Rising Phoenix ta laga Treasure den tereno i pika dilanti den play-off final Diamond Stars League
WILLEMSTAD - Rising Phoenix riba doblete di Ashanti Giterson ku dos koredó na base ta gana Treasure ku skor di 7 pa 6 den final Diamond Stars League, djabièrnè 20 di yüni 2025. Treasure tabata dilanti durante henter e wega ku skor di 6-0, despues 6-3, 6-4 i e último inning a habri ku 6-5 na fabor di Treasure.
Ekipo Rising Phoenix ta embasá e promé dos koredónan riba hit i eror respektivamente despues di un out. Ashanti Giterson ta konektá e doblete pa laga Treasure den tereno. Monica Noor a gana e wega i Otto Apostel tabata e picher pèrdèdó.
Wega number 2 di e seri ta djasabra anochi pa 8’or na Sam Bunting Ballpark. Ta trata di un seri mihó di 3, ke mèn un viktoria mas pa Rising Phoenix ta nifiká ku nan ta ripití e titulo. Si Treasure gana e wega desisivo lo ta djabièrnè 27 di yüni. Tur wega ta tuma lugá na Sam Bunting Ballpark.
Ban Serio ta nòkout Artemisia den Liga 50
WILLEMSTAD – Ban Serio ku picheo di Ramon Cabrera ku a tira un no hit no run, a gana di Artemisia ku skor di 12-0 djasabra den kontinuashon di Liga 50 na Van Engelen Ballpark. Tabata e úniko wega ku a tuma lugá djasabra siman pasá. E 3 otro weganan a keda suspendé pa motibu di awaseru i mal estado di tereno. Ekipo Ban Serio tin rèkòrt di 5-0 i ta na promé lugá den Liga 50. Wega entre Catpower/Raiders i Jaws a keda suspendé i e otro weganan ku tabata Lions/Pitufos i Baranka/Sluggers. Standing te ku weganan di djasabra último ta Ban Serio 5-0, Catpower/Raiders 4-0, Jaws 3-1, Marlins 3-2, Flamboyan 2-3, Baranka/Sharks 1-2, Lions 1-2, Pitufos 1-3, Sluggers 0-3, Artemisia 0-4.
Ban Serio 12, Artemisia 0 Ban Serio a dal 15 hit i kometé 1 eror. Ramon Cabrera a gana tirando un no hit no run. Erling Gosepa i Miro Daal a bati di 2-2. Rigobert Cijntje, Jair Josepha i Kelvin Winklaar a bati di 3-2. Artemisia no a konektá hit i a kometé 3 eror. Edward Janga tabata e picher pèrdèdó.
Dos ekipo di Boneiru pa Torneo Wim Felicia
WILLEMSTAD- Dos ekipo di Boneiru lo partisipá na Torneo 50 aña Wim Felicia ku lo tuma lugá na Frank Curiel Ballpark di 2 pa 6 di yüli. Ta trata di un torneo den kuadro di selebrashon di 50 aña Wim Felicia pichando eksitosamente den Slowpitch. Ekiponan The Brothers di 50 i Bonaire Stars den 60 ta partisipá den e parti di 50+ i 60+.
Pa Kòrsou ekipo Nos Tambe Por ku ta e ekipo ku Wim Felicia ta hunga adén i Ban Serio lo partisipá den e kategoria 50+. Ekiponan di 60+ di Kòrsou ku ta partisipá na e torneo ta Nos Tambe Por, Lions, Pitufos, Nos Power, Jaws i ABC Stars. ABC Stars ta un ekipo ku hungadónan di Kòrsou, Aruba i Boneiru di 60+ ku lo partisipá na e torneo.
Ekipo ABC Stars ta bou di direkshon di Sendly Reina. Pa djaweps anochi tin un wega amistoso di femenino veterano entre ekiponan Nos Goso (Travel Team) i Sin Stress (Travel Team) ku ta pendiente pa biaha pa Hulanda pa un torneo internashonal despues di e torneo. Den dianan benidero lo tin mas detaye di Torneo 50 aña Wim Felicia den Slowpitch.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia. Kon a bai ku Dia di Tata djadumingu ultimo. Kosnan ta drechando si pa loke ta trata Dia di Tata pa Tatanan último añanan. Deporte tabata wantá den wikènt i weganan final di Diamond Stars League a keda suspendé pa motibu di awaseru i mal estado di tereno. Djabièrnè 20 di yüni weganan a sigi I Rising Phoenix a pika dilanti. Pa loke ta Liga 50 solamente un wega a bai dor i ta e wega entre Ban Serio i Artemisia. Ban Serio a nòkout Artemisia rápido den e wega di 12’or djasabra. Despues di e wega un palu di awa a kai i direktiva a para e wega di 2’or i esun di 4’or. Wega di 4’or mester tabata kandela entre Jaws i Catpower/Raiders. Direktiva a keda di anunsiá ki dia e wegaan ta sigi. E siman promé ku ta dia 7 di yüni, wega di Catpower/Raiders kontra Artemisia a keda posponé i e otro 3 weganan a sigi. Catpower/Raiders vs Artemisia lo sigi dia 26 di yüli ku ta e dia di fiesta bailabel di Liga 50.
