Pepi Sulvaran ku análisis profundo dikon mester di hungadónan Richedley Bazoer, Armando Obispo Tommy Sint Jago i Sontje Hansen den selekshon di futbol di Kòrsou
Seri di artikulo.
Pepi Sulvaran: "Lagami pone bon kla, ku mi ta un fanátiko i e artikulonan aki ta solamente un opinión. Ta Advocaat ta disidí. Ku mi sa un tiki, ta paso ma studia años pe. Promé mi bira abogado, ma gradua na CIOS Overveen, diskutibel e mihó skol di deporte na Ulanda, kaminda ma spesialisá entre otro den Futbol. Un skol kaminda entrenadó grandi manera Leo Beenhakker, Guus Hiddink, Han Berger i otronan tambe a gradua. Mi ta purba substansia ku echos. Mi ta konbensí ku ta ku e 5 òf 6 hungadonan aki so tin un chèns pa yega mundial. Ata e promé."
No por deskualifika Bazoer
Na sèptèmber 2024 Advocaat na televishon ulandes publikamente a bisa ku e ta kla ku Bazoer. Esaki riba su mes kaba ta algu inakseptabel paso no ta pa e disidí ken no por hunga mas pa nos selekshon. Esaki ta prueba ku FFK no ta realisá ken ta doño di trabou di ken. Advocaat taki temporalmente. FFK no a hala su orea i Bazoer i su ruman Irchandly si a hasie ku rason. Advocaat a rabia paso Bazoer no a responde riba app di Kees Jansma. Esei kaba ta algu straño, paso ta app ta manda i no ta papia ku hungadó personal. Probablemente deí na edat di e kuerpo tékniko. Bazoernan a trèk su orea bisando ku lokual ela bisa no ta bèrdat. Irchandly, agente di su ruman a splika ku tabatin kontakto amplio ku Advocaat i a splike ku na a momento ei Riechedly su posishon den AZ tabata insigur i nan ta pendiente un kambio. Ta logiko ku un hungadó ku ta bal miones bou di e situashon ei no ta riska riba velt di cricket kontra pais malu manera St. Lucia i Grenada, kendenan por sierto nos no por a gana niun di dos.
Mester di Riechedly
Bazoer ku Chong ta nos mihó piesanan. Mester di Bazoer pa dos motibu. Nos sentro di defensa ta débil i ta dos hungadó so por hunga mei mei den bolante riba nivel di Jamaica. E yunan di John Bacuna. No tin mas. Commenencia, un junior lo yega un día si e sigui krese. ‘Kopa di Oro’ a mustra ku e falta un poko ahinda. Hopi no sa, pero Riechedly ta un señor bolante. Ey ela kuminsa i krese den Ajax i hasta a penetrá ku apenas 18 aña mei mei den bolante di selekshon Ulandes. A pronostiká un futuro grandi pe, pero dos kos a stagne. Na promé lugá día e tabata mas hoben e tabata poko impulsivo, ta nos sanger e tin. No mas ku por ehèmpel un Noa Lang. Na Ulanda, kolo ta hunga un papel i nan a stèmpel e pa hóben ku e ta komo un hungadó difikultoso ku mal karakter, mientras por ehempel, serka Noa Lang a bisa ku e ta hóben ahinda, e mester madura i duné tempu, paso e ta outochtono, lesa blanku. E último 8 aña Bazoer a prueba tur kritiko robes. E di dos punto ta ku su skogensia pa ekipo no tur ora tabata asertá i e no a haña tur oportunidat pa demostrá.
Gran futbolista
Bazoer te tipo di hungadó ku ta hasi diferensia i ta halsa un ekipo na nivel. Dikon? Pasobra e ta hunga a base di téknika i gran bista di wega. Pesei e por hunga sentral tambe pa organisá e wega for di den defensa, ku pase asertá, tantu kòrtiko komo pase largu i ta lesa e wega bon, además di tin mentalidat luchadó. E ta kompletu. No ta pornada su balor máksimo den su karera a wòrdu balora riba 15 mion Euro i Wolfsburg a paga 12 mion Euro pe. Un defensa ku Bazoer i Obispo sentral, ku St.Jago riba rèks, mandando Brenet riba ala den bolante i Floranus of Carolina riba ala robes ta unu solido. Of manda St. Jago sentral huntu ku Obispo i pone Bazoer mei mei di e Bacunanan komo bolante, lo ta un di e mihó bolantenan den CONCACAF, garantisá. Mester pone Advocaat ‘lijm’ e relashon ku Bazoer pa bienestar di Kòrsou i di ‘Pantera Negra’ en partikular. Mester hala futilidat un banda pa interés general. Esaki por bira nos tempu, nos momento den historia. BIBA KÒRSOU!
