RBC ta sigi apoyá desaroyo di Hubentut
RBC ta firma kontrakt ku liganan di Little League
WILLEMSTAD RBC Royal Bank N.V. a firma kontrakt di spònser ku Curacao Little League Foundation, Liga Pabou, Liga Pariba, Liga Willemstad i Liga T-Ball/Pre Minor di Little League Beisbòl.
Ta di 21 aña konsekutivo ku RBC ta spònser Little League Beisbòl. E firmamentu di kontrakt aki mester a tuma lugá den e promé lunanan di aña, pero manera ta konosí, Kòrsou i rònt Mundu ta konfrontá den 2021 tambe ku e pandemia COVID-19 ku a opstakulisá basta moveshon di deporte.
Pierrot Hurtado, Managing Director di RBC Royal Bank N.V. ta bisa: “Awor mas ku nunka nos
mester keda fókùs riba e formashon i edukashon di nos Hubentut. Rònt Mundu i tambe na Kòrsou e krísis di corona a afektá e kondishonnan finansiëro i ekonómiko. No opstante esaki, RBC ta keda komprometi na nos hóbennan di Kòrsou. Apesar ku no tin e biahenan pa kompeti den eksterior, ku ta pisa hopi riba e presupuesto di Little League Foundation, tòg RBC Royal Bank a mantené e suma di sponser di e añanan anterior pa por inverti mas den formashon di e hendenan envolvi den Little League, espeshalmente e hóbennan di Little League. Manera ta pasando aworaki den e kongreso aki kaminda ta forma nos lidernan di Little League, Curacao Little League Foundatio I RBC Royal Bank a presentá un programa adapta debi na Corona Virus, entre otro Training/upgrading di umpire ku a tuma lugá den Ougùstùs i Sèptèmber.
Pierrot Hurtado a duna elogio tambe na Curacao Little League Foundation ku a duna honor na Victor Elhage ku a traha masha hopi aña boluntariamente pa Little League. Pierrot a bai den tempu i bisa ku foi tempu e tabata chikitu i tabata mira Victor Elhage komo dirigente di Little League. RBC Royal Bank a keda den kontakto ku CLL pa haña un solushon adekuá pa nos por sigui apoyá nos deportistanan den e temporada di COVID-19 I CLL a presentá un programa adaptá.
RBC, huntu ku District Administrator i Curacao Little League Foundation a mobilisá i bini ku un plan i proyekto nobo p’asina garantisá kontinuashon di Little League den 2021. E proyektonan ta konsistí entre otro di klínika/tayer di Beisbòl tantu riba tereno práktiko komo mental pa e hóben, coach, dirigente i mayornan. E kategoria Baby, T Ball, Pre Minor lo siguí manera planiá. RBC lo bai spònser torneonan tradishonal di e di dos mitar di aña manera entre otro Torneo Creme de La Creme (Minor i Little League), Shon Ki Nicasia Junior Tournament i Torneo Vernon Isabella. E aña aki atrobe tin diferente tim ku no tin spònsor i einan RBC tambe lo duna sostén finansiëro, pa unifòrm inkluso material di entrenamentu. RBC, manera nan a bin ta demonstrá e último 20 añanan aki, tei huntu ku CLL, pa yuda nos Hubentut, tambe den e tempunan di reto aki.
Representantenan (Presidente) di e diferente liganan, District Administrator i RBC a firma e kontrakt durante di e kongreso organisá pa Curacao Little League Foundation na Mancamp di Isla. E aña aki mester tabatin un kampionato di Minor Little i Intermediate League den Stadion Post 6 den luna di yüli. Aki tambe RBC tabatin su aporte finansiëro reservá pa kubri gran parti di e torneo menshoná, pero e motibunan di kanselashon ta konosí (Covid-19).
RBC den su afan pa yuda forma Hubentut komo nos futuro di mayan, ta sigui spònser Beisbòl Little League. RBC ta sumamente orguyoso di ta un patrosinadó prinsipal yudando mas ku 1300 hóben ku ta praktikando e deporte Beisbòl. E filosofía di Little League ta kuadra ku e filosofía di RBC, esta, formashon di hóbennan ku ta e pilánan di desaroyo di Kòrsou, Aruba , Boneiru i Sint Maarten. RBC ta spònser Little League na Aruba, Boneiru i Sint Maarten tambe.
PATROSINADO
E kontribushon (spònser) di RBC ta destiná entre otro, pa kubri gastunan relashoná ku representashon den eksterior, material, drechamentu di tereno, seminario i unifòrm.
Mester apuntá ku for di aña ku RBC a kuminsá patrosiná Little League, éksitonan den eksterior a kuminsá:
2002 Senior Kampion Mundial;
2004 Little League Kampion Mundial;
2008 Junior League Kampion Mundial;
2018 Senior League kampion Mundial;
2005 supkampion Mundial Little League;
2019 supkampion Mundial di Little League;
2019 supkampion Mundial di Senior League;
Den semi-final di Kampionato Mundial Senior League 2003;
Presidente di Liga Pabou Eugene Sambo I Sra. Marelva Clementina I presidente di Liga Willemstad ta firma kontrakt na nòmber di nan liga.
Semi-final di Mundial Little League 2001, 2002, 2003, 2005 i 2007;
Ganadó kampionato di Karibe i partisipashon den Mundial di Little League na Williamsport di 2001 te ku 2009 i despues na 2012, 2016 i 2019 tambe;
2014 Ganadó di kampionato Latino Americano den divishonnan Junior, Senior i Intermediate;
2015 Kampion Junior i Senior;
2016 Kampion Intermediate i Big League;
2017 Kampion Klásiko Latino di Beisbòl Hubenil;
2018 Kampion Karibe di Senior League ;
2019 Kampion di Karibe di Senior;.
2019 Kampion di Little League.