• * * * * *
Nos ta pendiente pa skema di Beisbòl Veterano despues ku ekipo Isla Crackers a anunsiá ku nan lo no partisipá mas den Beisbòl Veterano pa temporada 2025. Ekiponan a bira 8 i nos ta kòrda un tempu ekiponan a bira 13 i e direktiva e tempu ei bou di direkshon di Wimbert Hato a stòp di tuma ekipo. Ya.. tur kos tin nan tempu i ta dependé e interes di e grupo di edat tantu e hungadónan komo e fanátikonan ku e interes lo krese. Nos a mira algun ekipo ta train fuerte i a drecha nan ekipo bon. Ekipo Otrabanda lo lucha e aña aki si pa yega den e promé 6-nan. Ekipo Yesterday lo bira un kos serio i ta kandidato pa hunga final. Loke Yesterday mester hasi ta buska picher òf bula riba e picheran di Isla Crackers purá, promé ku otro timnan baha riba nan. Skema nobo a sali djabièrnè 20 di yüni.
* * * * *
Nos a mira hungadónan manera Dave i Randy Kirindongo den fila di Yesterday. Tambe nos a mira e super prospekto un tempu ku no a firma pa hunga profeshonal ku ta Luigien ‘Danny’ Fluonia i e hungadó Jurich Marlin tata di Gedion Marlin. Gedion Marlin tabata profeshonal, miéntras Jurich Marlin a hunga vários selekshon tempu di su tempu den Liga Pariba. Dimes picheo di Yesterday lo ta den man di Andley Simmons i Dave Kirindongo. Santa Maria Pirates bou di direkshon di Vernon Isabella i general manager Roy Jakoba lo pone un bon tim riba papel atrobe. E tim mester di mas profundidat den picheo i no por sigi stèns riba e 1-2 di Nene Martis i Amador Nita. Amador Nita ta yegando 58 aña i no ta mucha mas. Irving ‘skipy’ Sambo i Eldred ‘Sabalo’ Estanista ta mas interesá den 50+ Sòftbòl ku ta hunga tur djasabra na Van Engelen Ballpark.
* * * * *
Djabièrnè siman pasá nos tabatin e lidernan pa loke ta trata Liga 50 Sòftbòl. Great pa mira ken ta e lidernan i ta bon pa otro liganan tambe manda e lidernan algun biaha durante kampionato pa nos. Antes nos mes por a wak e lidernan den Game Changer. Game Changer a bira mas karu ku un app nobo i komo abonado ku tin premium tòg bo mester pidi outorisashon di esun ku ta atendé ku e liga pa bo por drenta i wak sifranan di lidernan den ofensiva i picheo ets. di e liga. Ke mèn, paga mas tantu i bai atras pa loke ta Game Changer. Playoff di Liga 50 tabata programá pa start pa komienso di sèptèmber, pero manera weganan ta keda suspendé aki por spera ku ta start medio sèptèmber pa final por start komienso di òktober.
* * * * *
Miéntras tantu Beisbòl Dòbel A ta sigi normal e siman aki na Tio Daou Ballpark. Weganan di Hubenil i Klase A i tambe Dòbel A di wiként a keda suspendé pa motibu di hopi awaseru i pronóstiko ku tabata mustra ku awaseru lo sigi kai. Djamars tabatin Konferensha di Prensa en konekshon ku e kampionato di Karibe di Senior League ku lo tuma lugá di 22 pa 29 di yüni. E Konferensha di Prensa lo tuma lugá na RBC na Rooi Catootji. Dia 22 di yüni ta djadumingu i e kampionato ta start ofishalmente dia 23 di yüni ku ta djaluna i terminá djasaba ku ta 28 di yüni. Nos ta pendiente pa mas detaye. Te mayan ku Poder di Dios.
