Royal Scorpions a firma Ildion Martina i ta pendiente pa firma mas hungadó

WILLEMSTAD- Royal Scorpions e ekipo di Beisbol Dòbel A ku tin mas hungadó agente liber a firma Ildion Martina wikènt pasá.  Despues di hopi rumor e kècher ku último 6 añanan a hunga den Santa Rosa a pasa pa Royal Scorpions.  Manager Raymond ‘Mompy’ van Gurp mes ta mobilisando pa firma e hungadónan liber. Ildion Martina lo bira kècher estelar den Royal Scorpions. Ta trata di un bon batiadó ku tin poder, ta bati pa average i ta traha bon ku picher. Ildion tabata kècher estelar di Santa Rosa Indians ku a bira kampion di Beisbòl Dòbel A na 2020.  Den desèmber 2021 tabatin rumor ku Ildion lo bai for di Santa Rosa, despues otro informashon ku Ildion Martina lo keda Santa Rosa. Pero finalmente segun un bon fuente ku Ildion Martina a firma ku Royal Scorpions. Na 2021 Ildion a bati pa average di .323 produkto di 20 hit den 62 turno ku 18 RBI den 19 wega.

Ildion Martina mester a firma ku Royal Scorpions siman pasá.

‍

DENNIS GUSTINA
Dennis Gustina a papia ku dirigentenan di Royal Scorpions e siman aki. Parse ku nan no a yega na un akuerdo i dirigentenan di Royal Scorpions, entre otro Raymond Mompy van Gurp. Dirigentenan a pone oferta pa Dennis ku a bisa ku elo bai pensa i bini bèk den kurso di otro siman. Otro hungadó Kevin Moesquit lo keda ku Royal Scorpions. Tabatin indikashon ku Kevin lo a bai Santa Maria. Otro rumor ta ku Darren Seferina, shortstop/segunda base di Santa Maria lo bini Royal Scorpions. Levi Carolus a bisa nos ku e ta agente liber i lo mester a risibí retiro serka Royal Scorpions djaluna 24 di yanüari 2022. Porta ta habrí ainda den Royal Scorpions pa e hungadó Curtney Doran, estelar leftfielder di Royal Scorpions e último dos añanan.

Kevin Moesquit lo keda ku Scorpions despues ku tabatin rumor ku elo pasa pa Santa Maria.
Darren Seferina di Santa Maria lo pasa pa Royal Scorpions. Pero di fuentenan hopi yega, e hungadó no a tuma desishon ainda.
Levi Carolus agente liber, ela risibí su retiro dia 24 di yanüari 2022.

Richene Martina tei bèk ku Santa Maria Pirates den 2022

WILLEMSTAD- Richene Martina, picher derecho ku tin algún aña den Santa Maria lo hunga den 2022. Dirigentenan di Santa Maria a konfirmá e informashon pa Deporte Kòrsou. Richene Martina no a mira akshon ku Santa Maria den 2021. Na 2020 tampoko Richene no a mira masha aktuashon. Na 2019 Richene tabatin bon aktuashon ku Santa Maria Pirates komo picher. Nèt e aña ei e kampionato no a terminá, debí ku e direktiva di e tempu ei a baha den e parti final di kampionato regular. Na 2018 Richene tabata klave den e éksito di Santa Maria ku a bira kampion di Beisbòl Dòbel A , kabando ku un tremendo ERA di 2.97 huntu ku pichernan manera Johan Rifaela, Jonathan Balentina, Claysandy Henriquez i otronan.

‍
Richene Martina lo tei temporada 2022 kompletu ku Santa Maria Pirates.
Santa Maria Pirates moviendo den silensio ketu bai despues di temporada 2021.

INFORMASHON DI BEISBOL I SOFTBOL


Fanátikonan di Deporte Kòrsou, bon dia. Moveshon i traspasonan ta sigi den Beisbòl Dòbel A. Pa loke ta trata ekipo Royal Scorpions, manager Raymond ‘Mompi’ van Gurp mes ta moviendo pa sera kurá di su ekipo. Mompi mester a reuní ku Ildion Martina ku ta den Santa Rosa na un restorant na Palu Blanku i mas den kurso di e siman aki Mompy van Gurp mester a sinta ku e centerfielder Dennis Gustina Jr. Royal Scorpions no ta para ketu riba e gran kantidat di hungadó agente liber ku nan tin. Royal Scorpions tin Roderick Bernadina, Curtney Doran, Terrence Goeloe, Dennis Gustina, Ramses Jamanika i Kevin Moesquit ku ta liber.  Dos hungadó di Royal Scorpions ku tabata liber a bai, Geriyon Jakob i Gavanee Virginie a bai Wild Cats. Ke mèn, Wild Cats a piki dos piská di Royal Scorpions.

