nos a hera di degradá di Liga A di CONCACAF pa falta di hungadó di nivel. CONCACAF a salba nos dor di ampliá Liga A di 12 bai 16, pesei nos lo no degradà e aña aki.
No tin tempu pa pèrdè, después di Canada i Argentina ku por wòrdu konsiderà wega di training, na yüni ta bin e repachage pa Kopa di Oro pa esnan mas abou den e liga A, ku ta entre otro nos i algún di liga mas abow B ku C. E wega kontra Canada no tin masha balides pa nan, pasobra ya nan ta praktikamente sigurá den Kopa di Oro. Argentina ta wega di ekshibishon.
Pa yüni si mester tin un selekshon di nivel mas haltu. Ta bon kla ku Bicentini no tin e kapasidat pa atrae mas hungadó di nivel máksimo i ke mantené hungadó ku ya no por yuda nos. Si ku e wega kontra Argentina komo insentivo e no a logra trese mas hungadó di nivel, e no ta bai logra mas. No tin espasio pa filosofía, plan pa atrae hungadó di nivel mester. Aparentemente ni hungadó manera Nigel Thomas (Paços de Ferreira) ku ta hunga den Primeira Liga na Portugal ni Nigel Robertha (DC United), ku ta hunga den MLS ni Shurendy Sambo (Sparta) ni Jurich Carolina (Miedz Legnica) den divishon máksimo na Polonia no a logra di konbense. Kòrda esnan di taya manera Riechedly Bazoer (AZ), Armando Obispo (PSV), Tommy St. Jago (Utrecht), Tahith Chong (Birmingham) i Jurgen Locadia entre otro.
Mayoria no ta estelar den nan ekipo, pero sa haña pida wega regular riba nivel. Locadia ainda ta sin ekipo pero a hunga entre otro den Liga Premier, Bundesliga i Eredivisie. Pa problema na Iran e la bandoná e pais. Dos hungadó di nivel só a logra haña banda di algún talento hoben. Sherel Floranus (Antalyaspor) ku ta hunga den liga máksimo na Turkia, pero no ta estelar. Un defensa lateral ku por hunga tur kaminda den defensa i Giovanni Troupée (Lokomotiv Plovdiv), tambe defensa lateral riba ala drechi, ku mas ku 110 wega den Eredivisie ku awor ta na Bulgaria.
Esei ta, si nan bin, paso den pasado a pone hungadó riba lista manera entre otro Quilindischy Hartman (Feyenoord) ku no a bin i awor ta den pre selekshon ulandes. Tin algún talento si, di kual algún tabatey kaba. Jeremy Antonisse (Emmen), Kevin Felida (RKC), Nathan Markelo (Excelsior), Jearl Margaritha (Top Oss), Daijiro Chirino (Zwolle), Justin Ogenia (Eindhoven), Godfried Roemeratoe (Hapoel Tel Aviv), Xander Severina (ADO), Roshon van Eijma (Top Oss). Pa keda den tòp di CONCACAF i yega mundial i Copa America mester mas hungadó establesê riba nivel haltu riba korto plazo. Pesei mester hende ku por konbensé nan. Nos tin Dean Gorré den kas ku a hunga pa entre otro Ajax i na Inglatera i na Surnam a demostra di por haña hungadó di nivel màksimo. Un opshon ta pa kambia su posishon ku esun di Remko.
Di tur manera después di e debakel na Indonesia i awor, ta un siegu so lo no mira ku asina aki nos lo no yega e sigiente nivel. Sin mas hungado tòp, ta imposibel yega mundial i Copa America. Kisas nos por yega Kopa di Oro via play-off. Pero ku e potensial ku tin na hungadó lo ta un tristesa si nos pèrdè e dos oportunidatnan aki. No tin tempu pa bira, ta tras di otro Kopa di Oro, premundial i Copa America ta bin. Bicentini a haña e chèns ku ela pidi, pero mester admití ku no tin niun indikashon ku e por konbensé hungado tòp. E no tin e nòmber. Mester switch pa un aserkamentu profeshonal den tur sentido, kaminda no tin espasio pa amaturismo. Mester hala tur kos un banda pa resultado.
Ta tempu pa pone kriteria pa selekshon. Mester prohibí pa bin ku hungado mas abou ku di dos nivel profeshonal. Asina komo doño di trabow bo ta obligá pa selekshoná riba nivel. Si remplasá Remko den futuro, mester hasie si di un manera korekto i respetuoso, pasobra kon ku bai bin nos a kampionisa den Karibe kune, pero awor nos mester bai ‘next level’ i mester di otro kalidat ku bon hende so, ku sigur Remko ta. E ta duru, pero esei tòpspòrt tambe ta. Resultado promé ku tur kos. Apesar di esaki ainda nos por pone un selekshon riba tereno ku por entretené nos fanatikada na kas kontra Canada. Mi lo bin riba esei mas después.
