Santa Maria i Marchena Little League ta keda empatá na 0
WILLEMSTAD- Wikènt pasá kampionato di Little League a sigi ku weganan riba nivel Minor, Little i Junior riba parkenan di Kòrsou. Den un tremendo partido na Frank Curiel Ballpark ekiponan Santa Maria i Marchena a keda empatá na 0. Bon picheo i bon defensa ámbos banda. No tabatin eror den e partido. Awe nos tin resultado di weganan di Minor, Little i Junior.
RESULTADONAN
Djasabra 12 di febrüari
MINOR LEAGUE
Monte Carmelo(1) 12, Monte Carmelo(2) 11
Monte Carmelo(1) a dal 5 hit i nan a kometé 7 eror. Picher ganadó tabata Albert Villanueva Loconsolo i e mes a bai di 1-1. Pa Monte Carmelo(2) 4 hit ku 6 eror. D-Shiano Reigina a resultá pèrdèdó. Rishon Girigorie a bai di 1-1.
Marchena(2) 12, Tera Cora 1
Marchena(2) a dal 5 hit i nan a hunga sin eror. Reshandley Martis a gana. Na-J Nahr a bai di 1-1. Tera Cora no tabatin hit i nan a hasi 1 eror. Jedieen Leolina a pèrdè.
Montagne Ariba 11, Sta Rosa 3
Montagne Ariba a bati 6 hit i nan a hunga sin eror. D’veron Alexander a gana. Jaxion Kleinmoedig a bai di 3-2. Pa Sta Rosa 2 hit ku 7 eror. Angel Gonzalez a pèrdè. Syon Aybar a bai di 1-1.
Trai Seru 15, Koraal Specht 0
Trai Seru tabatin 10 hit i nan a hunga sin eror. Jay-Vhen Hyacinth tabata ganadó. D’Harvion Haard a bai di 3-3. Koraal Specht no tabatin hit i nan a hasi 2 eror. Gedion Martina a resultá pèrdèdó.
LITTLE LEAGUE
Montagne Ariba 7, St Rosa 4
Montagne Ariba no tabatin hit i nan a kometé 3 eror. Jhiondry Meyer a gana. Sta Rosa a dal 2 hit i nan a hasi 3 eror. Raylipo Martina a pèrdè. Lulijoun Apostel a bai di 2-2.
Trai Seru 10, Koraal Specht 2
Trai Seru a dal 4 hit i nan a kometé 4 eror. Quaysinn Rojer a gana. Kymani Martijn a bai di 3-2. Michealangel Cordilia a konektá 1 homerun. Koraal Specht tabatin 4 hit i nan hasi 8 eror. Dishairo Antersijn a pèrdè i Elion Thielman bai di 1-1.
Sta Maria(2) 14, St Michiel 1
Sta Maria(2) tabatin 9 hit ku 2 eror. Dylan Mulder tabata ganadó. D’Shawn Winklaar a bai di 2-2. Pa St Michiel 4 hit sin eror. Raimaulendry Walle a resultá pèrdèdó. Yeadon Lourens a bai di 1-1.
Marchena 0, Sta Maria 0 (Empate)
Marchena a dal 4 hit i nan a hunga sin eror. Ziano Schoop ku Jaythan Cordilia, ámbos a bai di 2-1.
Sta Maria a bati 2 hit i nan a hunga sin eror. Davey Jay Rijke i Deshawn Bonafasia, kada unu a bati di 2-1.
JUNIOR LEAGUE
Sta Maria(2) 12, St Michiel 2 Sta Maria(2) a dal 8 hit i nan a kometé 1 eror. D-Shawn Martina Casimiri tabata ganadó i e mes a bai di 3-3. Pa St Michiel no tabatin hit i nan a hasi 1 eror. Arshenou Martina a resultá pèrdèdó.
Marchena(2) 11, Monte Carmelo 8
Marchena tabatin 7 hit ku 1 eror. Rishen Picus a gana i e mes a bai di 2-2. Pa Monte Carmelo 5 hit ku 4 eror. Leandro Serrao a pèrdè. Dionner Booi a bati di 2-2.
Sta Maria(1) 5, Jandoret 4
Sta Maria(1) a dal 5 hit i nan a kometé 2 eror. Izion Mogen a gana. Gurshen Mogen a bati di 3-2. Jandoret tabatin 2 hit i nan a hasi 2 eror. Jaysel Suares a pèrdè i Sherlson Lourens a bai di 1-1.
Trai Seru 18, Brievengat(2) 6
Trai Seru tabatin 11 hit ku 3 eror. Gui-Jerome Marchena tabata picher ganadó. Ayden Calmes a bati di 1-1. Gui-Jerome Marchena ku Zhaydire Joubert, ámbos a konektá 1 homerun. Brievengat a bati 5 hit i hasi 4 eror. Kyle de Haseth a resultá pèrdèdó. Owen Harms a bai di 2-1.
Van Engelen 11, Montagne Ariba 7
Van Engelen a dal 3 hit i nan a kometé 4 eror. Rohan Agostien a gana i Lodymar Cathalina a bai di 1-1. Montagne Ariba tabatin 7 hit ku 4 eror. Rowensley Constancia a pèrdè. Tyron Veeris a bai di 3-2.
