RBC a entregá bala na ekiponan di Tball i Pre Minor
WILLEMSTAD – Djasabra 3 di mei 2025, RBC Royal Bank N.V. (RBC) a entregá bala na representantenan di organisashonnan di Beisbòl Little League di Kòrsou. Ta trata di dirigentenan di ekiponan riba nivel T-ball (5-6 aña) i Pre Minor 7-8 (aña). E entrega di bala aki a tuma lugá na Ricardo Elhage Ballpark.
Promé ku e enkuentronan di e kampionato T-ball /Pre Minor, Curacao Little League Baseball Foundation den estrecho koperashon ku Fairplay ku ta organisá e kampionato 2025, a entregá un gran kantidat di bala na ekiponan. Sharier Dorand, Branch Manager kende a representá RBC a entregá e balanan menshoná den presensia di District Administrator Urny Floran i Rendel Meulens di Fairplay i representantenan di ekiponan di Fairplay/Curacao Little League.
Resientemente Curacao Little League i Fairplay a firma un akuerdo di koperashon kaminda Curacao Little League Baseball Foundation ta sostené Fairplay den organisashon i kontribuí ku material. Durante e entrega di bala Sharier Dorand di RBC, District Administrator Urny Floran i Rendel Meulens di Fairplay a hiba palabra.
E entrega di bala ta konforme e kontrakt ku RBC ta firma ku liganan di Little League. Fuera e sosten finansiero komo parti di spònser prinsipal di e kampionato i liganan, RBC ta aportá na proyektonan manera klínika pa umpire, kongreso, upgrade di coachnan, mayor i dirigentenan i e hóbennan. Ta pendiente pa entregá unifòrm na selekshonnan den luna di yüni .
