Falta menos ku un luna
Pepi Sulvaran: 'Pantera Negra no mester di tribune pero hungadó di nivel "
WILLEMSTAD - E siman aki nos a risibí mas análisis di Pepi Sulvaran pa loke ta trata no selekshon di Futbòl di Kòrsou. Pepi Sulvaran ta eks direktor tékniko di futbol di Kòrsou i eksperto ku gran konosementu riba futbòl internashonal. Konstantemente Pepi ta analisá i manda komunikado pa prensa lokal epseshalmente ku análisis di nos selekshon di futbòl.
Dia 5 di sèptèmber awor, nos lo hunga nos promé wega di e lastu buelta di premundial na Port of Spain Trinidad. Te ahinda no sa si a haña hungadó nobo si of nò. Otro siman a keda di anunsiá e selekshon preliminar. Ta papia di pone èkstra tribuna den Ergilio Hato. Dia 9 di sèptember nos ta hunga kontra Bermuda na Kas. Ergilio Hato tin mil aña sin yena. Ni kontra Panama ni kontra Honduras ni kontra Costa Rica nos no por a yena e kueba di ‘Pantera Negra’, awor nos ta bai yene kontra e number 162 na mundo ku ta di mes kategoria malu ku St. Lucia i Grenada i mes ora ta e ekipo di mas malu ku a sobra den e buelta aki.
Ekspektativa falsu
Esaki ta e realidat. Ku e selekshon aktual kisas nos por gana Trinidad, esei mes no ta sigur. Bermuda nos mester por gana na kas ku dede den nanishi. Jamaica ta imposibel pa nos gana ku e selekshon aktual ku tantu hungadó mas o menos importante sin ekipo mes, entre otro Room, Brenet, Locadia, Kastaneer i diferente mas. Ken nos ke gaña? Mester ta honesto ku e fanátiko. Ami no ta den negoshi di lanta ekspektativa falsu.
Nos mes mester buska hungadó awor
Realidat ta ku nos tin un kuerpo tekniko di amigu den direkshon di 80 aña ku a kobra bòshi plaka sin trese ni un solo hungadó. Ku nan ta bai bira difísil pa haña hungadó nobo, paso nan no ta wòrdu tuma na serio pa mayoria hungadó ku por bin. Ademas no tin aserkamentu personal, ta app ta manda i ora no reakshoná ta kaba ku nan publikamente na televishon. Te ahinda nos no a tende ku niun hungadó nobo ta bin. Ta manera nos ta stèns riba e kuerpo tékniko aki siegamente, ku te hasta ta invitá hungadó ku tin mas ku un aña sin hunga bala, no un pero diferente, algu imposibel den selekshon Ulandes. Lagando hungadó afo ku ta ekselá riba nivel profeshonal manera entre otro Jurich Carolina i Xander Severina. E kuerpo tékniko a kobra hopi plaka kaba, si nos pèrdè of gana pa nan no ta hasi diferensia. Nan bokal ta sigura. Si nos pèrdè, nan lo hasi manera tur otro a hasi, bai Hulanda tira e falta riba nos, ku nos ta desorganisa i bruwa. Garantisa esei lo sosede.
FFK no tin maneho pa selekshon
Ta bon kla ku no tin maneho general ku ta stipulá ku e mihó hungadónan mester ta den selekshon. No tin mekanismo pa kontrolá si e kuerpo tékniko ta kumpli ku kriterio i meta stipula. Aparentemente tin dje tantu konfiansa ey, solamente riba nòmber traha mas ku binti aña pasa, danki na super bon hungadó, ku ta aseptá den kuerpo tékniko hasta persona ku tur respèt, ku fisikamente no ta apto mas pa yuda entrená un selekshon.
E kritiká ta fuerte i konstruktivo
Es ku ke ta será wowo. Nos ta alertá na tempu a base di echos verídiko, pasobra esaki por ta nos úniko chèns pa hamas yega un mundial. Nos mester tuma kos maske ta un tiki den nos mes man i buska hungadó nos mes. Òf ta via media Ulandes mester tende atrobe promé, ken ta den nos selekshon. Si nan no logra haña hungadó di nivel haltu atrobe mester kore ku nan mes ora, promé ku 10 di òktober ora nos enfrentá e gran faborito Jamaica den nos kas. Dikon? Paso por ta nos por gana Trinidad, esei mes ta na duda. Bermuda no ta problema, aunke e mes selekshon aki aña pasa no a gana St. Lucia ni Grenada ku ta mes malu ku Bermuda. Ilushon falsu ta trese desapunto. Si ta bon e promé lugá lo bai entre nos i Jamaica, si nos haña hungadó di nivel ku di bèrdat ke bin hunga pa nos. Asina mes lo bira super difísil kontra un selekshon yena ku eksperensia di Liga Premier, esun mas fuerte na mundu. Ta un minut pa 12. Mi ta spera di kurason kumi ta robes i ku a logra haña hungadó nobo i tapa mi boka!!
