Resumen Sòftbòl Femenino Veterano
Nos Goso kampion The Diamond Stars League 2023
WILLEMSTAD- Nos Goso a bira kampion di The Diamond Stars League den un wega emoshonante djabièrnè 9 di yüni 2023 den Sam Bunting Ballpark. Nos Goso a gana Rising Phoenix ku skor di 6 pa 4 den di 9 inning (dos extra inning). Un públiko grandi a bai Sam Bunting Ballpark pa mira e wega finalísimo. Rising Phoenix komo ekipo di kas tabatin hopi chèns pa laga Nos Goso den tereno, pero picheo tremendo di Carlientje Cleopa a saka e outnan na momentu di bèrdat.
E wega kompletu tabata un duelo di picheo entre Carlientje Cleopa di Nos Goso i Marie Windster di Rising Phoenix. Ta di dos biaha sigí ku Nos Goso ta logra bira kampion di The Diamond Stars League. Despues di wega tabatin entrega di premio. Carlientje Cleopa tabata e picher ganadó i Myriela Carlo a bati di 4-3. Marie Windster tabata e picher pèrdèdó.
Resumen Liga van Engelen part 1 Swift ta swip Clase Aparte den final i bira kampion Liga van Engelen
WILLEMSTAD- Swift a gana Clase Aparte den dos wega sigí den final i bira kampion Liga van Engelen den luna di yüni. Ta trata aki di e kampionato 2022 ku no por a finalisá, debí na mal estado di tereno. Swift a gana e promé wega ku skor di 8-2 i wega number 2 ku skor di 13-0. Emilio Velarde a picha e promé wega kompletu i despues tabata Dicson Acosta a tira wega number 2 kompletu pa Swift logra e título relatívamente fásil. Despues di wega tabatin entrega di premio na ekiponan i hungadónan individual.
MVP play-off final ta Nurison Leonora.
%20copy.jpg)
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia. Nos tei awe riba djasabra tambe i nos ta sigi ku resumen di lokenan a pasa den 2023. Ekiponan di Kòrsou a move den gran forma den eksterior (internashonal) pa loke ta trata Slowpitch. Ban Serio kampion na Boneiru, Jaws kampion na Punta Cana i Swift kampion na Kòrsou. Baranka si a keda eliminá den semi-final na Aruba pa loke ta trata Classico 2023 riba nivel di 40+. E aña aki kompetensianan internashonal i ABC&S di Sòftbòl Slowpitch ta sigi. Kòrda e selekshon femenino tambe tur aña ta move pa Aruba, Boneiru, Kòrsou i Sint Maarten i vise versa.
Play-off di Liga Van Engelen i di Liga Amstel di 2022 a sigi den 2023, debí na palu di awa ku a kai den 2022. Swift a bira kampion den Liga Van Engelen i ekipo Thrillers den Liga Amstel. Pa loke ta trata e kampionatonan di 2023 mes kosnan a bòltu formal den tur liga. Ekipo Jaws a bira kampion den Liga van Engelen ku sorpresa grandi mes riba Swift. Jaws a swip Swift de play-off final di Liga van Engelen 2023 i bira kampion. Gamers a dal Thrillers stail di sorpresa pa bira kampion di Liga Amstel. Dos sorpresa grandi ku nos lo tin den e resumen otro siman.
Nos ta kòrda ku ekipo Jaws a bula for di kampionato 2022 loke a sigi den 2023. Jaws a disidí di hala atras i nan no kier a sigi e kampionato di 2022 den 2023. Otro ekiponan tabata pro pa sigi Liga van Engelen den 2023 pa asina terminá e kampionato den 2023. Jaws a bai bèk den nan seno i a skohe pa no hunga kampionato di 2022 den 2023. Jaws tabata na di 3 lugá ku rèkòrt di 10-5 tras di Swift 15-0, Clase Aparte 11-4 . Quisqueya tabatin rèkòrt di 9-6, Navegantes 8-7, Bucaneros 6-9, The Kings 5-9, Big Leaguer 2-11 i Renegados 0-15. Esei ta rèkòrtnan di 2022. Swift a terminá henter kampionato i play-off di Liga van Engelen invikto, loke ta un rèkòrt ku Catpower a yega di pone den Liga Trai Seru na aña 1995 i den Liga 40 na aña 2006. Den Beisbòl Veterano ekipo Quality Stars a terminá invikto den 2023.
Kampionato di Liga 50 a hunga pa promé biaha den Stadion Post 6. Di 8 di aprel te ku 13 di mei Liga 50 a hunga den Stadion Post 6. Despues ku a terminá ku Torneo Hope i despues Kopa ABC&S di hóbennan, Liga 50 a move bèk pa Van Engelen Ballpark. Baranka a terminá buelta regular na promé lugá, Ban Serio na di dos lugá, Jaws na di 3 lugá i Marlins number 4. Baranka a swip Marlins i Ban Serio a dal Jaws den dos wega pa yega final. Den final ekipo Ban Serio a gana Baranka pa bira kampion. Bon públiko ketu bai pa mira weganan di Liga 50 i tambe Liga 60. Liga 40 i otro liganan slow na fanátiko.
Awe nos tin resumen kaminda Nos Goso a bira kampion di The Diamond Stars League. Tabata un wega pèrtá i kandela ku a tuma lugá den Sam Bunting Ballpark. Seri ku tabata empatá na unu i e wega desisivo a bai 2 extra inning. Mas pèrtá e wega finalísimo no por tabata i Gai Lihe spònser di Nos Goso a splika di e wega menshoná durante e sera aña kargá ku hungadó i fanátiko. Carlientje Cleopa tabata picher ganadó. Un dje pichernan di Slowpitch ku a gana mas premio e último añanan.
E firmamento di Johnny Balentina ku Wild Cats ta talk of the town. Mesora Wild Cats a bira gran faborito atrobe pa bira kampion. Wild Cats tabata kampion 2021 i 2022 i a pèrdè e título na 2023. Royal Scorpions a swip Wild Cats den semi-final ku Johnny Balentina den tim di maneho di Royal Scorpions. Te ainda ta Vernon Isabella ta manager di ekipo Santa Maria. Vernon Isabella tabata dispuesto pa hala un banda komo manager di Santa Maria pa Johnny Balentina bira manager. Nos ta keda te aki pa awe.
