Pitufos a blankia Jaws 5-0 den Liga 60 i Standing detaye rumbo pa último siman MLB

Pitufos a blankia Jaws 5-0 den Liga 60 i Standing detaye rumbo pa ultimo siman MLB

WILLEMSTAD- Ekipo Pitufos a dal Jaws 5-0 den Liga 60 djadumingu último na Frank Curiel Ballpark. Ku e viktoria Pitufos a pasa pa okupá puesto number 2 (6-3) tras di ekipo Nos Tambe Por (6-1). Den otro wega Sluggers a dal Los Amigos 5 pa 1 i den e último wega di djadumingu último Nos Power a gana Lions pèrtá 9-8. Weganan ta sigi djadumingu awor na Frank Curiel Ballpark.

‍

Pitufos 5, Jaws 0
Pitufos a dal 8 hit i kometé 1 eror. Lesley Conradus a gana. Orsendo Clemencia ku Gwendell Sint Jago a bai di 1-1. Richinel Juliana di 2-1 i Rignald Hooi di 3-2. Pa Jaws 3 hit ku 2 eror. Anthony Pieter a pèrdè i Andrewi Does a bai di 1-1. Raimy Pastor ku Fitszgerald Pieter a bai di 2-1.

Sluggers 5, Los Amigos 1
Sluggers tabatin 9 hit i nan a hunga sin eror. Eldred Bakker tabata ganadó i James Jackson a bai di 2-1. Raymond Lieuw ku Irving Leito, ámbos di 3-2. Los Amigos a dal 7 hit i hasi 2 eror. Hubert Gomez a resultá pèrdèdó i Ingemar Jonis a bai di 1-1. Howard Rojer a bai di 2-2 i Sendly Reina di 3-2.

Nos Power 9, Lions 8
Nos Power tabatin 11 hit ku 2 eror. Richard Albertsz a gana. Richel Baromeo, Earl Virginia ku Richard Campagnard, tur a bai di 2-1. Elvis Balentina ku Oswalt Dalnoot a bai di 3-2. Sherwin Martinus a bai di 3-3. Lions a dal 8 hit i hasi 1 eror. Elvis Jacobus a pèrdè. Sherwin Floranus, Kenneth Obispo ku Elvis Jacobus, tur a bai di 2-1. Hayworth Felipa a bai di 2-2 i Lyndon Lourens di 3-2.  

‍

Situashon ketu bai perta den MLB

Si awe lo tabata e último dia di kampionato regular, ekipo Tampa Bay lo a topa Toronto Blue Jays i Texas Rangers lo a topa Seattle Mariners den un seri di Wild Card mihó di 3. E race pa Wild Card tambe ta tenas i tur dia kasi tin kambio pa loke ta trata e ekiponan ku ta bai topa otro den wild card. Pa loke ta trata Liga Nashonal, ekipo  Diamond Backs lo topa ku Philadelphia. Milwaukee lo topa ku Marlins.

Tene kuenta ku Twins i Milwaukee ta na kabes den nan divishon, pero mester hunga Wild Card tòg teniendo kuenta ku e regla nobo di klasifikashon den MLB di 2023.  E ekiponan ku lo pasa dirèkt pa e seri di divishon mihó di 5 ta esnan ariba menshoná. Braves, Dodgers, Orioles i Houston te ainda. Braves i Dodgers ta hunga seri di divishon sigur. Interesante e play-off di MLB den 2023. Den e dianan benidero atrobe lo tin un up date.

‍

Jaws i Swift ta gana Navegantes den Liga Van Engelen

WILEMSTAD – Jaws a gana Navegantes 20-5. Swift a derotá Navegantes 18-14 den Liga van Engelen djadumingu na Van Engelen Ballpark.  Swift ta keda invikto ku rèkòrt di 6-0 kómodo na promé lugá.  Jaws tin rèkòrt 2-3 na di 5 lugá. Liga van Engelen ta sigi djadumingu na Van Engelen Ballpark.

Jaws 20, Navegantes 5
Jaws tabatin 17 hit ku 1 eror. Jermaine Esprit a gana. Jonaikel Castro Arias, Erikson Senior i Jermaine Esprit, tur a bai di 2-2. Ruwel Matrona ku Kevin Boekhoudt a bai di 3-2, Jurick Marlin i Ruthviensley Windster di 4-2 i Jowell Thielman di 4-3. Kevin Boekhoudt ku Jowell Thielman a konektá 1 homerun i Erikson Senior a konektá 2 homerun di kual 1 grand slam.  Navegantes a dal 6 hit i hasi 3 eror. Myson Cathalina a pèrdè. Adoni Suares, Juruengelo Tielman, Edson Sint Jago i William Mau-A-Sam tur a bai di 2-1. Germaine Genaro di bai di 3-2.

Swift 18, Navegantes 14
Swift a dal 16 hit i kometé 1 eror. Gedion Noor tabata picher ganadó i Dimitri Leon a bai di 2-1. Michealangelo Trinidad a bai di 2-2. Randolf Kirindongo ku Dicson Acosta a bai di 3-2. Jegveny Hendrick ku Nurison Leonora a bai di 4-3.  Dicson Acosta, Jegveny Hendrick, Julio Cesar del Rosario i Randolf Kirindongo, tur a konektá 1 homerun. Nurison Leonora a konektá 1 homerun grand slam. Navegantes tabatin 12 hit i nan a hunga sin eror. Ryan van Heydoorn a resultá pèrdèdó. Anselmi de Jesus Cabrera Acevedo i Nathanael Makaya a bai di 2-1. Germain Genaro ku Shuremy Fornerino a bai di 4-2 i Juruengelo Tielman a bai di 4-3.  Shuremy Fornerino a konektá 1 homerun.

