Rurik Capella ta koroná komo kampion 2023 di ahedres na Kòrsou
WILLEMSTAD - Fin di siman e kampionato di skak di Kòrsou 2023 a sigui ku su tres ròndu desisivo pa determiná ta ken ta bira e kampion di Kòrsou. Djasabra, 2 di desèmber e torneo a ranka sali ku e partido entre e hóbennan Johan van Delden di 17 aña i e talento di 15 aña Kennard Martinez Gallardo. Despues di un komienso den e apertura Spanjó, Van Delden a logra bini ku un kombinashon táktiko pa gana di Martinez Gallardo. Den un otro partido entre e dos Maestro di Fide nan Wim Blijstra i Rurik Capella, kende a skohe e apertura di Rei Indio. Hustamente ora ku Blijstra a parse di tin e bentaha desisivo, e ta kometé un eror den un bon posishon ku mester tabata faborabel pe. Capella a hasi bon uso di e regalo aki i por a skirbi un punto kompleto pa tuma e liderato.
Den e di seis buèlta, e partido entre Capella i Van Delden a kaba empatá. E otro partido entre van Opstal i Maestro di Fide Van Bemmelen tabata sigur interesante pa sigui. E defensor di título Van Bemmelen a sorprendé Opstal ku un variante lateral di e apertura Siciliana i a hunga tambe di manera atakante. Opstal a logra stòp e atake di Van Bemmelen bon. Den e promé oportunidat ku e mes a haña pa ataká, Opstal a mustra su kualidatnan táktiko i ku un kombinashon bunita, gana e partido. Despues di 6 ròndu, e skor ta indiká ku Capella ta na kabes ku 5 punto, sigui pa Opstal ku 4.5.
Den e último ròndu, Capella mester a hunga ku e piesanan pretu kontra Luis Rodriguez, kende tabata den un subida fuerte. Kontrola i sin hopi riesgo, Capella a logra pa empatá su wega kontra di Rodriguez. Opstal tabata obligá pa gana di Blijstra. Den su estilo karakterístiko, Blijstra a pone mas i mas preshon riba Opstal. Sinembargo, Opstal no a keda patras i a sigui lucha te na final pa logra un empate.
Ku e resultadonan aki, Rurik Capella a koroná su mes ku e título di kampion di ahedres di Kòrsou 2023, ku 4 wega ganá i 3 empatá pa asina keda komo úniko hungadó invikto den e torneo aki.
Federashon di Skak di Kòrsou (Fedako) ta mira bèk riba e torneo aki ku orguyo, spesialmente mirando e prestashonnan di e talento di 15 aña Kennard Martinez Gallardo ku a keda na di sinku lugá i Johan van Delden ku a keda na e séptimo lugá. Ahedres na Kòrsou ta sigui krese, i futuro ta prometedor ku hungadónan ku hopi talento manera nan.
