Analisis di Peppie Sulvaran di selekshon di Canada
LES ROUGES’ TA BIN PA BUSKA SU KLASIFIKASHON DIREKTO PA ‘KOPA DI ORO’
Peppie Sulvaran gran konosedٗó di futbòl ku análisis di selekshon di Futbòl pa e wega kontra Kòrsou di djasabra 25 di mart
WILLEMSTAD - Canada a kaba di sali su di dos mundial despues di México‘86, klasifikando den e region di CONCACAF sorprendiendo tur hende komo number un di nos region, riba grandinan tradishonal manera México i Merka, ademas ku mas gol hinka i ménos gol kontra ku tur pais den e oktagonal final. E éksito aki ta debí na algun atakante hóben berdaderamente talentoso. Lidera pa Alphonso Davies ku normalmente ta hunga defensa lateral robes pa Bayern Munich, pero den selekshon Canades ta okupá un puesto den atake, mayoria be riba e parti robes di tereno.
E ta un talento èkstra ordinario i ku mundialmente ta wòrdu konsiderá den e bon nan di e generashon mas hóben i hasta hopi ta konsider’é e mihó defensa lateral robes na mundu aktualmente. E por hunga tur kaminda na banda robes i ta eksplosivo, rápido, kreativo i tin un bon krus’e. E otro delantero di nivel haltu ta Jonathan David ku ta hunga den Ligue 1 na Fransia pa Lille. E ta mas un sentro delantero ku konosé gol. E di tres hungadó ofensivo importante pa nan ta Tajon Buchanan (Brugge) ku ta mas un bolante ofensivo riba ala. Nan tres ta e motibu prinsipal pakiko Canada ta awe kaminda nan ta. Den gol nan tin un veterano portero Milan Borjan di 35 aña ku ta hunga pa Strea Kòra di Belgrado. Defensa no ta nan parti mas fuerte.
E veterano Steven Vitória di 36 aña ku ta den promé divishon di Portugal ku e ekipo Chaves ta nan defensa sentral, pero ta perdiendo su puesto ku e hoben sentralnan, e fisikamente fuerte Kamal Miller (Montréal) i Derek Cornelius (Malmö). Defensa riba ala drechi ta Alistair Johnston (Celtic) i nan linksbèk Sam Adekugbe (Galatasaray)). Den bolante Stephen Eustáquio di Porto, ta nan bolante sentral i esun ku ta harma wega. Atiba Hutchinson (Besiktas) a kaba di hasi 40 aña i ta e kapitan ora e ta den wega.
E otro bolante defensivo, Samuel Piette (Montreal) ta leshoná, pesei kompañero di ekipo di Leandro Bacuna, Ismael Koné (Watford) un hoben di 20 aña probablemente lo kuminsá. Riba ala den un 4-4-2 Canada ta hunga ku Davis i Buchanan (Brugge) komo bolantenan ofensivo. Jonathan David i Cyle Larin (Valladolid) lo ta e sentro delanteronan. ‘Maple Leafs’ su forsa ofensivo ta enorme. Davis, David i Buchannan so huntu ta kosta huntu 127 mion euro. Nos hungadó di mas karu ku ta Juninho Bacuna ta kosta 4 mion i mei euro. Imposibel e no ta, pero ta difísil pa pensa ku e Canadesnan lo no kwe un di e dos promé kuponan i klasifikashon direkto pa ‘Kopa di Oro’ den e grupo di nos aki ku tambe ta enserá Honduras. E ekipo aki tin hopi klase i profundidat den atake i ta un ekipo sumamante rapido.
Nan a pèrdè 2-1 ku Honduras pafo di kas kuminsando sin David, Buchanan i Larin riba un tereno manera pisina di awa. Defendé kompakto ta mustra nos tarea mas importante si nos ke tin un chèns di saka un òf mas punto for di nan. De fakto pa mantene un chèns na bida pa por klasifiká direkto pa ‘Gold Cup’ nos mester gana na kas diasabra awor. E promé puesto ku nan a okupá den pre mundial di CONCACAF a duna nan konfiansa, pero ta parsialmente danki na un gran parti pasobra tantu Merka komo México, sigur di nan klasifikashon pa e lastu mundial, a duna hopi hungadó chèns pa prueba nan mes den selekshon i hopi be a laga nan streanan afó. Canada ku lo enfrentá Kòrsou diasabra (25 di mart 2023) den nos kas, tambe mester di punto. Meskos ku nos nan tin tres punto, pero tin un muchu mas miho saldo di gol ku nos.
Ku nos ta den e posishon aki ta danki na Art Langeler, ku a bin Kòrsou un par di dia so, sin sa nada di nos selekshon i disidí di no tende di niun hende i a laga nos dos mihó hungadórnan afo, sin ku nan a hasi nada pa malu. Kaminda Honduras tabata pan den kas, pero a gana nos ku skore minimo den nos mes kas. Ta danki Dios CONCACAF a kambia regla ku pa e biaha aki nos no por degrada for di Liga A, pero awor nos ta haña nos ta lucha pa un kupo direkto den e ‘Kopa di Oro’ di e aña aki, kaminda aworaki nos lo por tabatin 6 punto kaba i riba un trankil.
Pero mester wak dilanti. Nos team ku e adkisishonnan nobo a bira poko mas fuerte i den futbol hopi kos por pasa ku e bala rondo. Nos ta spera si ku e eksperensianan ku Hiddink, Kluivert i Langeler a siña nos, ku bo no por traha pa loko ‘ad hoc’ den futbol i kosechá éksito. Mester traha struktura i di un manera profeshonal. Di tur manera nos lo haña bon futbòl mira diasabra i si nos mantené nos den e top di CONCACAF, ta mas di e tipo di weganan aki so nos ta bai haña, lokual nos fiel fanatikada merese. Canada ta bin ku tur su elenko pa saka punto, asina ta tur hende pa Ergilio Hato diasabra pa duna sosten na lokual ta di nos. Yega Yega!!
