Quality Stars kampion Beisbòl Veterano 2022
WILLEMSTAD- Quality ku viktoria di 15-4 riba Santa Maria Pirates a titulá kampion di Beisbòl Veterano 2022. Un públiko grandi tabata presente na Vi Jansen Ballpark i despues por a gosa i baila riba ritmonan di ERA. Quality a pèrdè e promé wega ku skor di 16-6 a bini bèk i gana e dos siguiente weganan 11-1 i 15-4. Hayzem Martina a gana tur dos wega di final i bira MVP di e seri final. Despues di e wega final tabatin entrega di premio na Vi Jansen Ballpark promé ku ERA kuminsá toka. Minister di Desaroyo Ekonómiko i Turismo sr. Cijntje, èks presidente di BEVEKO tabata presente i a entregá e kopanan.
RESULTADO
Quality Stars 15, Sta Maria Pirates 4(Liga 40)
Quality Stars a dal 16 hit i nan a kometé 2 eror. Hayzem Martina tabata picher ganadó. Rudolf Latina ku Ian Ignacio, ámbos a bai di 1-1. Vernon De Lanooi a bai di 2-1. Emile Haswell Jr ku Vernon Isabella, tur dos a bai di 3-2 i Merieldo Trinidad a bai di 3-3. Sta Maria Pirates tabatin 5 hit ku 2 eror. Amador Nita a resultá pèrdèdó. Ryan Ogenia a bai di 2-2 inkluyendo 1 homerun. David Kirindongo tambe a konektá 1 homerun.
Kampion: Quality Stars;
Sup kampion: Santa Maria Pirates;
MVP final: Hayzem Martina (Quality Stars);
Terser Lugá: Jandoret Raiders;
Kampion Bate: Lo a Tjong (Santa Rosa Memories);
Kampion Picher: Amador Nita (Santa Maria Pirates) 8-0;
Lider di Homerun: Kelvin Winklaar (The Brothers) 4 homerun.
MAS INFORMASHON DI BEISBÒL I SÒFTBÒL
Fanátikonan di Deporte Kòrsou bonochi i felis siman. Awaseru pisá a sigi riba djabièrnè i djasabra i hopi wega a keda suspendé pa motibu di mal estado di tereno. Wega final na Vi Jansen Ballpark si a sigi normal i ekipo Quality Stars a bira kampion ganando di Santa Maria ku skor di 15-4. Wega di final di Sòftbòl Femenino Dòbel A a keda suspendé djabièrnè, djasabra i djadumingu i wega lo sigi djabièrnè 18 di novèmber. Pichingolo ta dilanti di 2-1 den e seri i kon ku bai bini nan a bira faborito pa bolbe bira kampion di Kòrsou. Promé ku e seri nan no tabata faborito. Ekipo Souax a train zetá djarason na Bam Bam Tech i tin un picheo sólido pa por bira kampion. Pichingolo tin algun hungadó ku ta konektá e bala bon kua picheo ku bini.
* * * * *
Na momentu ku Pichingolo a haña Julise Koffy i e kècher Agard ku a bini for di Italia, kosnan a kambia i den e parti final di temporada a buska Michenou Marselia for di Boneiru ku tabatin algun hungada den gran forma den rightfield pa tene e wega serka. Wega 50+ di Sòftbòl entre Jaws i Flamboyan Tigers a bolbe keda kanselá pa motibu di awaseru i mal estado di tereno. Ta di dos siman sigí e wega ta keda suspendé. Ta for di 29 di òktober Baranka a gana Ban Serio den e di dos wega di semi-final i pasa pa final. E wega entre Jaws i Tigers ta programá pa tuma lugá djasabra 19 di novèmber pa 1.30 pm.
* * * * *
Wild Cats a bira kampion di Beisbòl Dòbel A den un wega di hopi diskushon ku a terminá den di 6 inning. Tabata di dos wega di play-off final ku ta terminá sin hunga 9 inning. Nos a tuma kontakto ku e presidente di FBEEKO ku ta Jedrek Magdalena. Sr. Magdalena a bisa nos ku ta ekiponan mes a vota pa no bai 9 inning si awaseru òf kualke asuntu fuera di boluntat para wega despues di 5 inning. Nos si ta boga pa pone ku tur wega den final of den play-off ta bai 9 inning. Por sigi e wega e sigiente fecha i terminá e wega ku mester sigi riba mesun fecha. En todo kaso un ke otro ta dependé e gastunan di FEBEKO i hopi detaye mas, pero ta ekiponan mes tabata pro pa no sigi e wega riba un otro fecha.
* * * * *
En todo kaso Wild Cats a bira kampion pa di 17 biaha i serka di yega Royal Scorpions ku tin 18 título. E ekipo ku ta sigi ta Santa Maria ku tin 11 título i Santa Rosa ku a bira kampion na 7 okashon. Alpha Zelbo tin 3 título i Blue Haws tin 1 título. E otro ekiponan no a logra bira kampion di Beisbòl Dòbel A. Remarkabel ta ku ta e ekiponan ku tin mas título ta bai play-off semi-final tur aña. Wild Cats, Santa maria, Santa Rosa i Royal Scorpions. Ekiponan Royal Scorpions i Santa Maria a invertí hopi, pero a keda kòrtiku. Difísil pa kompetí ku e manera ku Kenley Jansen ta invertí den ekipo Wild Cats.
* * * * *
Djadumingu tabatin wega kandela entre Pitufos i Nos Tambe Por. Nos Tambe Por a gana fásil ku skor di 16-5. Wega di liga 60+ ku ta halando bon públiko manera kustumber aya na Frank Curiel Ballpark. Nos Tambe Por lo topa ku Jaws djadumingu awor kuminsando un seri miho di 3. Jaws a zona un kampanaso djadumingu 6 di novèmber ganando di Nos Tambe Por ku a drenta play-off invikto ku rekòrt di 14-0.
* * * * *
Mièntras tantu play-off di Liga 40 ta sigi djaweps awor na Van Engelen Ballpark. Baranka a gana Gamers den e seri di 1 vs 2 ku skor di 7 pa 4 i Gamers a gana Swift 10 pa 3. Aña pasá Swift tabata kampion tras di un picheo inkreibel di Emilio Velarde Lugo. Parse ku Emilio Velarde a yega i e tabata presente na Vi Jansen Ballpark. Emilio Velarde tei mas ku 2 siman kaba na Kòrsou.