DIKON MESTER DI NAN (3): ARMANDO OBISPO
Defensa pia robes di nivel haltu
Aktualmente ‘Pantera Negra’ no tin defensa di pia robes. Jurich Carolina ku tabatin un hopi bon temporada na Bosnia i Herzegovina, no a forma parti di e selekshon último tempu. Ku Armando Obispo ku a nase 5 di maart 1999 na Ulanda i ku ta di desendensia Kurasoleño, nos tin un kantidato di nivel hopi haltu pa bin reforsá kurason di nos defensa. Nos mester di un defensa pia robes, pasobra Sherel Floranus ku di origen ta un rèksbèk ta di pia drechi i esei semper te trese sierto limitashon riba ala robes, por ehèmpel, ta mas difísil pa bai liña i hasi kruse ku perfekshon i hopi be mester korta bin aden riba su pia drechi. Apesar ku e ta hasi su trabou defensivo bon, un defensa di pia robes i sigur unu ku un bon pase largu den su pia, por yuda ofensivamente riba ala robes, hasta si manera Obispo, e ta hunga mei mei den defensa.
Un defensa sentral ku outoridat
Ku Obispo den kurason di defensa nos tin un hoben ku tin hopi aña den un organisashon tòp na Ulanda. Un defensa ku a representá Ulanda internashonalmente riba tur nivel hubenil, for di U-15 te ku U-21. Obispo for di chiki ta bini di kuna di PSV. Ku apenas shete aña ya ela forma parti di e instituto futbolistiko ulandes aki. E ta parti di e generashon talentoso ku tambe a enserá Cody Gakpo di Liverpool i Jordan Teze di Monaco, nan tres por sierto ta ‘brother’ for di chiki. Obispo a pasa hinter su formashon den PSV i a debutá ku nèt 19 aña den e promé onsena. Mientras tantu e ta un kara konosí den e promé selekshon di PSV. Apesar ku lastu añanan ela sufri hopi leshon, tòg PSV na desèmber 2024 a ofrese un kontrato mehorá, pa mustra nan gran apresio pe. Asina nan a mare te medio 2027. No ta sigur ku e ta keda si, paso tin interés for di divishon maksimo na Inglatera i Alemania, for di Liga Premier i Bundesliga.
E por karga nos defensa
Ku su eksperensia amplio den Eredivisie i hasta Champions League, fásilmente e por liderá e defensa di nos selekshon. Ku su 1 meter 85 di estatura i su forsa pa bula haltu, defensivamente i ofensivamnete e ta un arma importante. E ta pasa bala bon for di den defensa i pesei e ta kuadra ku e wega ofensivo ku PSV ke hunga. E tin forsa i un bon mentalidat. Su puntonan fuerte ta su intervenshonnan rigoroso i su pase largu for di den defensa ku profundidat. Paso e ta kòp bon, e ta peligroso ku bala morto na fabor di su ekipo. Ora di kòrner of tiru liber den área penal kontrali, e ta un menasa ku su forsa i habilidat pa bula haltu. Huntu ku Bazoer i Tommy St. Jago nan por yuda nos forma un di e mihó defensanan di nos región i además duna Jamaica bataya serio pa promé puesto den nos grupo. Promé ku leshon a drenta aden, e tabata kosta 5.5. mion Euro, aktualmente e ta balorá na 3 mion, pero asina e kuminsá hunga regular atrobe, tur hende ta verwacht ku su balor lo subi atrobe. E por lidera e defensa, paso e ta un ehèmpel di hunga ku entrega i tin bon mentalidat. No por bai lage fásil un kontra un, paso e ta antisipá bon i ta intervení duru pero limpi. E tin tur kos pa gana apresio di e fanatikada lokal. E ta un defensa sentral natural ku for di chiki a okupa e puesto ei, ke men e ta un spesialista eynan i ta domina tur aspekto di e wega sentral den defensa. Pase largu, e ta tire mane ta ku su man e ta pone. Su tata ta amigu di ‘Chep’ Regales ku tabata un bon defensa tempu di su tempu i kisas por hasi un bon trabou pa yuda konbense Armando Obispo si esei no a sosode kaba. Obispo tambe ta un di e grandinan ku nan nòmber ta wòrdu menshoná pa bin reforsá nos. Den defensa nos mester di un futbolista asina aki, pa por impone respèt.
