Winston Kirindongo lider di homerun
Robert Trinidad kampion bate i Gregory Martijn kampion picher di Liga
WILLEMSTAD- Liga 60 a manda e sifranan final di kampionato regular. Robert Trinidad di Lions a sali kampion bate, Gregory Martijn tambe di Lions kampion picher i Winston Kirindongo lider di homerun. Robert Trinidad a bati 16 hit den 29 turno pa un average di .552 , Winston Kirindongo di Nos Tambe Por a konektá 3 homerun den 28 turno i a gana e título di lider di homerun riba Michael Scoop tambe di Nos Tambe Por ku tabatin 3 homerun pero den 29 turno na bate. Gregory Martijn a gana 7 wega i pèrdè 0, sigí pa Elvis Jakobus ku a gana 3 wega i pèrdè 0.
REGLANAN:
Kampion Bate: E hungadó ku e averahe di mas haltu den un kantidat mínimo di 2.1 aparishon na plato (PA) rekerí pa kantidat di wega di skèdjel pa ekipo den un kampionato. No obstante loke ta wòrdu menshoná di un kantidat mínimo di aparishon na plato, kualke hungadó ku tin ménos ku e kantidat mínimo di aparishon na plato, pero ku lo tin un averahe mas haltu si duné e kantidat di aparishon na plato pa yega e kantidat mínimo di aparishon na plato, lo ta e kampion bate si ainda e averahe ta mas haltu. (14 wega x PA 2.1 = PA 29) Regla W-28.
LIDER HOMERUN: Kampion Honronero, E hungadó ku mas tantu honron. Den kaso di empate e hungadó ku ménos turno na bate. - Regla W-28. Kampion Picher: E picher ku tin un porsentahe mas haltu di wega ganá i pèrdí. Pa kalifiká, e picher mester a picha un mínimo di 1.0 inning pa wega hungá dor di e ekipo. Dus den kaso di Liga 60 ta 14 inning (=14 wega x 1.0) - Regla W-28.
BATEO/PICHEO
Tur lider di bateo tin un average mínimo di 2.1 aparishon na plato (PA) pa wega. Tur lidernan di picheo tin un average minimo di 1 inning pichá pa wega. W-28.
Basá riba 14 wega di kampionato tur lider mester tin average mínimo di 29 PA. Basá riba 14 wega di kampionato tur lider mester tin average mínimo di 14 inning pichá.
Average di bateo (AVG)
Player GP PA AB H AVG Team
1 Robert Trinidat 12 29 29 16 0.552 Lions
2 Renato Anastagasti 14 37 32 17 0.531 L. A.
3 Machiel de Roon 14 38 38 19 0.500 Jaws
4 Winston Kirindongo 14 37 28 14 0.500 N.T.P.
5 Rudsel Poulina 13 33 31 15 0.484 Jaws
Porsentage weganan gana i perdi (PCT)
Player IP GP W L PCT Team
1 Gregory Martijn 42.0 8 7 0 1.000 Lions
2 Elvis Jacobus 17.0 4 3 0 1.000 Lions
3 Siegfried Lopez 34.3 7 5 1 0.833 N.T.P.
4 Riley Toppenberg 63.7 14 7 2 0.778 Jaws
5 Donald Balentina 23.3 5 3 1 0.750 Los Amigos
MAS INFORMASHON DI SÒFTBÒL I BEISBÒL
Fanátikonan di Deporte Korsou, bon dia. Riba djasabra rumbo pa e gran final di Liga 60 entre ekiponan Nos Tambe Por i Lions. Final lo tuma lugá djadumingu 23 di novèmber pa 2’or pm den Frank Curiel Ballpark. E final ta un seri mihó di 3 manera ya a bira un kustumber den Liga 60. Awe nos tin detaye kon a bai ku e dos timnan den temporada regular i den play-off. Den e tres weganan ku e dos ekiponan a hunga e aña aki, ekipo Nos Tambe Por a gana dos wega i Lions a gana un wega. Awe nos tin mas di e lidernan individual di kampionato regular. Nos a risibí reklamo ku nos no a pone tur batiadó di e proménan i nos a pone solamente e promé dosnan den bateo i den picheo. Maichiel de Roon a sali lider den hit pa loke ta trata e temporada regular pero di 3 den bateo.
