Royal Scorpions ta nòkout Santa Rosa 13-1 den promé wega di play-off
WILLEMSTAD - Royal Scorpions a pasa fásil riba Santa Rosa Indians den e promé wega di play-off semi-final djarason 16 di sèptèmber den Stadion Johnny Vrutaal. Royal Scorpions ku bon picheo, defensa i bateo a gana ku skor di 13-1. Royal Scorpions a nota 2 kareda, den promé inning, 4 den di dos inning i 6 kareda den di e 3 inning pa tuma un ventaha di 12-0. Santa Rosa ta nota 1 kareda den kabes di di 5 inning i Royal Scorpions ta nota unu mas pa e wega terminá 13-1 den 7 inning debí na e regla di nòkout. Terrence Goeloe a konektá homerun pa Royal Scorpions.
Play-off Beisbòl Dòbel A ta sigi awenochi na Tio Daou Ballpark ku e promé wega entre Santa Maria ku a terminá number 2 i Wild Cats ku a kaba number 3 di e kampionato regular.
NUMERITONAN
Royal Scorpions a nota 13 kareda, bati 12 hit i hunga sin eror. Ruderly Manuel tabata e picher ganadó. Ela tira 5 inning, tuma un kareda limpi, 5 hit i 1 base por bola. Orsen Josephina i Gavanee Virginia a tira un inning. Terrence Goeloe a dal un homerun.
Santa Rosa a skor na 1 okashon, dal 5 hit i kometé 2 eror. Siamani Boekhoudt tabata e picher pèrdèdó. Ela tira 1 inning i un tersio. Pichernan ku a tira pa Santa Rosa ta Shane Quant (0.1 inning), Rowently Windster (0.2 inning), Swindley Lint (2.2 inning), Michael Angel Vilchez (1.0 inning).