DIKON MESTER DI NAN (4) SONTJE HANSEN
El pequeño gigante
Misjonne Juniffer Naigelino Hansen, simplemente ‘Sontje’ Hansen, ta un futbolista di desendensia Kurasoleño, nase 18 di mei 2002 na Ulanda, ku ta hunga bala preferiblemente komo atakante. Apesar di su estatura di 1.76 meter i su peso liviano, si e drenta e reda blou ku hel, ta piska grandi nos tin den reda. Su palmares ya kaba ta impreshonante: kampion Europeo U-17; Kampion di Ulanda U-19; Kampion di Ulanda U-17; Kampion di e torneo hubenil prestigioso U-17 di Algarve. Sontje su prestashon mas grandi te ahinda, ta ganado di e ‘sapatu di oro’ di e kampionato mundial Brasil U-17 na fin di 2019, kual premio ela risibi for di man di e gran goliadó i leyenda Brasilero Ronaldo Luíz Nazário de Lima.
Sontje su habilidat ta un atrakshon riba su mes
Sontje ta e tipo di futbolista ku fanátiko ta bai stadion pe i ku ta bira un idulo pa nan. E ta rápido, ta saka bon i konosá gol. E por hunga tantu riba ala komo den punta di lansa òf komo di dos ‘spits’ of tras di e punta di lansa. Riba velosidat e ta kasi imparabel. Su velosidat ta un arma serio den kontra golpe. Kampionato ku a kaba, kontra FC Utrecht e la risibi un bala ku a desvía na rant di su área penal i riba puro velosidat a krusa hinter vèlt te den e área penal kontrali, pa e mes anota. E ta difísil pa marka, pasobra e ta lihé riba e promé meternan i además tin e habilidat pa saka un kontrinkante fasil ku ‘skein’. Ku Sontje nos lo tin un arma ofensivo ku velosidat di turbo manera ta bisa.
Un karera hubenil impreshonante
Sontje a drenta fila hubenil di e instituto Ajax di Amsterdam ku 11 aña. For di 15 aña ela pasa den tur selekshon hubenil ulandes. For di U-15 te ku U-21 i a hasi Ulanda kampion
Europeo U-17. Den U-17 ela anota 13 gol den 24 wega riba e nivel máksimo. Na kampionato mundial U-17 ela bora e arko seis be, mas ku tur otro hungado.
Arma ofensivo serio pa Pantera Negra
Hansen ta para dilanti su di tres temporada ku NEC di Nijmegen. Na 2023 ela pasa di Ajax pa NEC, liber di transferensia, NEC no a paga nada. Na e momento ei su balor riba merkado tabata solamente Euro 750 mil, entre otro debí na leshon. NEC a haña ganga, paso den dos aña su balor riba merkado internashonal a yega 4 mion Euro. Esei ta debí na e echo ku den 72 dos wega pa NEC den Eredivisie e tabata enbolbi den 22 gol. E mes a anota 13 be i a duna 9 pase di gol. Sontje su talento ku 23 aña ta indiskutibel. E tin un kontrakt te 30 di yüni 2027, pero tin diferente tim su tras. Invierno pasa su deseo pa dal un paso mas haltu a wordu frustra. RC Lens di Ligue 1 di Fransia tabatin interés konkreto, pero NEC a rechasá e oferta. Aworaki tambe tin ekipo interesá. Entre otro dos ekipo Ingles ku tin bon sèn, Middlesbrough i Wrexham di Championship. Middlesbrough ta reklutando hungado pa purba yega Liga Premier i Wrexham, un ekipo Gales multimilionario ku ta pertenesé na e artistanan di Hollywood Reynolds i McElhenney i ku a promove for di 2023 di nivel sinku pa di dos nivel. Tambe tin interés di e kampion Danes FC Kopenhagen, pero NEC ta pidi hopi bleki. Asina tin mas ekipo ku wowo riba e hoben delantero ku tin su mama komo su fanatiko di mas grandi. Sontje su puesto preferibel ta riba ala den atake. Riba rèks ku ta su pia e ta poko mas komodo, pero e por bin aden for di ala robes tambe i forma mes tantu peliger, pasobra e ta tira ku tur dos pia. Si e bin e lo ta atrakshon pa e fanatikada lokal. Un hungadó ku konstatemente ta forma peliger ora e tin e bala. Laga nos spera ku FFK por será e reda blou ku hel.
