Di spònser pa Universal Motors i Global Motors:
*Pichingolo A Risibí Ofisialmente nan Unifòrm Nobo*
Nissan/Kia..
WILLEMSTAD- Ku hopi orguyo e organisashon di softball femenino fastpitch Pichingolo ku ta rumbo pa 50 aña di eksistensia ayera a bishita nan spònser ku ta Universal Motors i Global Motors, Nissan i Kia respektivamente pa asina di forma ofisial risibí nan unifòrm pa e próksimo dos temporadanan.
Aña pasá novèmber a kumpli 35 aña ku famia Moron ta e prestigioso spònser dje organisashon di Buena Vista. Ayera un biaha mas presidente dje organisashon Sr. Cecil Garcia a gradisí rumannan Robby i John pa nan tremendo i valioso aporte ku ta pone ku Pichingolo por ta kabes trankil i perkurá pa e trabounan riba tereno ya ku nan tin un bon spònser.
E unifòrmnan ta karga Nissan den pechu, i Kia riba e karson. Pichingolo ta partisipá den tur e 3 kategorianan di CSB ku ta: Hubenil, Klase A i Doble A bou di nòmber di: *Pichingolo Nissan/Kia*.
Algun dirigente di Pichingolo, huntu ku algun hungadó dje respektivo kategorianan a risibí e unifòrmnan na man di nan spònser.
E Organisashon di Pichingolo un biaha mas ta yama hopi danki na Universal Motors, Global Motors i famia Moron pa e gran konfiansa.
