RBC ta entregá unifòrm nobo na umpire i skorer di Beisbòl Little League
WILLEMSTAD - Djarason 12 di aprel 2023, spònser prinsipal di Little League RBC Royal Bank a entregá unifòrm nobo na umpire i skorernan di Beisbòl Little League durante un enkuentro na sede di FFK na Brievengat.
Sr. Sharier Dorand Branch Manager di RBC a dirigí palabra i a entregá e unifòrmnan simbólikamente na Sendley Martina ku ta hefe di e umpirenan den presensia di District Administrator sr. Floran i algun umpire i skorer. Sr. Dorand a mustra riba e importansia di umpire- i skorernan pa desaroyo di Beisbòl Little League. Dorand tabatin masha apresio pa e trabou boluntario ku e umpire i skorernan ta hasi i a yama nan danki.
“RBC tin un historia largu den Karibe i nos ta orguyoso di e relashonnan ku nos a forma den e komunidat, entre otro ku Curaçao Little League. Nos tur ta hunga un rol pa yega na un miho Kòrsou. Komo parte di RBC su vishon e banko ta sigui invertí den Beisbòl Little League ku ta yuda forma nos hóbennan komo siudanonan ehemplar i lidernan di futuro” asina Dorand a bisa.
Sr. Urny Floran District Administrator tambe a dirigi palabra durante e enkuentro i a uni su mes na sr. Dorand i gradisí umpire i skorernan. Hefe di umpire sr. Sendley Martina i player agent Norval Faneyte tambe a dirigi palabra.
ENKUENTRO KU UMPIRENAN
Djarason 12 di aprel tabata e fecha ku a reuni ku umpirenan i skorer pa splika di reglanan nobo i reglanan di kas rumbo pa play-off 2023. Resientemente a sinta ku dirigente, manager i coachnan. Durante e enkuentro umpire i skorernan por a hasi pregunta riba e reglanan i mas detaye. Sendley Martina i Norval Faneyte a duna splikashon amplio na umpire i skorernan den presensia di District Administrator i sr. Sharier Dorand di RBC Royal Bank .
