Pitufos a sorprendé Baranka ganando 8 pa 6 den Liga 50

WILLEMSTAD- Pitufos a gana Baranka ku skor di 8-6 djasabra último den Liga 50.  Pitufos ku tabatin rekòrt di 2-4 promé ku e wega, a sorprendé e kampionnan di Liga 50 ku  tabatin rèkòrt di 3-2 promé ku e partido aki. Baranka a kometé 9 eror i tuma 7 kareda shushi na man di Pitufos. Pa Pitufos Naai Hooi a debutá den 2025 komo e picher den relevo. Den otro wega Marlins a gana Catpower/Raiders 9 pa 8 despues ku Catpower/ Jandoret tabata ariba 8-2 despues di 3 inning. Jaws a pasa fásil riba Lions ganando 12-2 i Sluggers a gana nan promé wega den Liga 50 di 2025 ku un viktoria di 12 pa 6. Standing den Liga 50 ta Ban Serio 7-1, Jaws 6-1, Marlins 6-2, Catpower/Raiders 4-2, Lions 4-3, Baranka 3-3, Piufos 3-4, Flamboyan 2-6 ,Sluggers 1-6 Artemisia 0-8.

Pitufos ku viktoria di 8-6 riba Baranka.

Pitufos 8, Baranka 6
Pitufos a bati 8 hit i a hasi 1 eror.  Johan Cicilia tabata e picher ganadó. Ela risibí relevo di Rignald ‘Naai’ Hooi.  Gerald Zimmerman i Omar Valies bati di 4-2.
Baranka e konektá 10 hit i kometé 9 eror.  Kenny Hellement tabata e picher pèrdèdó. Gregory Bito a bati di 3-3. Emeric Agatha i Tico Ramazan a bati di 3-2. Emeric Agatha tabatin un homerun.

Marlins 9, Catpower/Raiders 8
Marlins a dal 10 hit i a hasi 2 eror.  Richenel Candelaria a bati di 2-2, Gilford Schmidt a bati di 1-1.  Richenel Candelaria a bati  un 1 homerun.
Catpower/Raiders a konektá 8 hit i hasi  1 eror. Gino Valeriaan tabata a picher pèrdèdó. Rylan Capella a bati di 2-2.

Marlins a derotá Catpower/Raiders 9-8.

Jaws 12, Lions 2
Jaws a bati 10 hit i hasi 3 eror.  Fernando Rosario tabata e picher ganadó i e mes bati di 2-2. Sigbert Juliana tambe  a bati di 2-2.  Cedrix Valies a bati un homerun,
Lions a dal 5 hit i kometé 1 eror. Geralton Martha tabata e picher pèrdèdó.  Giovani Maduro a bati di 2-2. Herbert Lucas a bati di 1-1.

Jaws ku unifòrm nobo den 2025 a gana fásil di Lions.

Sluggers 12, Artemisia 6
Sluggers a dal 10 hit i hasi 5 eror. Eldert Bakker tabata e picher ganadó.  Ivan
Constancia a bati di 3-2. Normal Sloop di 1-1.
Artemsia a konektá 9 hti i hasi 1 eror.  Ericson Windster tabata e picher pèrdèdó i e mes a bai di 3-2. Raymond Bakboord tambe  bati di 3-2.

Kampionato di Liga 50 ta selebrá 25 aña di eksistendia i ta dediká na e eks presidentenan di Liga 50. Ta pendiente pa e fiesta djasabra awor de Hòfi Bill.


Fanátikonan di Deporte Kòrsou bondia i felis siman. Bon publiko djasabra mèrdia pa mira e wega entre Catpower/Raiders i Marlins. Wega ku Marlins a bini bèk den e wega i gana ku skor di 9 pa 8. Den otro wega djasabra ekipo Pitufos a sorprendé Baranka ganando ku skor di 8-6. Baranka a kometé 9 eror i tuma 7 kareda sushi.  Jaws a pasa relativamente fásil riba Lions i a gana 12 pa 2. Sluggers a gana nan promé wega di kampionato ku un viktoria di 12-6 riba Artemisia.  Djasabra awor tin dos wega programá ku a keda suspende luna pasá. Ta trata di Catpower/Raiders pa 12’or sigi pa Marlins vs Baranka pa 2’or.

Baranka no a start bon atrobe.


