Algun gran fanátiko/spònser a kontribuí
Royal Scorpions a entregá premio na hungadónan ku a destaká

WILLEMSTAD- Djamars 22 di desèmber, algun gran fanátiko di Royal Scorpions a entregá premio na varios hungadó ku a destaká den kampionato 2020. E evento a tuma lugá na New Prosperity Services na Emmastad. Royal Scorpions a terminá kampionato regular na promé lugá ku rekòrt di 10-2 i despues a pèrdè den wega finalísimo di play-off semi-final 3-2 kontra di Santa Rosa, ku despues a bira kampion.
Gai Lihe, un dje spònsernan tras di kortina di semper a hiba palabra i entregá entre otro sèn kèsh, chèk, ‘pakete di Pasku ’ i regalu manera entre otro televishon ets. Spònsernan presente tabata Gai Lihe, Lottery Drive, Flow ets.

Raymond van Gurp ta risibí pakete di Pasku komo regalo pa su tremendo labor komo manager den 2020.


ESNAN PREMIA
Roderick Bernadina pa su tremendo defensa na primera, Terrence Goeloe tremendo kètcher tantu defensivamente komo na bate, Raywendley van Gurp tabata all around komo MVP di Royal Scorpions i MVP di Beisbòl Dòbel A komo dos aña sigí. Raymond ‘Mompy’ van Gurp pa su tremendo trabou komo manager.

Fanátiko i spònsernan presente na entrega di premio tabata entre otro Anthony Zimmerman, Zulema Kenepa, Rigmar Dometilia i Gai Lihe Barbolina despues di entrega di premio i chèk.

Raywendley van Gurp ta risibí chèk komo MVP di temporada di Royal Scorpions. E tabata MVP di kampionato regular tambe pa di dos aña sigí.
Roderick Bernadina ta lesa mensahe ku fanátiko di Royal Scorpions a skibi huntu ku e chèk.
Terrence Goeloe ta risibí regalo pa su trabou komo kètcher.
Zulema Kenepa, fanátiko number 1 di Royal Scorpions tambe ta risibí pakete di Pasku.
Raywendley van Gurp a risibí pakete di Pasku tambe.
Edinho Meyer a bati tremendo. Ela haña un televishon komo regalo. Zulema Kenepa i Rigmar Dometilia ta tuma e premio pa Edinho Meyer.

‍