‍

INFORMASHON DI SÒFTBÒL I BEISBÒL

‍
Fanátikonan di Deporte Kòrsou, bonnochi. Nos tei atrobe kargá ku informashon di Sòftbòl i Beisbòl. Royal Scorpions selebrando ketu bai nan di 19 título. Nos a risibí informashon ku ta 20 titulo i tin un título kampeonil di promé ku 1965 tempu ku no tabata hunga play-off. Nos ta bai puntra e miembronan di Royal Scorpions di tempu ei ta ki aña e promé titulo tabata. Awe nos lo tin hopi mas informashon di Sòftbòl Slowpitch. Nos ta sali ku Liga 60 kaminda ekipo Jaws ku ta kampion di 2022 tin 4 wega sigí pèrdí. Ekipo di Jaws a kuminsá preokupá hasta ku e klasifikashon. Ekiponan ku tabata figo pa klasifiká ta Nos Tambe Por, Pitufos, Jaws i Los Amigos. Awor ta parse ku Nos Power ta den tremendo posishon pa drenta den promé 4-nan.

* * * * *

E standing pa loke ta trata Liga 60 ta, Nos Tambe Por 6-1, Pitufos 6-3, Nos Power 5-3, Jaws 5-4, Lions 4-5, Los Amigos 4-5, Sluggers 3-5 i Curacao Super Stars 0-7. E lucha lo bai bira basta serio pa klasifiká number 3 i 4.  Pa loke ta trata lidernan nos tin Efraim ‘Junny’ Marselia (Sluggers) ku tin .588, sigí pa Marlon Winklaar (Los Amigos) .545, Fransje Lambertina (Jaws), Sendley Reina (Los Amigos) i Raymond Lieuw (Sluggers) tin .471. Pa loke ta trata RBI, Winston Kirindongo di Nos Tambe Por i Naai Hooi di Pitufos ta empatá ku 12 RBI, ta sigi Elston Constancia (Pitufos), Wendell van het Kruys (Nos Power) i Junny Marselia ku 9 kareda empuhá.

* * * * *

Pa loke ta trata picheo, mester apuntá ku ERA (averahe di kareda limpi permití) pa pichernan ta hopi abou, ke men hopi bon.  Raymond Zieck (Los Amigos) 0.93, Siegfried Lopez (Nos Tambe Por) 1.62, Richenel Rafaela (Nos Tambe Por) 1.78, Juan Cicilia ( Pitufos) 1.87 i Nelson Candelaria (Nos Power) 2.17. Den ponche tirá, Isaac Francees (Nos Power) tin 9, Juan Cicilia (Pitufos) 8, Anthony Pieter (Jaws) 8, Riley Toppenberg (Jaws) 5 i Lesley Martina (Pitufos) 4.  Liga 60 tin 8 tim i ta rumbo pa di 2 buelta pa despues hunga play-off entre e promé 4 ekiponan sistema page.

* * * * *

Un tempu Jaws tabata e super kampion i tabata na aña 2016 i 2017 ku Los Amigos a kita e título. Na 2018 Jaws a bolbe bira kampion i despues tabata Nos Tambe Por ku a bira kampion 2019, 2020 i 2021 i na 2022 Jaws. Mas i mas èks pelotero ta djòin e liga i vários hungadó ku tin basta tempu sin move den e otro liganan ta disidí ku nan lo move den Liga 60 si.  Frank Curiel Ballpark ta perfekto pa e liga kaminda e distansianan entre home plate i outfield ta kòrtiku i naturalmente e fanátiko ta hopi serka di e wega. Awe nos tin e resultadonan di Liga 60 di weganan ku a tuma lugá djadumingu último na Frank Curiel Ballpark.

* * * * *

Ban pa Liga 50 kaminda e ekiponan ku a klasifiká pa play-off ya ta konosí. Ekiponan Baranka, Ban Serio, Jaws i Marlins ya a klasifiká. Pa loke ta sifranan individual den e kategoria di bateo (average) e situashon ta pèrtá faltando dos djasabra di kompetensia. Myron Wijman (Baranka) i Jair Josepha (Ban Serio ) tabata lider den bateo te ku siman pasá ku average di .735. Jair Josepha a bati di 1-1 i a terminá ku un averahe di .743 i Myron Wijman falta un wega mas ku Baranka ku chèns di por pasa Jair Josepha òf keda kòrtiku di e ‘race’ pa sali kampion bate. Myron mester bai di 2-2 pa pasa Jair Josepha.

* * * * *

Den homerun Sedeney ‘Spin’ Lourens di Baranka a terminá komo lider ku 12 homerun sigí pa Sherdon Rombley ku tin 11. Rombley no tabata na wega di Ban Serio djasabra último. Den RBI Rombley tin 35 kareda empuhá I Spin Lourens tin 32 ku chèns di pasa Rombley den e último wega di Baranka. Norman ‘Nonnie’ de Roon (Ban Serio) a bira kampion picher ku rèkòrt di 9 ganá i 0 pèrdí. Kenny Hellement ta sigi ku rèkòrt di 7-0. Kenny Hellement ta leshoná i parse ku e lo ta kla pa play-off. Nos ta keda te aki pa awe i te mayan ku Poder di Dios.

‍