Beisbòl i Sòftbòl - Potret i detayenan di Royal Scorpions kampion Yesterday a honra coach Win Benita i sifra Liga 50

Potret i detayenan di Royal Scorpions kampion Yesterday a honra coach Win Benita i sifra Liga 50

WILLEMSTAD - Royal Scorpions manera ta konosi a bira kampion pa di 19 biaha kontando for di 1965 ku tin e kampionnan registrá. Royal Scorpions a gana e último wega ku skor di 7 pa 5 i swip e seri final for di Santa Rosa Indians den 4 wega stret. Na 2016 nos tabatin e último swip den final di Beisbòl Dòbel A na momentu ku Wild Cats a swip Santa Maria. Weganan tabata 15-9, 17-3, 2-0 i 11-2. Rojean Cleofa tabata MVP.

‍

Royal Scorpions a gana e weganan di final 12 pa 4 djaweps 7 di sèptèmber, 13 pa 8 djasabra 9 di sèptèmber, 15 pa 8 djadumingu 10 di sèptèmber i 7 pa 5 djarason 13 di sèptèmber. Edinho Meyer ku a sali MVP di e final tabata lider den bateo ku un average di .533, produkto di 8 hit den 15 turno. Edinho a dal 2 homerun den final, tur dos homerun tabata klave pa Royal Scorpions. Den wega number 1 i 3 Edinho Meyer a bati homerun i empuhá 4 kareda. Di dos batiadó ku a bati bon den final ta Roderick Bernadina ku a bati .438. Roderick a dal tres homerun den final i empuhá 10 kareda. Roderick a dal homerun den wega 2, 3 i 4. Roderick tabata player of the game den wega number 4. Royal Scorpions a nota 47 kareda den final i ekipo Santa Rosa 25. Diferensia basta grandi den e swip ku a tuma lugá.

‍

‍
Roderick Bernadina a empuhá 10 kareda, sigí pa Sherman Lacrus ku a empuhá 6 empatá ku Raywendley van Gurp ku tambe tabatin 6. Den picheo Elchero Francisca i Myson Cathalina tabata 0.00. Royal Scorpions a dominá den ERA i den ponche tirá. Temesh Lourens ta lider ku 6 ponche sigi pa Cerilio Soleana ku 5, despues ta sigi Gedryon Basilia ku 4. Jordan Lucas tabatin 3 ponche tirá. E tremendo strategia tabata manda Myson Cathalina den wega number 3, kaminda Myson Cathalina a tuma dos kareda sushi den 4.1 inning tumando solamente 4 hit.

Royal Scorpions a dominá kompletu i tabata un tim super kompletu ku práktikamente dos ester na tur posishon, un picheo inkreibel bon balansá i un dje mihó kuerpo téknikonan den último añanan den Beisbòl. Manager ta Raymond ‘Mompi’ van Gurp, Bench coach ta Carlos Pineda, coach di tersera/ batting i all around coach Johnny Balentina, coach na primera tabata Djuric Pietersz i pitching coach ta Lo Celestina. Jordan Quan tabata coach di tersera, pero komo skout/agente e mester a move pa eksterior. Djuric Pietersz ta bini komo coach di primera, debí ku Rodney Michel ta den eksterior. Un kuerpo tékniko a Las Grandes Ligas. Esei ta hopi klave den éksito. Komo manager bo mester tin sostén pa kòrda riba e kambionan, e situashonnan i posibel moveshonnan. Di mes ta bo komo manager tin e último desishon. Royal Scorpions a selebrá en grande na e resort na Wiriweg despues ku nan a bira kampion, ke mèn den teritorio di Santa Rosa.

‍

‍

Yesterday a honra coach Win Benita i sifra Liga 50

WILLEMSTAD- Djasabra 9 di sèptèmber 2023, e ekipo di BBC YESTERDAY a duna un homenahe chikitu na su hungadó Erwin “Win” Benita. Esaki komo rekonosimento pa e bon trabou ku ela hasi komo coach kampion di Senior League Kòrsou, Karibe, Internashonal Mundial 2023. Esaki a tuma lugá despues di nan wega na vèlt di “Vi Jansen” den seno di su famia i hungadónan, entregando Win un plakat di mérito. Pabien Win pa e títulonan aki ku bo a logra komo coach, hasiendo tambe un tremendo propaganda pa Kòrsou.