INFORMASHON DI BEISBÒL I SÒFTBÒL
Fanátikonan di Deporte Kòrsou, bon dia. Awe nos tin resultadonan di Little League, divishon Minor, Little i Junior ku a ranka sali siman pasá. Tabatin un wega kandela entre Santa Maria i Marchena. E wega aki a terminá ku skor di 0-0 ku katedrá di picheo i defensa di tur dos ekipo. E pichernan number 1 di tur dos ekipo no a habri e wega. Marchena a laga hopi koredó na base. E wega a keda suspendé 3 biaha pa awaseru, pero a bai 6 inning i terminá ku skor di 0-0. Tremendo partido i bon públiko.
* * * * *
Tin tur indikashon ku kampionatonan regional i World Series lo tuma lugá normal e temporada aki. Little League lo tuma lugá na Punta Cana di 5 pa 10 di yüli pa loke ta kampionato di Karibe. Ta spera delegashonnan grandi kargá ku fanátiko di Kòrsou i otro islanan di Karibe riba e fechanan menshoná na Punta Cana (República Dominicana), ku ta un lugá hopi bishitá i faborito pa fakansi, apesar ku no ta fakansi tin, pero kompetensia fuerte. Keda pendiente pa mas detaye tokante e biahe aki.
* * * * *
E otro fechanan di e kategoríanan ta: Intermediate (11-13) lo ta na Kòrsou di 26 di yüni pa 3 di yüli. Junior (13-14) lo tuma lugá na Caguas, Puerto Rico di 8 pa 17 di yüli. Finalmente kategoría Senior (15-16) Guayama, Puerto Rico di 23 pa 30 di yüli 2022. Fecha i sede di Minor (9-10) no ta konosí ainda. For di 2014 nos tabatin kompetensianan internashonal di Little League na Kòrsou tur aña, ku esepshon di 2020. 2021 tabatin kompetensian riba nivel Minor, Little i Intermediate entre Aruba i Kòrsou den Stadion Post 6.
* * * * *
Ban pa Sòftbòl Slowpitch. The Diamond Stars League ta start djabièrnè awor na Sam Bunting Ballpark. E apertura ofishal ta 7’or pm i despues ta sigi ku wega entre Mas Goso i The Fighters pa 7.30’or. Dos ekipo kandela i den gran forma. Djasabra pa 7.30’or pm tin wega entre Rising Trotters i Lady G. Nos lo bai kubri e liga nobo aki tur siman ku resultado i pòtrèt. Liga Di Nos Tur ta pendiente pa reuní bou di e presidente nobo ku ta Roque Bernadina.
* * * * *
Den Liga di Sòftbòl moveshonnan ta sigi. Ekipo Ban Serio ta pendiente pa reunión ku dr. Jerry Booi. Tin rumor ku e hungadó Fabiani Orcadio lo pasa di Ban Serio pa ekipo Lions. Varios hungadó ku tabata pendiente pa bai ekipo Ban Serio a wanta un ratu pendiente kiko ta bai pasa. Pitufos ta tirando bara di hak den ekiponan grandi pa forma un dream team pa por yega final. Marlins ta drechando nan ekipo formal ku picher i lo sigi ku e trainingnan pa ta den gran forma pa komienso di kampionato.
* * * * *
Mas informashon di Swift den kuadro di selebrashon di nan 50 aña. Djaluna ei nos tabatin un ñapa i a keda te kaminda ku a pone lus na Suvek Ballpark na 1987. Despues di a pone lus na 1987 mesora a lanta Liga 40 ku ta un liga di Sòftbòl pa hungadónan veterano ku a pasa e edat di 40 aña. Te ainda Liga 40 ta hunga 2 bes pa siman na Van Engelen Ballpark. Miéntras tantu SBC Swift a kuminsá na aña 1993 ku Liga van Engelen ku ta hunga tur djadumingu na e parke ya menshoná. Un tempu tabatin 11 ekipo ta partisipá den Liga van Engelen. Pa hopi aña kaba e kampionato di Sòftbòl di skol organisá dor di Fundashon Sedreko (awor FDDK) a hunga na Suvek Sòftbòl Park ku na 2019 a bira Van Engelen Ballpark.
* * * * *
Organisadónan di torneo manera Amstel Bright i Hope ( Fundashon Van Engelen) ta pendiente pa wak kiko ta bai pasa pa ranka sali mesora. Organisashon SIPS di Polis lo bai organisá pa promé biaha un torneo komersial 40+ den luna di yüni 2022. Ta vários empresa por traha un tim di 40+ fásil. Entre otro, Polis, Douane, SDKK, MCB, Flow, Isla, Aqualectra i SBAB/Ontvanger. Mas torneo di 2022 ta Kopa ABC 50+ organisá pa Marlins aki na Kòrsou. Ekiponan ku a konfirmá ta Astros, Surprise i Stingers di Aruba. Ultimo kampion di ABC&S 50+ tabata Ban Serio na Aruba. Na 2019 no tabatin Kopa ABC. Tabatin manera un ‘onderonsje’ na Sint Maarten. 2020 i 2021 práktikamente no tabatin Torneo ABC.