• * * * * *
Djasabra awor den oranan di anochi tin e grandioso fiesta na Hofi Bill kaminda ERA lo ta mano a mano ku Classic XD den un fiesta organisá pa Liga 50 di Sòftbòl. E fiesta aki ta den kuadro di selebrashon di 25 aña ku a funda Liga 50. Karchinan ta kabando, pero ainda tin karchi disponibel serka Rensley Martis di direktiva di Liga 50.  E fiesta aki ta di 9’or pm pa 3’or am djasabra awor. Kampionato ta sigi despues djasabra 2 di ougùstùs ku tres wega. 12;or Lions vs Pitufos, sigi pa  Baranka vs Sluggers pa 2’or. Finalmente pa 4’or Jaws vs Catpower/Raiders.

Dos wega djasabra i anochi fiesta.


• * * * * * *
Dia 9 di ougùstùs lo sigi ku weganan ku a keda kanselá.  Weganan riba e fecha menshoná pa 10’or ta Jaws – Ban Serio, 12.00 Flamboyan – Pitufos, 14.00 Sluggers -Catpower/Raiders. 16.00 Lions – Baranka. Den di dos buelta lo repartí e ekiponan den dos pul. E buelta ei tur ekipo lo hunga 4 wega. Na final di buelta number 2 lo wak e standing di e ekiponan bèk den un pul naturalmente.  Ekiponan 1,2,3 lo klasifiká dirèkt pa semi-final. Ekipo number 4 lo topa ku number 7, ekipo 5 lo topa 6 riba un djasabra. Ganadónan lo topa ku otro riba djadumingu pa e sigiente siman lo start ku e play-off 1 vs 4 i 2 vs 3. Esei lo tuma lugá djasabra i djadumingu.  No ta konosi ku final lo hunga riba djasabra so of djasabra i djadumingu.

Jaws na di dos lugá den Liga 50.


• * * * * *
Direktiva di Beisbòl Veterano enkabesá pa Gibi Denisia a baha djaweps 17 di yüli.  E direktiva tabata forma sra. Lourdes Beaumont i Beer Adelina huntu ku Gibi Denisia.  Gibi Denisia a pone tur kos kla pa e sigiente wikènt pa kosnan por kana i djasabra Veteranos di Otrabanda a gana Marlins 12-11 lagando e ekipo Marlins den tereno. Na momentu ku a start e último inning ekipo Marlins tabata ganá ku skor di 11-9. Jurseigh Leitoe a tira un tersio pa bira e picher ganadó.  Den e otro wega di djasabra Santa Rosa Memories a gana Azucar 6-3. Azucar tabata ganá te den di 3 inning pero Santa Rosa ta empatá i keda dilanti den e wega.  Azucar a kometé 5 eror i 5 di e 6 karedanan di ekipo Santa Rosa Memories tabata shushi.  Djadumingu Yesterday a gana Santa Maria 15 pa 7, wega ku a bai extra inning empatá na 7 i Yesterday a hinka 8 kareda den kabes 6 inning.  Quality a gana Broncos 6 pa 5.

Gibi Denisia tuma retiro.


• * * * * * *
Tin indikashon ku Ruisandro Cijntje, eks minister di Ekonomia i Turismo huntu ku Wimbert Hato lo keda drei e kampionato di BEVEKO pendiente pa organisá un elekshon pa bini ku un direktiva nobo. Tur kos lo keda den man di ekiponan ku mester tuma desishon ku ta sigi drei ku e komishon te ora kampionato kaba òf ta forma un direktiva nobo promé ku kampionato terminá. Liga 50 di Beisbòl Veterano ta pendiente pa start djadumingu awor ku dos wega. Pa 9.30 lo tin wega entre Jandoret Raiders i Santa Rosa Royals i despues Otrabanda kontra di Volcano pa 11.15.

Ruisandro Cijntje ta den e tim ku lo dirigí Beisbòl Veterano.


• * * * * * *
Na Hulanda (Zoetermeer), Dutch Lions a bira kampion di e Dutch Caribbean Women 35+ ganando e ekipo Rising Phoenix di Kòrsou ku skro feros di 18 pa 1. Un nòkout formal Rising Phoenix a risibí i tabata wega ku nos por a sigi via You Tube. Ekiponan di Dutch Caribbean, esta Aruba, Boneiru, Kòrsou i Sint Maarten a gosa un bòl aya na Hulanda i hopi hungadٕó, dirigente, fanátiko i nan famia a probechá pa keda algun dia mas na Hulanda, keiru i bishitá famia. Nos ta keda te aki pa awe, te mayan ku Poder di Dios.

Rising Phoenix, sup kampion.