Quality Stars kampion Beisbòl Veterano 2025
WILLEMSTAD- Quality Stars a gana Santa Maria Pirates dos biaha den wikènt pa bira kampion di Beisbòl Veterano 40+ di 2025. Un bon públiko tabata presente tantu djasabra komo djadumingu pa mira e dos weganan final. Djasabra Quality Stars a gana Santa Maria Pirates ku skor di 9 pa 8. Djadumingu den e di dos wega di e seri final mihó di 3 ekipo Quality Stars a gana di Santa Maria 5-4. Den tur dos wega Santa Maria Pirates tabata dilanti den e último inning.
Ekipo Kampion Quality Stars ta tuma trofeo.
Den e wega di djasabra Quality Stars a laga Santa Maria den tereno i djadumingu Quality Stars a bini bèk pa gana Santa Maria komo ekipo di bishita. Quality Stars a terminá e wega ku un tremendo double play saká pa segunda base Dimitri Leon pa shortstop Rydell Isabella pa e primera base Rhiency Imperator pa terminá e partido. Despues di e wega tabatin entre di premionan di ekipo i individual.
Kampion: Quality Stars.
Supkampion: Santa Maria Pirates.
MVP: Rodney Michel (Quality Stars).
Kampion bate: Cedric Gil (Marlins).
Lider di homerun: Betrand Peters (Santa Maria).
Kampion picher. Dayron Puriel (Quality Stars).
Kampion bate tabata Cedric Gil (Marlins), van Kimmenade ta tuma e trofeo.
Un Kara ta dal Shining Stars duru i bira kampion di Liga di Nos 2025
WILLEMSTAD0 - Ekipo Un Kara a presentá fuertísimo wikènt pasá i dal Shining Stars dos biaha pa nòkout i bira kampion Liga di Nos Tur 2025. E final di e liga femenino veterano 35+ aki a tuma lugá den Frank Curiel Ballpark, djabièrnè 24 i djasabra 25 di òktober. E promé wega a terminá ku skor di 16-1 i wega number 2 a kaba 13-1. E tersera base veteranísimo Valeria ‘Baby’ Christina a bati di 3-3 i 2-2 den e dos weganan i filea tremendo na tersera pa bira MVP di e gran final. Ekipo Shining Stars a keda na di dos lugá i ekipo Sin Stres mester a konformá nan mes ku puesto number 3. Despues di e wega number 2 ku tabata djasabra tabatin entrega di premio.
Kampion: Un Kara.
Supkampion: Shining Stars.
MVP: Valeria Christina, (Un Kara).
Kampion Bate: Rubia Adelina ( Un Kara)
Lider di homerun: Tanusia Delando (Sin Stres).
Kampion picher: Churmeline Eduarda (Shining Stars).
MAS INFORMASHON DI BEISBÒL I SÒFTBÒL
Fanátikonan di Deporte Kòrsou, bon dia. Awe nos tin resultado i resumen di final di Beisbòl Veterano i Liga di Nos Tur. Quality Stars a bira kampion den Beisbòl Veterano ganando di ekipo Santa Maria Pirates den dos wega sigí. Den tur dos wega Santa Maria Pirates tabata ganá pa diferensia di dos kareda. Te den último inning pero, na tur dos okashon Quality Stars a nota 3 kareda pa laga Santa Maria Pirates den tereno den wega number 1. Den wega number 2 nan a bai ariba ku un kareda den e último inning, pa despues saka double play i terminá e partido i e kampionato. Despues ku último out a kai, hungadó i fanátikonan a kore subi tereno pa selebrá e viktoria. Tabata di kuater biaha sigí i den 5 biaha den nan historia ku e ekipo fundá pa Jimmy Martina, Julien Ignacio, Gregory Zimmerman, Tyron de Palm i Dennis D’Arnault na aña 2011. Quality Stars ku a start poko slow a train serio e último lunanan i a demostrá esei durante e parti final di kampionato 2025. Di otro banda Santa Maria no a train dje serio ei i por skibi libremente ku esei tabata e diferensia.
* * * * *
Despues di wega tabatin entrega di premio na ekiponan i hungadónan individual. Awe nos kolumna ta mas kòrtiku debí ku nos tin detaye di e final di Liga di Nos Tur tambe. E gran final di Liga di Nos Tur a start wikènt pasá i ekipo Un Kara a bira kampion. Nos tabatin e informashon aki den e kolumna di djaluna último. Miéntras tantu Liga 60 a sigi djadumingu último dilanti bon públiko na Frank Curiel Ballpark. Den e promé wega den un sorpresa grandi Nos Tambe Por a gana Lions ku tabata invikto i den kabes ku rèkòrt di 14-0. Lions a start ku e velos picher Fernando Rosario ku no por a bini kla ku e line-up di Nos tambe Por. Lions no a logra konektá hit kontra di e picheo kombiná di Wim Felicia ku a tira 4 inning i despues Michelangelo ‘Galbou’ Boekoudt a relevá . Nos Tambe Por a konektá 14 hit den e wega ei kaminda e inning number 4 tabata grandísimo pa Nos Tambe Por notando 10 kareda. Den e otro weganan Nos Power a gana Mon Repos Sluggers 7 pa 3 i Los Amigos a gana Jaws 2-0. Nos ta keda te aki pa awe i te mayan ku Poder di Dios.
