Rising Phoenix kampion Diamond Stars League
WILLEMSTAD — Rising Phoenix a gana di Treasure New Era ku skòr di 13-5 i bira kampion di Diamond Stars League djabièrnè último den Sam Bunting Ballpark. Hopi fanátiko a duna akto di presensia pa mira e wega finalísimo aki, ku tabata empatá te den di 7 inning. Den kabes di di 7 inning, Rising Phoenix a nota 8 kareda pa boltu e skòr i finalmente bai ku e viktoria di 13-5.
Marin Windster, ku a tira e wega kompletu pa Rising Phoenix, a bira e picher ganadó i tambe MVP di e final. El a gana tur dos wega pa Rising Phoenix den e seri final aki. E ekipo di Treasure a gana e promé wega di e seri ku skòr di 8-2, pa despues pèrdè e desisivo weganan ku skòr di 5-2 i 13-5. Despues di e wega a sigui ku e entrega di premio.
Rising Phoenix 13, Treasure 5
Rising Phoenix a konektá 15 hit i a kometé 1 eror. Marlin Windster tabata e picher ganadó. Na bate: Daynalisa Koeks di 4-3 i Ashanti Giterson di 3-3. Tantu Ashanti Giterson komo Daynalisa Koeks a konektá un homerun kada un.
Treasure a konektá 11 hit i a kometé 4 eror. Na bate Tanusi Delando i Janitza Betrian ámbos di 3-2.
PREMIONAN
Kampion: Rising Phoenix
Supkampion: Treasure
Di tres lugá: Nos Goso
MVP Final: Marin Windster (Rising Phoenix)
Kampion Bate: Sovienca ‘Nunu’ Calmera (Rising Phoenix)
Líder di Homerun: Sharon Rose de Lanoi (Treasure)
Kampion Picher: Janela Comenencia (Rising Phoenix)
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bonochi. Hopi moveshon den fin di siman, kaminda entre otro Rising Phoenix a bira kampion di Diamond Stars League ku un viktoria di 13 pa 5 djabièrnè anochi na Sam Bunting Ballpark. E wega tabata pèrtá i empatá te den di 7 inning, kaminda e ekipo di Rising Phoenix a nota 8 kareda pa habri e wega for di otro. Bon públiko, hopi hende atrobe na Sam Bunting Ballpark pa mira un wega di Diamond Stars League, ku ta un liga femenino Veterano 35+. Un eror den kuadro di Treasure ku dos out a pone ku e wega a bai for di man. Despues di e wega tabatin entrega di premio i Rising Phoenix a bira kampion pa di 3 aña siguí, demostrando ku nan tin un dinastía den Diamond Stars League.
* * * * *
Djasabra último tabatin apertura ofisial di Liga 50 na Van Engelen Ballpark. E kampionato aki ta dediká na 3 baluarte ku a nifiká hopi pa Liga 50. Chapipi Brunken, Ronald Jardinier i Edsel Celestina a keda honrá pa direktiva di Liga 50 den presensia di nan famianan. Un seremonia ku a tuma lugá pa 2’or, despues di e di dos wega djasabra último. E seremonia a start bou di e dak tras di home plate, pa despues subí riba tereno pa e baluartenan por a tira e promé bala. Rensley Martis, ku ta presidente di Liga 50, a dirigí palabra i despues a entregá plakat na e baluartenan menshoná.
* * * * *
Pa loke ta e weganan di Liga 50 di wikènt: ekipo Marlins a gana di Pitufos ku skòr di 10 pa 5 den e promé wega. Baby Alcantara tabata bon den relevo pa Marlins gana e wega. Den e di dos wega di djasabra, Ban Serio, kampion di Liga 50 di 2025, a pasa relativamente fásil riba Sluggers, ganando ku skòr di 11-1. Baranka a gana nan promé wega di kampionato ku un viktoria riba Flamboyan/Gamers. Esnan ku a risibí homenahe a sinta trankil wak e weganan di 2’or i 4’or den kompania di nan famia. E banda M-Band a animá di 5’or pa 7’or di djasabra anochi na Van Engelen Ballpark.
* * * * *
Liga 60 tambe tabatin nan apertura ofisial, kaminda a honra e rumannan Toppenberg (Vanchi i Riley) i Donny Balentina. Einan tambe e presidente a dirigí palabra pa despues honra e baluartenan. Presidente di Liga 60 ta Urvin Martina. Weganan a siguí normal i den kurso di siman nos lo tin resultado i mas detaye. Nos ta bai pa Beisbòl lokal, kaminda weganan di Hubenil i di Klase A a siguí den wikènt. Manera ta konosí, Beisbòl Dòbel A a hunga tambe i djabièrnè tabatin e último wega di Beisbòl di siman. Santa Maria ta den gran forma, nan ta number 1 i invikto. Royal Scorpions a gana nan promé wega djabièrnè den un tremendo partido kontra Santa Rosa. Royal Scorpions a gana ku skòr di 3-2.
* * * * *
Djabièrnè Wild Cats a dal Groot Kwartier feros ku skòr di 22-0. Masha tempu nos no a mira un skòr asina feros riba nivel di Beisbòl Dòbel A. Wild Cats a skòr 11 kareda den kabes di e di 7 inning. Ya e wega tabata 11-0 den bòm di e di 6 inning i na nos manera di mir'é, mester bini ku e regla di nòkout pa wega di 7 inning tambe. Raysheandal Michel a bati di 6-4 den e wega ei pa Wild Cats, Alexander Rodriguez di 4-3 i Shendrion ‘Shen’ Martinus di 5-3. E standing di Beisbòl ku e weganan di djabièrnè inkluí ta: Santa Maria Pirates 6-0, Groot Kwartier Stars 3-3, Wild Cats 3-3, Royal Scorpions 1-4 i Santa Rosa Indians 1-4.
* * * * *
Pa loke ta trata e lídernan: Jaeir Janzen di Groot Kwartier ta líder den bateo ku .550, Shakir Albert di Santa Rosa ta líder den homerun ku 2 i Rushenton Tomsjansen ta líder den RBI ku 10. Den picheo, Zairich Daal di Santa Maria tin un ERA di 0.50. Jamdrick Cornelia ta líder den ponche tirá ku 17. Zairich Daal di Santa Maria i Shurensley Daantji, tur dos di Santa Maria Pirates, tin 2 wega ganá. Beisbòl Dòbel A ta siguí djamars 2 di yüni ku un wega kandela entre Santa Maria Pirates i Royal Scorpions. Djasabra lo ta Santa Rosa Indians kontra di Wild Cats. Nos ta keda te aki pa awe i te djaweps ku Poder di Dios.