Chado i Mompy den Royal Scorpions. Despues di hopi aña huntu, awor kada unu riba nan mes.

‍

* * * * *

Santa Maria Pirates a konfirmá ku nan tin Richene Martina bèk. Richene ta un picher ku por tira weganan grandi, kontra ekiponan grandi, den play-off ets ku fasilidat. Richene ta un dje poko pichernan di Beisbòl Dòbel A ku tin un tremendo change-up ku ta difísil pa bati. No kambio di velosidat riba kurva, pero e real change-up ku mesun spit di man, pero e bala ta yega home ku e velosidat basta abou. E bala ku ta saka batiadónan for di balansa. En todo kaso nos no a tende di otro kambionan ku tin den e ekipo Santa Maria. Ta e ekipo grandi den Beisbòl Dòbel A ku ta ménos aktivo òf nan ta moviendo den silensio kompará ku añanan anterior. Mester apuntá ku den coaching tambe Santa Maria a piki un grandi ku ta Chado Obispo i no ta ekskluí e posibildiat ku un ora pa otro Curtney Doran, yu di Chado Obispo lo por firma ku Santa Maria Pirates, apesar ku Royal Scorpions ainda tin interes.

Edinho Meyer i Curtje Doran dos grandi di Royal Scorpions.

* * * * *

Boso ta kòrda e aña ku a hunga e promé wega ofishal den Sentro Deportivo Kòrsou, despues ku pa hopi aña weganan tabata tuma lugá den Stadion di Rif ku despues a bira Stadion Johnny Vrutaal. E promé wega di Beisbòl Dòbel A den SDK tabata dia 8 di aprel 1980 entre Blue Haws i Groot Kwartier. Renato Anasagasti tabata picha pa Blue Hawks i gana den relevo pa Destrey Raymond.  Nato a tira 2 inning I dos tersio den relevo pa gana e wega.  Naai Hooi tabata e picher pèrdèdó pa Groot Kwartier. Ela risibí relevo di Carlos Rudolf.  Vários dato di e wega aki tin den e buki Homerun di Hubert Flemming, un tremendo buki por sierto ku ta bala pena pa wak si tin kaminda ku ta bende e buki ei of via kontaktonan ku famia por laga druk e buki aki di nobo i bendé na librerianan.

Renato Anasagsti a gana e promé wega den histroia di Beisbòl den Sentro Deportivo Kòrsou (SDK) na aña 1980.

‍

* * * * *

Ban bèk pa algun informashon kayente. Levi Carolus parse tin su retiro di Royal Scorpions den su man i ta agente liber.  Parse ku Santa Maria tin interes den Levi Carolus. Royal Scorpions no ta masha interesá parse, segun fanátikonan hopi serka. Tin indikashon ku Kevin Moesquit lo keda Royal Scorpions i su amigu Darren Seferina di Santa Maria Pirates lo ta rumbo pa Royal Scorpions. Lugá ta habrí den Royal Scorpions tòg pa Curtney Doran i den kurso  di e siman aki Mompy van Gurp lo sinta ku Curtney Doran ku ta yu di Chado Obispo ku a move di Royal Scorpions bai Santa Maria bèk. Ildion ta klá ku Royal Scorpions i e mester a firma wikènt pasá na e restorant aya na Palu Blanku, restorant ‘E Faborito’.

Joshua Leito a firma djabièrnè 28 di yanüari 2022 ku organisashon di New York Yankees. E firmamentu a tuma lugá den e faborito na Palul Blanku.

* * * * *

Terrence Goeloe kècher di Royal Scorpions no a firma ainda ku niun ekipo. Awor ku e kècher (èks Santa Rosa) Ildion Martina a firma ku Royal Scorpions, ta práktikamente sigur ku Terrence Goeloe lo firma ku Santa Rosa i bai komparti e trabou di kècher ku Ayrton Gijsbertha.  Sidney Antonia picher di Wild Cats lo ta moviendo pa Hulanda. Awe un prospekto mas di Kòrsou lo firma profeshonal. Ta trata aki di un shortstop ku ta hunga den organisashon di Marchena Braves. Nos tin mas detaye den e dianan benidero.

‍

Terrence Goeloe no a firma ku niun ekipo ainda. E ta agente liber.

‍