Playoff semi-final Liga 50 djasabra i Liga 60 djadumingu
Marlins vs Baranka i Jaws kontra Ban Serio djasabra den semi-final 50+
WILLEMSTAD – Semi-final 50+ ta start djasabra 2 di novèmber na Van Engelen Ballpark. Ekipo Marlins ku a terminá number 1 lo bai topa ku Baranka ku a kaba number 4. E wega aki ta 12’or di mèrdia i pa 2’or lo tin wega entre Jaws ku a terminá number 2 kontra di Ban Serio ku a terminá number 3. Djadumingu e seri Jaws vs Ban Serio lo hunga 12’or i Marlins / Baranka 12’or. Den kolumna nos tin resultado di wega entre e timnan aki durante kampionato regular. Awe nos tin resultado di e weganan di Wild Card di siman pasá kaminda ekipo Baranka a gana djasabra i djadumingu pa terminá number 4 di kampionato regular.
RESULTADONAN Liga 50
Djasabra 26 di òktober
Sluggers 9, Pitufos 8
Sluggers tabatin 18 hit ku 1 eror. Axel Gomez a gana. Raimy Pastor ku W. Isidora, ámbos a bai di 2-1. Axel Gomez a bai di 2-2, Abelino Julia di 3-2, N. Sloop di 4-3 i Victor Hernandez di 4-4. Pitufos a dal 11 hit i hasi 2 eror. Rignald Hooi a pèrdè i Alfonso Barbara a bai di 1-1. R. Josefa a bai di 2-1. G. Zimmerman, Norwin Moesquit, R. Zimmerman i J. Duggan, tur a bai di 3-2.
Baranka/Sharks 7, Flamboyan/Gamers 5
Baranka a dal 9 hit i kometé 3 eror. Kenrick Hellement tabata ganadó i Fisel Pereira a bai di 1-1. Emrick Agatha, Edmar Cornelia, J. Everon ku Dennis Dambruck, tur a bai di 2-1. Sendy Cras a bai di 3-2. Emrick Agatha a konektá 1 homerun. Flamboyan /Gamers tabatin 7 hit i nan a hunga sin eror. Rudney Garmers a resultá pèrdèdó. M. Cijntje i Vernon De Lanooi, ámbos di 2-1. G. Juliet di 3-2.
Baranka/Sharks 19, Sluggers 6
Baranka tabatin 19 hit ku 1 eror. Curtly Valeriaan a bai ku e viktoria. Gregory Reina, Curtly Valeriaan i Dennis Dambruck, tur a bai di 1-1. Edmar Cornelia i J. Everon, ámbos di 2-1. Fisel Pereira a bai di 3-2. M. Wijman, Ramiro Balentina i R. Koeyers, tur a bai di 3-3. Pa Sluggers 8 hit ku 4 eror. Eldred Bakker a karga ku e derota. N. Sloop a bai di 1-1. C. Curiel, H. Antonia, Victor Hernandez, R. Lieuw, Abelino Julia, A. Leito i H. Cicilia, tur a bai di 2-1.
Nos Tambe Por vs Lions djadumingu 2’or den semi-final 60+
WILLEMSTAD - Nos Tambe Por ku a kai vensí 5-4 kontra Jaws djadumingu pasá, lo topa ku Lions ku a gana Pitufos 4-0 siman pasá den un wega semi-final. E wega lo ta 2’or pm den Frank Curiel Ballpark. Ekipo Jaws ta den final pendiente di e ganadó entre Nos Tambe Por i Lions. E gran final lo start djadumingu 10 di novèmber. Awe nos tin numerito di e dos weganan ku a tuma lugá djadumingu último na Frank Curiel Ballpark.
Jaws 5, Nos Tambe Por 4
Jaws tabatin 5 hit ku 5 eror. Rigoletto Thode tabata ganadó. Raimy Pastor a bai di 2-1 i Rudsel Paulina a bai di 3-2. Nos Tambe Por a dal 7 hit i nan a hasi 3 eror. Angelo Boekhoudt a resultá pèrdèdó. Richenel Rafaela a bai di 1-1. Angelo Boekhoudt i Winston Kirindongo, ámbos a bai di 2-1. Hendrik Gabriel a bai di 3-2. Winston Kirindongo a konektá 1 homerun.
Lions 4, Pitufos 0
Lions a dal 5 hit i kometé 1 eror. Gregory Martijn a gana. Robert Trinidad, Raishel Leito ku Heinrich Wever, tur a bai di 1-1. Gensley Balborda a bai di 2-1. Pitufos tabatin 3 hit ku 2 eror. Juan Cicilia a pèrdè. Randell V Constancia a bai di 1-1 i Orsendo Clemencia a bai di 2-2.
