Quality Stars ta klasifiká pa final di Beisbòl Veterano i skema di Curacao Baseball Week
WILLEMSTAD- Quality Stars a gana Jandoret Raiders den dos wega stret i klasifiká pa final di Beisbòl Veterano. Quality Stars a gana Jandoret Raiders 10 pa 0 i 10 a 1 den wikènt. Den e otro seri Santa Rosa Memories i Isla Crackers a splet. Santa Rosa a gana djasabra 4 pa 1 i Isla Crackers a derotá Santa Rosa 16 pa 8 djadumingu. Wikènt benidero lo tin wega desisivo entre Santa Rosa Memories i Isla Crackers. Nos tin numerito di e weganan di wikènt.
Djasabra 18 di novèmber
Quality Stars 10, Jandoret Raiders 0
Quality tabatin 10 hit sin eror. Dayron Puriel a gana. Ramiro Balentina i Railison Gijsbertha a bai di 2-1. Raymond Leonora a bai di 3-2 i Dayron Puriel di 4-4. Pa Jandoret a dal 2 hit i hasi 2 eror. Fisel Pereira a pèrdè. Earl Virginia ku Rigobert Cijntje a bai di 2-1.
Sta Rosa Memories 4, Isla Crackers 1
Sta Rosa a dal 5 hit i kometé 1 eror. Ramses Jamanika tabata ganadó. Reginald Pietersz i Jair Quant a bai di 2-1. 3 hungadó di 3-1. Isla tabatin 8 hit ku 3 eror. Roderick Eustatius a resultá pèrdèdó. Rainier Martis ku Luigino Domacasse a bai di 1-1 i Rodney Riley di 3-2. 4 hungadó a bai di 3-1.
Djadumingu 19 di novèmber
Isla Crackers 16, Sta Rosa Memories 8
Isla tabatin 13 hit ku 1 eror. Stanford Landburg a gana i Luigino Domacasse a bai di 2-1. Dave Janga ku Stanford Landburg a bai di 3-2. Jair Josepha, Quincy Kook ku Enrique Kroon, tur a bai di 4-2. Dave Janga, Jair Josepha ku Enrique Kroon, tur a konektá 1 homerun. Pa Sta Rosa 8 hit ku 2 eror. Verney Jansen a pèrdè i Railison Isenia a bai di 1-1. Wilfred Reinita, Djonny Joubert, Michelangelo Cijntje i Randy Lo-A-Tjong, tur a bai di 2-1 i Shendy Cras a bai di 3-2. Michelangelo Cijntje a konektá 1 homerun grand slam.
Quality Stars 10, Jandoret Raiders 1
Quality a dal 13 hit i hunga sin eror. Farly Ignacia tabata ganadó. Ramiro Balentina ku Dayron Puriel a bai di 2-2. Raydel Isabella ku Raymond Leonora di 3-2, Merieldo Trinidad di 4-2 i Rodney Michel a bai di 5-2.
Jandoret tabatin 6 hit i nan a hunga sin eror. Raylan Capella a resultá pèrdèdó. Earl Virginia ku Deron Clara a bai di 1-1 i Rayshel Francisca a bai di 4-2.
MAS INFORMASHON DI BEISBÒL I SÒFTBÒL
Fanátikonan di Deporte Kòrsou felis fin di siman. Nos tin hopi informashon awe, entre otro di Beisbòl Veterano ku a sigi ku semi-final wikènt pasá dilanti bon públiko aya na Vi Jansen Ballpark. Den e promé wega ekipo Quality Stars a dal Jandoret 10-0 den 6 inning. Den e otro wega di semi-final ekipo Santa Rosa a gana di Isla Crackers ku skor di 4 pa 1 den un bon partido. Ramses Jamanika tabata tremendo pa Santa Rosa tirando wega kompletu i di otro banda Roderick Eustatius a tira bon pa Isla Crackers, pero e no a risibí respaldo di su defensa ku kometé 3 eror krusial. Santa Rosa a nota 4 kareda di kual 3 tabata shushi kontra di Roderick Eustatius.
