Royal Scorpions i Santa Rosa Memories ku varios kambio
WILLEMSTAD- Ekipo Royal Scorpions i Santa Rosa ta pendiente pa varios kambio. Parse ku Royal Scorpions ta duru tras di e kètcher Ildion Martina di Santa Rosa. Ildion ta un dje piesanan klave pa Santa Rosa i den hopi wega krusial e ta kuarto bate di e ekipo. Ildion Martina a bira kampion ku Santa Rosa na 2020. Di otro banda Santa Rosa ta tras di kètcher Terrence Goeloe di Royal Scorpions. Goeloe a hunga den pasado pa Wild Cats i Royal Scorpions i ta bon kètcher defensivo ku un bon bate. Ku yegada di Stephan Vidal, Goeloe no tabata mira akshon komo regular mas den Royal Scorpions.
SORPRESA GRANDI
Sorpresa a kai na momentu ku Jeremy ‘Loko’ Lucas a entregá retiro na direktiva di Royal Scorpions. Loko apesar di no ta muchu aktivo mas komo picher, ta un piesa klave komo coach i un di esnan di promé ora di Royal Scorpions. Lucas tin basta aña ku e ekipo Scorpions.
Parse loko Lucas ta na kaminda pa Santa Rosa, kaminda e lo djoin su ruman Jordan Lucas i por forma un 1-2 fèrfelu. Ya Santa Rosa a piki dos grandi despues di temporada 2021 ku ta e picher Shair Lacrus di Firebirds i Calten Daal di Wild Cats. Royal Scorpions ta trahando masha duru mes pa tene Roderick Bernadina den nan ekipo. Un dje batiadónan ku hopi poder ku ta defendé primera base i outfield den gran forma.
Informashonnan di Beisbòl i Sòftbòl
Lesadonan di Deporte Kòrsou bon dia i felis wikènt. 2021 a pasa pa historia. Un aña basta bon pa Deporte na Kòrsou apesar di e pandemia Covid-19. Deportenan a start den luna di yüni i a sigi move te den desèmber. E deportenan ku nos ta kubri, esta Beisbòl i Sòftbòl a move bon. Tur klase di Beisbòl a sigi i liganan di Slowpitch. Biahenan pa eksterior tabata limitá espeshalmente Little League ku a hunga play-off i despues enkuentronan interinsular entre Kòrsou i Aruba so riba nivel Minor, Little, Intermediate i Junior. Slowpitch por bisa a move den gran forma i práktikamente tur e liga a start, drei i terminá eksitosamente.
* * * * *
Nos tabata presente na sera aña di ekipo Baranka ku a tuma lugá na Resort di Gino Valeriaan den Blue Bay. Un anochi basta agradabel kaminda Baranka a sigi pone énfasis riba e union den e ekipo. Nos konosé Baranka djaserka pa basta aña. E ekipo semper a traha riba e union i esei a manifestá den e parti di play-off di Liga 50. Ta hopi hungadó tin ku no ta pone preshon pa nan hunga i ta keda kontentu basta tur hende dibertí i e tim gana naturalmente. Esnan ku no tabata por ku e maneho i alabes e sistema di e tim mester a move, apesar ku por ta nan ta bon batiadó, ets.
* * * * *
Ekipo Unidos ku ta hunga den Liga Streanan di Ayera a sera aña na Terasa Mama Cacao Constancia na Boca Sami. Unidos ta ekipo 50+ ku tin algún aña ta move den 35+ i Liga 50. Boy Constancia ta dirigente di e ekipo aki i ta yu hòmber ma s chiki di Cacao Constancia. Pitufos tambe a sera aña serka Boy Constancia siman pasá i nos tabatin reportahe.
* * * * *
Lástimamente Curacao Baseball Week a keda kanselá pa motibu di Covid-19. Nèt e aña aki kasi tur Big Leaguer lo tabata presente pa pasa nan konosementu over pa e hóbennan. Bèk pa Slowpitch, Torneo Survivors tambe ta na peliger. E organisashon enkabesá pa Marlon Paz ta pendiente kiko ta bai pasa pa loke ta trata medidanan di Gobièrnu. Tin tur indikashon ku lo wanta un ratu ku e torneo atrobe den 2022 manera tabata e kaso den 2021. E variante Omicron ta birando un kaso hopi serio i dia 29 di desèmber tabatin 555 kaso positivo, dia 1 di yanüari 2022 tabata 816 kaso (Oef.)
* * * * *
Siman pasa nos a skibi di Torneo Union Komersial ku despues a bira Kopa Pim Fangman. Torneo Baranka (Torneo Kopa Joy Alberto), Torneo Refineria Isla, ta torneonan ku tabata tuma lugá na komienso di aña pa ekiponan warm-up pendiente e kampionatonan ku ta bai tuma lugá durante aña. Un tempu kòrtiku, 2 pa 3 aña tabatin Super Cup tambe organisá pa Pim Fangman. Keda pendiente pa Torneo Wim Felicia ku lo bai tuma lugá dianan 1, 2 i 3 di yüli. 2 di yüli lo kai riba un djasabra den 2022. Ekiponan di Liga 40, 50 i 60 lo kompeti den Torneo Wim Felicia. Ekiponan di Aruba i Boneiru tambe lo ta presente na Kòrsou pa kompetí i dibertí den e Torneo Wim Felicia.
* * * * *
Riba Facebook nos a lesa di Plenchi Pipi Jesurun a bira un echo. Esei ta e patio dilanti di bar van Engelen Ballpark net tras di tribune i dugout banda di primera base. Pipi Jesurun sigur un dje grandinan di Slowpitch, Swift i Van Engelen Ballpark, antes Suvek Ballpark. Ta spera basta aktividat riba Van Engelen Ballpark den luna i añanan benidero. Ta pendiente tambe pa un liga femenino veterano ku lo hunga na Sam Bunting Ballpark. Ekipo Rising Trotters lo ta tras di e torneo, ke men ántes All Stars League òf algu por estilo. Nos ta keda te aki pa awe.
