Playoff Liga Amstel ta start awe, djasabra 28 di òktober

Playoff Liga Amstel ta start awe, djasabra 28 di òktober

WILLEMSTAD- Djasabra 28 òktober play-off Liga Amstel ta ranka sali. E ekiponan ku a klasifiká ta lo sigiente: 1 Gamers, 2 Thrillers, 3 Terepower i 4 X-Treme.
Liga Amstel  lo usa un sistema di play-off diferente e aña aki. Mirando ku e tempu ta kòrtiku, nos lo hunga un seri di best of 3 entre 1 vs 4 i 2 vs 3. E ganadónan lo enfrentá otro den final kual tambe ta best of 3 i e pèrdèdónan lo enfrentá otro pa determiná ken lo sali na di 3 i di 4 lugá.

Skema
Djasabra 28 di òktober
10.00 Terrepower – Thrillers
12.00 X-Treme – Gamers
14.00 Thrillers – Terrepower
16.00 Gamers – Xtreme

‍

Djasabra 4 di novèmber (si ta nesesario)
10.00 Terrepower – Thrillers
12.00 X-Treme - Gamers

The Brothers kontra Yesterday djadumingu awor den Beisbòl Veterano

WILLEMSTAD- The Brothers lo topa ku Yesterday djadumingu 10.30 den e último wikènt di Beisbòl Veterano. The Brothers mester gana e wega aki pa klasifiká komo number 6. Yesterday mester gana e wega aki i gana dos wega mas pa klasifiká komo number 6. Naturalmente tin 5 wega mas e wikènt benidero i djadumingu 9’or ekipo Sigi Hunga lo topa ku Jandoret Raiders den Liga 50 djadumingu awor.

‍

Djasabra 21 di òktober
Sta Maria Pirates 16, Azucar 1
Sta Maria a dal 13 hit i hunga sin eror. Irvin Sambo a gana. Raymond Allee, Amador Nita ku Raylen Francisca, tur a bai di 1-1. Eldred Estanista ku Irvin Sambo a bai di 2-1 i Ruben Snoyl a bai di 2-2. Roderick Zimmerman a bai di 4-3. Azucar tabatin 3 hit ku 2 eror. Nelson Reineta a pèrdè. Aldrich Groenenberg a bai di 1-1 i Fhurgeon Booy di 2-2.

‍

Quality Stars 8, Vosama 2
Quality tabatin 7 hit ku 1 eror. Felix Edword tabata ganadó. Ramiro Balentina ku Emile Haswell, ámbos a bai di 1-1. Raydel Isabella, Leroy Antonia i Rigmar Domatilia, tur di 2-1 i Dayron Puriel a bai di 2-2, inkluyendo 1 homerun. Vosama a dal 3 hit i hunga sin eror. Nimrod Thielman a resultá pèrdèdó. Minald Seferina a bai di 1-1.  Rochardo Davelaar ku Xaviero Avastia di 2-1.

Jandoret Raiders 16, Veteranos Otrabanda 7
Jandoret a dal 15 hit i hunga sin eror. Raylan Capella tabata ganadó. Jeffrey Martina ku Jersinio Fluonia a bai di 1-1. Deron Clara ku Mayron Martinus a bai di 2-1 i Carlton Daal di 4-2. Rashel Francisca ku Chervin Maduro a bai di 3-3 i Earl Virginia di 4-3.  Otrabanda tabatin 9 hit ku 1 eror. Edison Clemencia a resultá pèrdèdó. Norwin Moesquit, Gilbert Bernadina ku Edison Clemencia, tur a bai di 1-1. Signeth Janga, Bertyson Ignatia ku Lindsie Maccow, nan 3 a bati di 2-1 i Alcides Juliana di 3-2.

