Resumen 2023Nos Tambe Por Baranka i ADC kampion Torneo Survivors
WILLEMSTAD- Awe nos ta start ku resumen di Slowpitch i Beisbòl den 2023. Den e artíkulo nos lo tin e kampionnan, miéntras ku den kolumna nos lo skibi tur otro detaye di 2023. E promé torneo tabata Torneo Survivors/The Greatest i tabata ekiponan Nos Tambe Por den 60+, ekipo Baranka den 50+, ekipo Among Us den Maskulino Speshal, Selikor den Soshal Maskulino i ADC den COED. Nos tin pòtrèt di e kampionnan i algun hungadó individual ku a bira MVP.
LIGA 60: Kampeon: Nos Tambe Por;Jaws supkampion 60+;Hungadó Mas Balioso, Percy Schoop.
LIGA 50: Kampeon: Baranka / Sharks;Jaws supkampion 50+;Hungadó Mas Balioso: Kenrick Hellement.
Maskulino Spesial: Kampeon: Among Us;Chonchi’s supkampion Soshal Maskulino Speshal;Hungadó Mas Balioso: Jason Kleinmoedig.
Sosial Maskulino:Kampeon: Selikor; SBAB supkampion Soshal Maskulino;Hungadó mas Balioso: Ruwel Matrona.
COEDKampeon: ADC;
SOAB supkampion COED; Hungadó mas Balioso, Javier Mardenborough MVP
MAS INFORMASHON DI SÒFTBÒL I BEISBÒL
Fanٲátikonan di Deporte Kòrsou bondia. Kon ta bayendo ku Bispu di Pasku? Awe nos ta start ku e parti di resumen pa loke ta trata Sòftbòl i Beisbòl na Kòrsou i region. Nos ta repasá e kampionnan i naturalmente e momentunan importante pa nos den 2023. Siman pasá nos a skibi algu di e kampionnan di Torneo Survivors, e promé torneo tradishonal di Slowpitch na komienso di aña. Pa 2024 e prestigioso ekipo Cicoza lo tuma over i ta organisá e tradishonal Amstel Bright Premier Cup su di 10 edishon.
Ban pa detayenan di 2023. Dia 8 di yanüari ekipo Sin Strès ku ta kompetí den Sòftbòl Femenino Veterano a selebrá 5 aña di eksistensia na Aishel Hooi Ballpark. Nan a boutisá unifòrm nobo tambe. E selebrashon i boutismo a tuma lugá despues di un Santu Sakrifisio di Misa na Misa di Soto. Den oranan di atardi representante di spònser Dusron a entregá simbólikamente e unifòrm na dirigentenan di e ekipo, e rumannan Tanusi i Anoushka Delando. Sin Strès tabata den gran forma den 2023 birando kampion di Liga di Nos Tur lagando e super kampion Un Kara nan tras.
Ekipo Jaws a kuminsá move foi tempran den yanüari 2023 i a anunsiá ku nan lo tin grandinan na kaminda, entre otro Remick Bernadina i Tyron de Palm. Hungadónan manera Rudsel Wilson, Fransje Lambertina i Rudsel Schmidt a primintí di baha man un tiki na 50+ i lo bai dediká mas na 60+. Esei a resultá eksitoso i e ekipo Jaws a bira kampion pa di dos biaha sigí den Liga 60 djadumingu último ganando di Pitufos den dos wega stret. Varios moveshon den Liga 60 rumbo pa temporada 2024. E ekipo ku ta moviendo duru mes ta Los Amigos. E ekipo a move pa Medellin den luna novèmber i a mara varios hungadó stail manera ekipo MLB ta mara prospektonan.
Los Amigos a mara Song Sophia i Den Den Casimiri di Nos Tambe Por. Los Amigos ta tras di Emile Haswell di Nos Tambe Por. Los Amigos ta tras di Siegfried Lopez tambe di Nos Tambe Por. Reinaldo Casimiri tambe ta mará faltando 3 aña pa yega 60 aña. Nos a mira èks hungadó di Los Amigos Cedric ‘Secho’ Curiel tambe riba pòtrèt na e sera aña di Los Amigos. Den 2023 Secho a hunga ku ekipo Pitufos i den 2022 Secho tabata ku Jaws. Nos lo sigi e moveshonnan den Liga 60 di 2024 djaserka. Ekipo Jaws tabatin Pin Wijman ku tabata den Nos Tambe Por den 2022. Marvin ‘Pin’ Wijman resultá klave den e ekipo hungando shòrtstòp komo regular i hasiendo un bon trabou. Ekipo Jaws tin Elston Simmons komo konsehero mayó i tabata bench coach pa Jaws.
Pa sigi ku resumen di notisianan di 2023: Ekiponan di 50+ a kuminsá mobilisá foi tempran den 2023 i varios tim tabata duru tras di 3 di e grandinan ku a kaba di kumpli òf ta kumpli 50 aña den 2023. Jaws tabata tras di 3 grandi aki ku ta Kelvin Winklaar, Eldred ‘Sabalo’ Estanista i Jair Josepha. Finalmente mr. dr. Jerry Booi a pasa kita tur e 3 hungadónan aki for di Jaws cq Baranka. Ban Serio a bira kampion fin di òktober riba Baranka kaminda e 3 hungadónan aki a pone pelíkula pa e ekipo Ban Serio di Jerry Booi. Ban Serio a bira kampion despues ku pa 2 aña e título tabata den man di Baranka.
Torneo Fundashon Akademia di Beisbòl Brievengat (FABB) a start na komienso di 2023. E torneo a start ku un tremendo desfile enkabesá pa brassband. Mester a wanta e desfile un ratu debi na awaseru. Despues ku awaseru a wanta bon a sigi desfile, seremonia i homenahe na sr. Roland ‘Gengoe’ Hooi a sigi. Den presensia di dirigentenan di FABB, representante di Minister di Deporte i naturalmente Gengoe Hooi ku a konta vários anekdota i parti di su historia. Gengoe Hooi ta un di esnan ku tabatin previlegio di bai Springfield College pa tuma klínika di Beisbòl den añanan 70 i komienso di añanan 90. Gengoe Hooi ta un dje pokonan ku bai Springfield College na dos okashon. En todo kaso vários ekipo di Liga Pabou tabata afó debí ku faltando 3 dia nan a tende ku tin e torneo. Ban spera ku invitashon a sali tempran ku e biaha aki Torneo FABB 2024, lo tin partisipashon di mas ekipo di Liga Pabou. Nos ta keda te aki pa awe Bon Pasku i kòrda bai poko poko den nòmber di Dios.
%20copy.jpg)
