Resultado Futbòl FFK i Dick Advocaat mester a move urgente pa Hulanda
WILLEMSTAD- Futbòl FFK a sigi ku dos wega djasabra 15 di novèmber 2025 den Stadion Jean Francisca. Centro Barber a gana di Atletiko Salinja 2-0 i Centro Dominguito a derotá Undeba 2-1. Djadumingu 16 di novèmber ta Inter Willemstad kontra Jong Holland pa 5.30 pm i despues pa 7.45 pm ta Jong Colombia kontra SUBT. I nos tin e notisia ku Dick Advocaat mester move pa Hulanda pa motibunan familiar.
NOS 'BONDS COACH' DICK ADVOCAAT MESTER BIAHA PA HULANDA URGENTE PA MOTIBUNAN FAMILIAR!
Nos selekshon nashonal lo tin ku hunga e partido desisivo pa kualifikashon kontra Jamaica sin Dick Advocaat riba banki. Nos ‘bondscoach’ lo biaha bèk pa Hulanda pa motibunan familiar.
Nos selekshon, bou di guia di e éksitoso ‘bondscoach’ Advocaat, ta na un paso pa kualifiká pa Mundial. Un empate djamars anochi na Kingston mes lo ta sufisiente pa e logro grandi aki. Advocaat lo tin ku sigui e partido importante aki riba distansia. E ‘coaching’ na Jamaica lo keda den man di e entrenadónan asistente Dean Gorré i Cor Pot.
E staf tékniko lo keda den kontakto serkano ku Advocaat, ku awe mèrdia a informá tantu e staf komo e hungadónan di su desishon pa bolbe pa Hulanda. “E ta un desishon sumamente difisil pa laga e mucha hòmbernan aki atras,” Advocaat a deklará. “Ku doló na mi kurason mi a mester tuma e desishon aki, pero famia ta mas importante ku futbòl. For di Hulanda lo mi keda den kontakto ekstenso ku e staf tékniko i mi tin konfiansa kompletu den mi grupo di hungadónan.”
E kapitan Leandro Bacuna tambe a papia ku e ekipo ora ku Advocaat a hasi su desishon konosí i a deklará lo siguiente; “Laga esaki bira un stimulashon èkstra pa nos tur. Awor ta ora pa nos demostrá ku nos ta un famia! Nos lo no hunga solamente pa nos mes òf pa nos isla, pero awor nos lo hunga pa nos ‘coach’ tambe!”
