Resumen Sòftbòl Slowpitch Torneo Amstel Bright promé torneo di aña un eksito rotundo den 2025
WILLEMSTAD- Amstel Bright Premier Cup a start den yanüari 2025 i terminá dia 9 di mart 2025 nèt e djadumingu despues di Gran Marcha. Awe nos ta start ku e resumen di Sòftbòl Slowpitch i Beisbòl manera ya a bira un tradishon den luna di desèmber. Amstel Bright Premier Cup a resultá un éksito rotundo atrobe ku kampionnan den vários kategoria. E entrega di premio a tuma lugá den luna di aprel durante Torneo Hope. Den e promé kategoria, e promé final di e último fecha tabata ekipo Nos Power ku a gana Los Amigos den 60+ ku skor di 6-4 den final. E kategoria ku a sigi despues tabata 40+ kaminda Cicoza a gana di Bombers ku skor di 18-17.
Swift a gana Bright Stars 15-8 den Modified Slowpitch ku tabata e liga di e hóbennan. Esei tabata e tres finalnan ku tabata djasabra 8 di mart i djadumingu 9 di mart a sigi ku final den 6 diferente kategoria. Den e promé final ekipo Jandoret Raiders a sorprendé Ban Serio ganando ku skor di 10-1 den e gran final. Den e sekshon Latinos Cerveceros a nòkout Renegados 15-5. Den e final di kategoria COED Corporate, Corendon a gana SOAB/WvHCC ku skor di 8-7. FDDK a dal Brandweer 9 pa 5 den e final di Soshal Corporate. The New Radiator a dal Tune Squad 11-3 den e kategoria COED Open. Finalmente The Living Legends a dal Bala Brothers 16-9 pa bira kampion den Soshal Open.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bonnochi. Den e di dos siman di desèmber i nos ta start awe ku resumen di e aña di Slowpitch kargá ku resultado final i pòrtrèt. Awe nos tin detaye di e promé torneo ku a start den luna di yanüari 2025, ku ta Amstel Bright Premier Cup. E torneo a start den luna di yanüari i a dura vários siman pa bai terminá 9 di mart. Despues di Torneo Amstel Bright a sigi Torneo Hope sigi pa Liga 50. E aña aki pa promé biaha no tabatin Liga Amstel na Van Engelen Ballpark i dimes no tabatin Liga van Engelen tampoko. Tin tur indikashon ku e liganan aki a pasa pa historia. Den 2025 ta Liga Streanan di Ayera a hunga riba djadumingu i den oranan di anochi djasabra tabatin e liga di Latinonan i tin biaha djadumingu den oranan di atardi.
* * * * *
Djasabra tabatin wega amistoso di Liga 60 entre Boomerang di Aruba i Lions di Kòrsou. Boomerang a gana Lions ku skor di 3-0. E batenan di Lions a kai formal den último weganan. Lions a pèrdè nan último weganan despues ku nan tabatin un racha di 13-0 den e temporada regular. Nan a pèrdè kontra Nos Tambe Por 3 biaha i awor kontra Boomerang. Nan a gana e último wega di kampionato kontra Jaws i gana di Los Amigos ku skor grandi den e playoff semifinal. Lions un tremendo ekipo ku lo sigi kompetí den e 4 grandinan di Liga 60 den e añanan benidero. Un ekipo soshal, deportivo i bon organisá ku hopi aña di eksistensia for di den 40+, sigi pa 50+ i awor den 60+. Nos ta kere ku awor si tur aktividat a terminá despues di e wega amistoso aki di Liga 60 i e torneo Dimi ku tabata dediká na Oscar Bolivar. Oscar Bolivar sin duna un dje grandinan di deporte di Kòrsou espeshalmente Beisbòl i Bokseo.
* * * * *
Oscar Bolivar ta un hòmber ku masha bon kurason mes ku a duna su alma pa deporte. Gran fanátiko di Yankees i un Wild Cats den alma tempu di su tempu. Oscar tabata e hòmber prinsipal di e racha di 8 biaha kampion sigí di Wild Cats di 1994 pa 2001. Un racha ku difisilmente por wòrdu kibrá den Beisbòl. Segun nos e racha mas grandi di bira kampion konsekutivo riba nivel haltu di deporte ta ekipo Pichingolo ku a logra ku ta 19 aña (1993-2012). Mester buska un manera pa entrevistá Oscar Bolivar un dia. Dimes nos ta pendiente di e resultado di e torneo di Dimi ku a start djasabra i lo mester a terminá ayera. Dimi ta pendiente pa move pa Hulanda i Spaña den 2026 i alabes organisá un torneo na Hulanda. Hopi estrea a hunga Sòftbòl den Dimi den añanan 80 i nos a mira e ekipo aki djaserka den Sòftbòl Slowpitch i Sòftbòl Maskulino Klase A. Te asina leu ku nos ta kòrda e ekipo nunka a subi pa Sòftbòl Maskulino Dòbel A pero tabata kargá ku hungadónan di Dòbel A i e mihónan. Nos ta bai chèk un ke otro ku Johnny Isabella ku ta e fundadó i motor tras di ekipo Dimi huntu ku Elly Soleano di Charo.
* * * * *
Extra Inning ta sigiendo Beisbòl Venesolano ku tin 8 ekipo. Ekiponan ta Bravos de Margarita (25-19) ku ta den kabes, Caribes di Anzoategui (22-21), Aguilas del Zulia (22-21), Cardenales de Lara (23-22), Tigres di Aragua (22-21), Navegantes del Magallanes (21-23) Tiburones di La Guaira (21-24) i Leones de Caracas (18-22). Antes no tabatin ekiponan Bravos de Margarita i Caribes de Anzoategui. Djasabra nos a wak Tiburones di La Guaira kontra di Cardenales di Lara ku vários hungadó di Grandes Ligas den akshon manera entre otro Ronald Acuña Jr, Maikel Garcia i eks Big Leaguernan manera Yangervis Solarte i Alcides Escobar pa Tiburones i Cardenales tin e ruman di Acuña ku ta Luis Angel i Gabriel Moreno. Cardenales a gana Tiburones 5 pa 2. Nos ta mira basta fanátiko, ke men e pueblo ta riba un trankil pa loke ta trata e notisianan ku USA lo drenta Venezuela. Den e dianan aki nos lo menshoná tambe algun ekipo di un tempu den Slowpitch. Boso ta kòrda e ekipo Estrellas del Cibao di vários Dominikano i Latino na Kòrsou. Hungadónan manera Jose Cristo Lopez (Pocho), Suli Cruz, Caraballo, Lesley van Kimmenade, ets. Nos ta keda te aki pa awe i te djarason ku Poder di Dios.