Djadumingu 22 di òktober
Sta Rosa Memories 7, Isla Crackers 2
Santa Rosa tabatin 8 hit sin eror. Ramses Jamanika a gana. Wilfred Reinita, Verney Jansen i Cedric Antonia, tur di 1-1. Djuric Pietersz ku Railison Isenia a bai di 2-1 i Raymy Cicilia di 3-2.  Isla a dal 7 hit i hasi 1 eror.  Michelangelo Celestina a pèrdè. Roderick Eustatius ku Giovertino Isebia a bai di 1-1 i Charlton Merite di 2-1. Jefferdion Polonius ku Julius Veeris a bai di 2-2.

The Brothers 15, Marchena Stars 0
The Brothers a bati 11 hit i kometé 1 eror. Signald Burnet tabata ganadó. Shuendell Rosaria ku Signald J. Burnet a bai di 1-1. Wendell v/h Kruys ku Signald M. Burnet a bai di 2-1. Richel Angela ku Ramsis Elisabeth a bai di 2-2 i Hubert v/h Kruys di 3-2. Marchena Stars tabatin 1 hit ku 5 eror. Jurien Martina a resultá pèrdèdó i Reugene Martis di 1-1.  

‍
 

3 hóben ta gana den e kompetensia di Yubi Evertsz batting Tunnel

Nos di “Yubi Evertsz Batting Tunnel” ta gradisí tur hende ku a yuda kontribuí na nos Fundraising di djasabra 14 di òktober 2023. E “7th Best Tragget Hitter Event” tabata un éksito rotundo atrobe.
Muchanan, hóbennan i adultonan di diferente edat a kompetí formalmente kontra otro.
“Yubi Evertsz Batting Tunnel” ta kontentu i gradisido ku  tabata tin 3 ganadó.

‍
Esakinan ta:
1) Shemarion Sophia Jacobus ta di e organisashon di Marchena. E tin 11 aña di edat, bishitando Sint Antonius College grupo 7A.
2) Jeviendrick Martis ta di e organisashon di Jandoret. E tin 9 aña di edat, bishitando Fatima College grupo 5.
3) Nathanael Jansen ta di e organisashon di Trai Seru. E tin 8 aña di edat, bishitando Albert Schweitzer School grupo 5C. Nathanael a logra dal e bòrchi 4 biaha e aña aki. Pues a gana 4 biaha den e diferente chènsnan ku e la haña. For di aña 2020 te ku 2023, Nathanael ta partisipando i a gana den tur e añanan aki.

Riba pòtrèt por mira Chal van Thijs di Yubi Evertsz Batting Tunnel, huntu ku e felis ganadónan.
Na man robes por mira Nathanael banda di Chal i na man drechi Jeviendrick, ku pèchi bistí.
Tambe por mira Shemarion huntu ku Chal. Pabien na tur e 3 ganadónan na nòmber di Yubi Evertsz Batting Tunnel.

MAS INFORMASHON DI SÒFTBÒL I BEISBÒL

Fanátikonan di Deporte Kòrsou, bon dia i felis wikènt. Nos ta bai den último wikènt di buelta regular di Beisbòl Veterano. E wikènt aki tin un wega hopi importante entre ekipo Yesterday i The Brothers djadumingu mainta 10.30 na Vi Jansen Ballpark. Ekipo the Brothers tin reķòrt di 10-11 i  Yesterday tin 8-11. Si The Brothers gana nan lo klinch puesto number 6 i play-off stail di Wild Card entre 5 i 6 pa despues ganadó kontra number 4 lo start wikènt di 4 i 5 di Novèmber. Si ekipo Yesterday gana mester warda Yesterday hunga dos wega mas ku a keda suspendé pa motibu di awaseru.

‍

* * * * *

Den e promé buelta ekipo The Brothers a gana Yesterday ku skor di 5-2 ku picheo di Byron Kook. Standing up to date faltando un wikènt pa buelta regular di Beisbòl Veterano terminá ta, Quality Stars 21-0, Santa Rosa Memories 16-4, Isla  Crackers i Santa Maria Pirates 15-5, Jandoret Raiders 12-9, The Brothers 10-11, Yesterday 8-11, Azucar 7-13, Vosama 7-13, Marlins 5-15, Otrabanda 4-16 i Marchena Stars 0-19. Awe nos tin resultadonan di Beisbòl Veterano.

