Quality Stars ta dal Bulldogs 8-1 i pasa pa final di Beisbòl Veterano

Quality Stars ta dal Bulldogs 8-1 i pasa pa final di Beisbòl Veterano

WILLEMSTAD- Quality Stars ku bon picheo di Rydell Isabella ta gana Bulldogs fásil ku skor di 8-1 i klasifiká pa final di Beisbòl Veterano. Quality Stars lo enfrentá Jandoret Raiders djasabra awor 2’or den e promé wega di e gran final mihó di 3. Wega number 2 lo tuma lugá djadumingu 2’or. Tur wega lo tuma lugá na Vi Jansen Ballpark. Quality a nota 3 kareda den bòm di e di 3 inning kontra di e picher Bryon Kook, picher habridó pa ekipo Bulldogs. Esei a resultá di ta sufisiente pa gana e partido. Tabatin basta mal korementu di base di tur dos ekipo, espeshalmente ekipo Bulldogs.   Den e buelta pèrdèdó ekipo Marchena Stars a gana Vosama 7 pa 2 i bira kampion di e buelta pèrdèdó.

NUMERITONAN
Quality Stars a skor na 8 okashon, bati 8 hit i kometé 4 eror. Rydell Isabella a gana i Vernon de Lanoi a bati di 2-2. Bulldogs a skor na un okashon, bati 7 hit i hasi 2 eror. Bryon Kook tabata e picher pèrdèdó i Kelvin Winklaar a bati di 2-2.

Marchena Stars 7, Vosama 2
Marchena Stars a konektá 10 hit i kometé 1 eror. Jair Josepha tabata e picher ganadó i e mes a bati di 3-3. Vosama a a konektá 4 hit i kometé 2 eror. Felix Ibañez tabata e picher pèrdèdó. Charlton Daal i Cedrix Valies a bati di 3-2.

‍