* * * * *
Ata algun detaye di e dos timnan ku lo enfrentá otro den final. Ekipo Lions a gana Nos Tambe Por den e promé buelta ku skor di 5 pa 4 dia 27 di yüli i den di dos buelta riba e último fecha di buelta regular, dia 26 di òktober Nos Tambe Por a dal Lions ku skor di 14-0. Lions tin un average di .317, ERA di 1.71 i defensa di ekipo Lions ta .938. Nos Tambe Por a bati pa average di .332, picheo di un ERA 1.54 i defensa .927. Nos Tambe Por despues di un wega di play-off su average a baha i bira .328, picheo ERA a bira 1.50 i defensa a bira un tiki mihó, 935. Nos tambe Por a hunga solamente un wega den play-off i ekipo Lions mester a hunga dos wega pa por a bini bèk den play-off. Despues di e dos weganan di play-off Lions su average a bira .318, picheo (ERA 1.69) i defensa .943. Nos Tambe Por a gana Lions pèrtá 3-1 den e wega di page system entre number 1 i 2.
* * * * *
Nos Tambe Por ta pendiente pa un torneo di un dia entre ekiponan di 50 i 60 manera a tuma lugá den 2024. Den 2024 ekiponan di 50+ a pasa relatívamente fásil kontra esnan di 60+. Ekiponan invitá ta Lions, Nos Tambe Por, Los Amigos i Jaws den 60, ekiponan Ban Serio, Baranka, Jaws i Jandoret Raiders den 50. Ekiponan 1,2,3,4 di 60+ lo topa esnan di 50+ den mesun posishon. E weganan lo tuma lugá den wikènt di 13 i 14 di desèmber pa sera aña di Sòftbòl Slowpitch. Moveshonnan pa loke ta 50+ ABC ta sigi. Marlins ta pendiente pa manda invitashon di ekiponan di Kòrsou ku lo partisipá den e Kopa ABC&S. Ta un komishon ta disidí ta kua ekipo ta invitá, ke men Aruba i Boneiru tambe tin di bisa den invitashon e ekiponan.
* * * * *
Djaluna nos a skibi tambe di e torneo organisá den kuadro di 40 aña ekipo Dimi. Saludo pa Jero Williams ku tabatin un ekipo di spònser pa Old Spice i Casa Faried. Ekipo ku tabata den gran forma den klase A den añanan 80. Si e ekipo lo a sigi move den Sòftbòl Maskulino Fastpitch mester a pasa 45 aña kaba. Un tempu Boogie Snack tabata spònser e ekipo ku tabata tira wega di futbòl tambe ku hungadónan manera Jero Williams, Renato Anasagasti, Song Sofia ets. Despues e ekipo a bira manera un farm system pa ekiponan di Dòbel A manera Harlem Power, Twins, Nabco ets di Sòftbòl Maskulino Dòbel A. Aworaki Jero ta un dje fundadónan i pilá na tersera pa ekipo Nos Tambe Por. Ekipo Nos Tambe Por tin 4 título den 8 aña den Liga 60.
* * * * *
Ekipo Jaws ku ta for di final di Liga 60 despues di basta aña. Jaws a bai final den kasi tur temporada di Liga 60. Jaws a bira kampion di 2012 te ku 2015. Na 2016 i 2017 ekipo Los Amigos a bira kampion. Despues tabata Nos Tambe Por ku a bira kampion na 2018, 2019, 2020 i 2021. 2022 i 2023 Jaws atrobe i na 2024 ekipo Nos Tambe Por. Nos ta keda te aki pa awe i te mayan ku Poder di Dios.