MAS INFORMASHON DI SÒFTBÒL I BEISBÒL
Fanátikonan di Extra Inning, bon dia i felis wikènt. Fin di siman kandela ku play-off di Liga 50 i Liga 60 atrobe. By the way, Liga 40 ta start ku play-off djamars 5 di novèmber na Van Engelen Ballpark. E play-offnan ta sigi 7 di novèmber. Durante kampionato a hunga riba djaweps so, pero play-off ta hunga riba djamars i djaweps. Ekiponan ku a klasifiká den Liga 40 ta manera a spera, Gamers, Baranka, Swift i Cicoza. E play-off lo hunga sistema page. Ke mèn, Gamers vs Baranka 1 vs 2 i e otro promé buelta di play-off lo ta Swift 3 kontra Cicoza. Si ta nesesario lo hunga e wega number 3 di e promé buelta aki dia 12 di novèmber. Despues ta sigi pa semi-final.
* * * * *
Liga 50 ta start djasabra ku play-off na Van Engelen Ballpark. Den e promé wega ekipo Marlins (1) lo hunga kontra di Baranka (4) pa 12’or di mèrdia. Despues ta sigi Jaws (2) kontra di Ban Serio. Pa 2’or djadumingu ta ekipo Jaws kontra di Ban Serio ta hunga 12’or i despues Marlins vs Baranka pa 2’or. Si ta nesesario lo hunga wega(nan) number 3 djasabra 9 di novèmber. Djadumingu dia 10 di novèmber lo no tin wega i final ta start dia 16 di novèmber. Final lo hunga riba djasabra so na Van Engelen Ballpark naturalmente.
* * * * *
Den Liga 60 tin solamente un wega e wikènt aki. Liga 60 ta hunga solamente un wega den e play-offnan i ta final so ta hunga seri mihó di 3. Djadumingu awor pa 2’or pm ekipo Nos tambe Por ku a pèrdè e seri 1 vs 2 kontra Jaws lo topa ku Lions ku a gana Pitufos den e seri 3 vs 4. Pitufos ta eliminá i e ekipo ku pèrdè e wega di djadumingu awor tambe ta keda eliminá i e ganadó lo topa Jaws den final ku ta start djadumingu 10 di novèmber na Frank Curiel Ballpark. Djadumingu 17 di novèmber lo tin e di dos wega di e seri final.
* * * * *
Nos lo resumí kon a bai ku e ekiponan ku lo enfrentá otro den e play-offnan tantu di 50 komo di 60+ . Ban pa e seri di Marlins vs Baranka. Marlins a topa Baranka den e promé buelta i a gana ku skor di 8 pa 1. Den e di dos buelta Marlins a bolbe gana, e biaha ei ku skor di 11-7. Pa loke ta trata e weganan entre Jaws e ekipo Ban Serio durante kampionato, den e promé buelta ekipo Jaws a gana Ban Serio ku skor di 16-8. Den e di dos buelta tambe Jaws a gana, pero den e kaso aki pèrtá ku skor di 3-2. Play-off ta bai bira kayente djasabra 2 di novèmber na Van Engelen Ballpark.
* * * * *
Pa loke ta e ekiponan ku lo enfrentá otro den play-off semi-final di Liga 60, Nos Tambe Por a gana Lions ku skor di 4-3 den e promé buelta. Den e di dos buelta Nos Tambe Por a gana Lions 7-1. Awor ta play-off i tur kos ta start di nobo. Kandela djadumingu awor na Frank Curiel Ballpark ku ta kargá ku fanátiko tur djadumingu aya den Santa Maria. E kampionato a start den luna di mei i lo terminá probablemente den luna di novèmber. Na 2022 i 2023 e wega final tabata den desèmber, pero tin tur indikashon ku e aña aki si lo terminá den novèmber.
* * * * *
Ekipo Viajeros kargá ku hungadónan di Los Amigos lo biaha pa Medellin djadumingu 3 di novèmber i lo bini bèk djaluna 11 di novèmber. E ekipo lo partisipá na un torneo di Liga 60+ i hopi hungadó di edat mas abou tambe lo bai simplemente pa bai keiru un ratu i disfrutá di e tremendo suidat Medellin aya na Colombia. Paisnan ku tei lo ta Aruba, Kòrsou, Panama i varios ekipo di Colombia. E torneo ta start dia 6 di novèmber. Eksito na e delegashon ku lo biaha pa di dos aña konsekutivo pa Medellin. Pabien by the way na fanatikonan di Dodgers ku a bira kampion di Seri Mundial di Beisbòl. Nan a gana e seri di Yankees ganando di un manera sensashonal den wega number 5 djarason último. Pa Yankees i otro ekiponan suerte den 2025. Nos ta keda te aki pa awe i te djaluna ku Poder di Dios.
