Royal Scorpions vs Santa Rosa awenochi den wega number 4 di play-off final
WILLEMSTAD – Awe djarason 13 di sèptèmber lo tin wega number 4 di e play-off final di Beisbòl Dòbel A 2023 entre Royal Scorpions i Santa Rosa Indians. E wega lo start 7.30 pm i ta spera un bon públiko i Royal Scorpions ta dilanti 3-0 den e seri final. Ta solamente Santa Maria Pirates a bini bèk atras 0-3 den seri final pa bin gana 4 sigí. Esei tabata na aña 1989 tempu di Beisbòl den Sentro Deportivo Kòrsou kontra di Santa Rosa Indians. Santa Rosa tabata kampion 3 aña sigí e tempu ei. En todo kaso Royal Scorpions tin bon chèns di amplia nan kantidat di títulonan na 19. Nos tin e añanan ku Royal Scorpions a bira kampion. Wild Cats ta na di dos lugá ku 17 título.
HISTORIA KAMPION
Kuminsando for di 1965 ku nos tin registrá Royal Scorpions a bira kampion na 1966, 67, 68, 69. 1971,72,73 i 74. Dos biaha 4 sigí, ta 8. Despues a sigi títulonan na 1979, 1981, 1985, 1990. 4 titulo mas ta 12. Laga nos sigi konta 92, 93, 2002, 2004. Nos a yega na 16. Despues tabata na 2011 i 2012 ta 18 total. Fanátikonan di Royal Scorpions lo gosa un bòl. Wild Cats ta hopi serka ku 17 título i nan lo keda lucha pa yega na e máksimo ganadó den Beisbòl di Kòrsou. Santa Maria tin 11 título sigí pa Santa Rosa ku tin 7 título 1965, 1986, 87, 88. Ta 4 título, despues tabata 2003, 2008 i 2020. Ke mèn total 7 título pa Santa Rosa Indians.
ULTIMO AÑANAN
Pa loke ta trata e último añanan Santa Maria a bira kampion na 2018. Na 2020 Santa Rosa indians i na 2021 i 2022 tabata Wild Cats atrobe. Royal Scorpions ta entre grandinan ku tin hopi tempu sin bira kampion. Royal Scorpions a bira kampion pa último biaha na 2012. Laga nos repasá e kampionnan di for di 2011. Royal Scorpions 2011, 2012. Santa Maria 2013, 2014, 2015. Wild Cats 2016, 2017. Santa Maria 2018. 2019 no tabatin final di Beisbòl Dòbel A. 2020 Santa Rosa i Wild Cats 2021 i 2022. E último 11 kampionatonan Wild Cats 4, Santa Maria 4, Royal Scorpions 2 i Santa Rosa 1.
ROYAL SCORPIONS 2012
Nos ta bai bèk den tempu un ratu pa loke ta trata Royal Scorpions. E último wega i e último biaha ku Royal Scorpions a bira kampion na 2012. Wak e nòmbernan e tempu ei. Segun nos ta Johnny Balentina ku tabata manager e tempu ei ta bèk den Royal Scorpions komo coach. Ata e relato di e wega final di e aña ei. Royal Scorpions ku tremendo relevo di Sherwenne Antersijn i bateo di Levi Carolus a bira kampion Beisbòl Dòbel A djaluna 15 di òktober 2012. Stadion Johnny Vrutaal tabata kompletamente kargá ku fanátiko pa mira e gran final.
Scorpions a sali gana e promé dos weganan di final. Despues Santa Maria a gana wega number 3. Scorpions ta bai dilanti den e seri 3-1 i Santa Maria ta kontestá bèk ganando weganan 5 i 6. Den wega number 7 Royal Scorpions a bini por la goma pa gana den un tremendo partido ku skor di 5-3. Levi Carolus tabata klave bayendo di 4-3 ku 2 kareda empuhá. Ryan Ilario tambe a empuhá dos kareda. Santa Maria a habri ku e picher Eddie Candelario ku a tira bon i hasta tabata dilanti 2-0 den komienso di e wega. Royal Scorpions ta ripití nan titulo despues ku nan tabata kampion na 2011 tambe.
%20copy.jpg)