* * * * *  

Pa loke ta trata sifranan individual di Beisbòl Veterano, nos tin Julius Veeris di Isla komo lider den bateo ku average di .625, ta sigi Roderick Zimmerman (Santa Maria Pirates) .585. Den RBI Roderick Zimmerman (Santa Maria) ta lider ku 30 RBI sigí pa Curby Brunken (Santa Rosa ) ku tin 23 RBI.  Orsendo Clemencia di Isla ta lider den ERA ku 1.11. Ta sigi Ramses Jamanika (Santa Rosa Memories) 2.43. Den ponche tirá Shanon Kleinmoedig (Marlins) tin 43 ponche tirá i Pernell Sprott di Yesterday ta sigi ku 42.

* * * * *

Djadumingu despues ku Jaws a bira kampion di Liga Van Engelen, tabatin entrega di premio na Van Engelen Ballpark. Jaws a risibí su premio  komo kampion, Swift supkampion, Clase Aparte di tres lugá. Di 4 lugá a resultá ekipo Navegantes. Kampion picher tabata Emilio Velarde di Swift, Ryan Emers di Clase Aparte tabata kampion bate i lider di homerun Geriyon Jakob (Clase Aparte). MVP di e play-off final tabata Jermaine Esprit di ekipo Jaws.

* * * * *

Liga 60 ta sigi ku 3 wega na Frank Curiel Ballpark pendiente pa play-off start. Tabatin varios wega ku a keda suspendé último simannan ku mester tuma lugá promé ku play-off start. E último weganan di buelta regular ta dia 5 di Novèmber i e sigiente djadumingu mester hunga e weganan ku a keda suspendé. Play-off lo mester start djadumingu 19 di Novèmber i chèns ta grandi ku weganan por terminá den luna di desèmber.

* * * * *

Djadumingu último tabatin solamente un wega den Liga 60. Ekipo Jaws a gana Nos Power ku skor di 11-8. Ekipo Jaws tabatin 12 hit i nan a hunga sin eror. Riley Toppenberg tabata e picher ganadó i Ruben Snoyl a bati di 3-3. Nos Power a dal 7 hit i a kometé 4 eror. Isaac Francees tabata e picher pèrdèdó i Richard Campagnard a bati di 1-1.  Weganan pa djadumingu awor ta 11.00 Nos Tambe Por vs Curacao Super Stars, 13.00 Pitufos kontra di Nos Power i Lions kontra Los Amigos. Standing no ofishal, loke nos tin ta Nos Tambe Por 11-1, Pitufos 9-3, Jaws 8-4, Nos Power 6-5, Lions 5-6, Los Amigos 5-8, Sluggers 4-7 i Curacao Super Stars 0-10.

* * * * *

Djabièrnè anochi a start ku World Series di Major League Baseball entre ekipo Arizona Diamondbacks i Texas Rangers. E dos ekiponan ku no tabata faborito a pasa pa e gran final di e mihó Beisbòl na Mundu. Ta trata di dos ekipo ku a yega World Series despues ku nan a klasifiká pa Wild Card. Ekipo Texas ta faborito leve pa bira kampion, miéntras Arizona Diamondbacks ta bini pa sorprendé.  Texas a gana 90 wega i pèrdè 62 den Liga Americana divishon West empatá ku Houston Astros, pero mester a bai hunga Wild Card debí ku Houston a gana e seri entre e dos ekiponan. Den e promé wega ekipo Texas Rangers a laga Arizona Diamondbacks den tereno ganando 6-5 riba homerun di Adolis Garcia den di 11 inning.

* * * * *

TeleCuracao lo transmití tur e weganan di Seri Mundial aki. Fanátiko di ekiponan grandi manera Yankees, Braves, Dodgers, Cardinals, Red Sox, Orioles, Astros, Reds ets., mester sinta trankil na kas i wak un ekipo nobo bira kampion. Diamondbacks tin un título lográ na 2001,  miéntras Rangers nunka a gana un World Series. Nos ta keda te aki pa awe. Te mayan ku Poder di Dios.