WILLEMSTAD- Awe nos lo resumí varios ekiponan ku a bira kampion den 2021. Ya nos a skibi di Un kara den Sòftbòl Femenmino Veterano (Liga di Nos Tur) i Santa Maira Pirates den Beisbòl Veterano 40+. Awe nos tin kampionnan di Liga van Engelen, Liga Amstel, Liga 40 i 60.
Swift kampion Liga 40
Swift ku tremendo picheo di Emilio Velarde Lugo a bira kampion di Liga 40 di 2021 djaweps 28 di òktober den Van Engelen Ballpark, ganando di Crazy Tigers 7-1. E promé wega di e seri final a terminá 2-0 na fabor di Swift. E Venesolano Emilio Velarde Lugo ku a gana e promé wega di e seri a picha wega number 2 tambe i bolbe gana pa bira MVP di e seri final. Den e promé wega Emilio Velarde Lugo a tira 12 ponche i djaweps último 8 ponche pa silensiá e bateria di Crazy Tigers.
Swift kampion Liga van Engelen 2021
Djadumingu 14 di novèmber Swift a bira kampion di Liga Van Engelen ganando ekipo Navegantes ku skor fásil 16-0 i 15-0. Swift a swip Navegantes fásil i bira kampion pa di 6 biaha sigí di Liga van Engelen.
Thrillers kampion Amstel
Thrillers a bira kampion di Liga Amstel djasabra 6 di novèmber 2021. Djadumingu 14 di novèmber tabatin entrega di premio dor di direktiva di Liga Amstel. Di dos lugá a terminá Cicoza i Gamers a kaba number 3.
Nos Tambe Por Kampion Liga 60
Nos Tambe Por ku un viktoria di 9 pa 1 riba Jaws a bira kampion Liga 60 di temporada 2021 dia 14 di novèmber. Edson ‘Song’ Sophia tabata MVP di e seri final. Nos Tambe Por a gana e seri 2 pa 1.
Informashon di Sòftbòl Slowpitch i Beisbòl Veterano
Fanátikonan di Deporte Kòrsou, bon dia i felis siman. Kon a bai ku e Dos Dianan di Pasku. Notisianan di Liga 60 + tambe ta drentando serka nos. Ekipo Nos Power ku resientemente a sera aña tin bista riba varios hungadó ku ta bai kumpli 60. Entre otro Winston Kirindongo, Earl Virginia, Edsel Brunken i Richel Baromeo ku ta na kaminda. Wendell van het Kruys, Bencho Imperator tambe ta na kaminda pa ekipo Nos Power. Awe 60+ tambe ta birando un kos serio i tin varios torneo na kaminda.
* * * * *
Den siman tabatin rumor ku Marlins di 50+ tin problema. Awèl tantu manager Junny Marsden komo presidente Patrick ‘Chape’ Elisa a desmentí un ke otro kategórikamente. Tur dia tin notisia den grupo di app i tur hende ta kontentu. Un aña kaminda Marlins no a bai play-off despues di hopi aña ku nan tabata den e grandinan. En todo kaso un tim será ku hungadónan di nòmber manera Rignald Martina, Bani Coffie, Skippy Sambo, Pito Postina, Momon Martina, Pon pon Martina, Roy Jakoba, Ian Leito, Junny Marsden, Gilford Schmidt, Tiko Raphael, Winston Kirindongo, Eugene Antonia i Vriendjes Cicilia. E tim tin pichernan manera Gilbert Henrietta, Dudley Penso, Lionel Li ku otronan. Marlins a terminá ku rekòrt di 6-6 den 2021 i keda nèt for di play-off.
* * * * *
Un ratu pa Beisbòl Veterano, Tin tur indikashon ku ekipo The Brothers lo tin un bòm den 2022. Verney Jansen lo tuma mando òf lo ta general manager di e ekipo. Hungadónan ku lo bai The Brothera den 2022 lo ta Verney Jansen, Kelvin Winklaar, Raymond Leonora, Byron Kook i Victor Caldera. Tur e hungadónan ta èks Bulldogs òf un tempu Bulldogs. Nos tin infomrashon ku Kelvin Winklaar a firma kaba ku The Brothers. Varios nòmber mas ta rumbo pa The Brothers i nos ta tene nan un ratu. Marchena Stars tambe ta moviendo duru buskando mas hungadó. Nos ta kòrda na 2019 Marchena a sali duru den Beisbòl Veterano i a bira kampion di Torneo Warmup na Heintje Kool Ballpark. Otro rumor ta ku un tim grandi ku último añanan ta den klasifikashon, lo pèrdè masha hopi hungadó klave. Einan tambe nos no ta bai den detaye ainda pendiente mas informashon.
* * * * *
Djarason nos a papia ku Moises Zimmerman di ekipo Sigi Hunga i ku un tempu tabata doño di ekipo Mi Kos. Moises a bisa nos definitívamente ku e ta kla komo dirigente i doño di Sigi Hunga den Liga 50. Moises: Elvis Balentina i Raishel Trinidad di Brandweer ta den plan pa tuma Sigi Hunga over. Ké mèn, tin chèns ku 50+ di Beisbòl Veterano lo pèrdè un tim i bai bèk na 4 pendiente dos tim pa drenta. Ekiponan Jandoret Raiders, Vosama, Yesterday i Otrabanda ta sigur ku nan lo partisipá den Beisbòl Veterano 50+. Santa Rosa ta pendiente pa forma un tim di 50+ i Santa Maria/Azucar tambe.
* * * * *
Moveshonnan ta sigi pa organisá Torneo Hope 2022 dor di Fundashon Van Engelen Ballpark. Dirigentenan ta yamando representante di ekiponan pa konfirmá adrès di mail pa sigi move rumbo pa manda invitashon pa empresa i ekiponan. Ultimo kampionnan den Torneo Hope tabata SBAB den e kategoría Maskulino Challenger i COED. MCB kampion Femenino Soshal, Damen kampion Soshal Plus i Omni kampion Soshal Maskulino. Den 2020 i 2021 no tabatin Torneo Hope. Parse ku lo bai tin un sekshon Komersial 40+ den Hope. Hopi di e hungadónan di 40 i 50+ no ké kompetí mas den e hóbennan. Pero lo laga e 40 i 50+ hunga den e sekshon di e hóbennan normal. Esei manera ta e kaso ku un hungadó por hunga den COED i alabes hunga su Soshal Femenino òf Soshal Maskulino normal.
* * * * *
Pa loke ta Liga 60 den 2022 i ekiponan ta bira 8. Na 2020 ekiponan tabata 8, pero Marlins a anunsiá na 2021 na komienso di temporada ku nan lo no partisipá na e kampionato. A keda un espasio pa Pitufos drenta den 2022 i nan a piki algún hungadó di Jaws i otro ekiponan. Wimbert Hato ku ta manager di Jaws lo keda ku Jaws apesar ku semper e tabata ligá ku Pitufos. Bèk den tempu. Pitufos a bira kampion di Liga 50 na 2015 ku Cedric Curiel komo MVP. Cedric Curiel lo kumpli 59 aña den luna di mart i ta kla pa djoin 60+ ku ekipo Pitufos. Nos ta keda te aki pa awe.