* * * * *
Ramses Jamanika a tira 7 inning kompletu, tuma 8 hit i 1 kareda. E kareda tabata shushi miéntras Ramses Jamanika a tira 8 ponche. Roderick Eustatius a tira 6 inning, tuma 5 hit, 4 kareda (1 limpi) i tira 5 ponche. Isla Crackers a start djadumingu bon i nan tabata ganá ku skor di 8-0 den di 3 inning. Nos a traha e kolumna aki promé ku dos weganan di djadumingu terminá. Juny Obispo ta manager di Isla Crackers i Shendy Cras ta manager pa Santa Rosa Memories. Pa loke ta trata e otro seri, Jeffrey Martina ta manager di Jandoret Raiders i Jimmy Martina manager pa Quality Stars. Isla a hasi un kambio djadumingu i a manda Luigino Domacasse tersera base na lugá di Giobertino ‘Tino’ Isenia.
* * * * *
Baranka a bira kampion di Liga 40 djawpes i den nos edishon di djasabra tabatin detaye i pòtrèt. Edmar Cornelia manager di ekipo Baranka 40+ ta super kontentu ku ela bira manager na komienso di temporada i bira kampion invikto i ku ekipo Baranka 40+. Boy a bisa ku probablemente ta su promé i úniko temporada komo manager di Baranka. Boy Cornelia a kòrda nos ku e tabata manager di Cicoza i nan a bira kampion kasi invikto. E ekipo Cicoza a pèrdè solamente un wega na 2010 i bira kampion di Liga Un i Tur. Baranka a saka kara den Liga 40, despues ku nan a pèrdè nan título di 50 ku e ekipo Ban Serio den luna di òktober. Baranka tabata kampion 2022 i 2021. Na 2020 no tabatin kampionato i Ban Serio tabata kampion 2019, 2018 i 2017.
%20copy.jpg)
* * * * *
Baranka a sinti hopi falta di nan picher estelarísimo Kenny Hellement ku ta leshoná pa basta luna. Nos a mira Kenny Hellement djasabra na wega di Beisbòl Veterano, ke mèn Kenny lo ta rekuperando. Basta kambio menshoná pa loke ta trata Liga 50 den 2024. Ekiponan Artemisia, Catpower i Lions ta pendiente pa reforsá. Basta moveshon den Marlins pa buska algun hóben pa kompetí mas fuerte. Pa loke ta trata e kampion Ban Serio, Jerry Booi tei sigur fuerte den 2024 i despues ta wak. Baranka ta fuerte kaba i nan ke reforsá nan picheo ku mas picher huntu ku Kenny Hellement, Gino Valeriaan i Ons Garmers. By the way den Liga 60 tambe tin masha moveshon den grandinan di e liga.
* * * * *
Skema pa loke ta trata play-off page system di Liga 60 ta konosí. Ekiponan ku a klasifiká ta Nos Tambe Por, Jaws, Pitufos i Nos Power. Djadumingu 19 di novèmber mester tabatin dos wega ku lo no trese kambio den ekiponan ku a klasifiká, pero si den e standing. Djadumingu Pitufos a gana Lions 7 pa 5 i Sluggers a gana Curacao Suepr stars 4-1. Play-off ta start djadumingu 26 di novèmber, ke mèn konta ku final lo hunga den desèmber atrobe. Weganan ta, 12’or Nos Power vs Jaws i 2’or Nos Tambe Por kontra Pitufos.
* * * * *
Cicoza ta pendiente pa organisá un torneo grandi for di yanüari te ku mart na Van Engelen Ballpark segun rumornan ku nos a tende. The Greatest no tin plan pa organisá torneo tradishonal den luna di yanüari i febrüari. Despues ta sigi Torneo Hope ku lo bai terminá komienso di mei, pa liganan 40, 50, Van Engelen i Amstel start. E aña aki tin Classico 40+ na Kòrsou parse. Liga 50 ABC lo ta na Aruba i 60+ ABC na Aruba i Boneiru. Nos ta keda te aki pa awe. Te mas aki ratu ku Poder di Dios.
